Chapter 3.

Sa takot ni Reinna na baka nga totohanin ni Jacob ang banta nito ay mabilis siyang tumayo, kahit pa nanakit ng husto ang balakang niya dahil sa pagkabagsak sa sahig gawa ng pagtulak sa kanya ng lalaki.

Pagtalikod niya ay agad na tumulo ang ilang butil ng luha na kanina pa niya pinipigilan. Tahimik na tinahak niya ang hagdan paakyat habang tumutulo ang mga luha niya. Hindi na niya ininda ang masakit na balakang at nagpatuloy sa pag-akyat hanggang sa makarating siya sa kwarto. Wala siyang sinayang na sandali at agad niyang kinuha ang dalawang malaking maleta saka iyon binuksan. Pumasok na rin siya sa walk-in-closet at kinuha ang sarili niyang mga gamit— mga gamit na kanya talaga at hindi binili ng sira ulo niyang asawa.

Napalingon si Reinna nang bumukas ang pinto ng walk-in-closet at pumasok doon ang kasambahay na si Anna. Malungkot ang mukha na tumingin sa kanya ang dalagita at tila ba hindi sang-ayon sa pag-alis niya.

“Tulungan ko na raw po kayo Ma’am Reinn sabi ni Sir Jacob. Narinig ko po kasi na minamadali na siya ni Angela bruha na paalisin ka rito,” napasimangot na sabi ni Anna.

Napatiim-bagang si Reinna nang marinig niya ang pangalan ni Angela. Ang demonyetang babae na iyon ay hindi na makapaghintay! Kabit lang naman pero kung umasta akala mo ikinasal na sa ex-husband niya.

“Dito mo na ilagay deretso sa maleta, Ann,” aniya sa kasambahay. Mabait ito at lagi niyang kasangga sa mansion na ito. Kung hindi lang dahil sa pangangailangan nito ng pera para sa pamilya ay matagal na rin sanang umalis sa mga Salazar si Anna. Pero alam niya na nagtitiis ang dalagita dahil sa pera na sinasahod lalo pa at may pinapag-aral itong mga kapatid sa probinsya.

“Sasama na lang kaya ako sa iyo Ma’am Reinna,” mungkahi nito.

Tiningnan ni Reinna si Anna na ngayon ay parang maiiyak na dahil sa aalis na siya sa mansion.

“Hindi pwede, Anna. Wala akong pera na pampasahod sa iyo. Isa pa hindi ko rin alam kung makakahanap ba agad ako ng mapapasukan lalo na at may edad na ako. Lagpas kalendaryo na tapos wala pang karanasan ni isa sa trabaho sa labas,” malungkot niyang sabi saka isinara ang maleta. Totoo naman kasi ang sinabi niya.

Kung pwede niya lang sana na kunin itong si Anna ay gagawin niya.

“Mag-iingat ka Ma’am ha. At kapag yumaman ka na huwag mong kalimutan na kunin ako rito sa mga demonyetang amo ko,” sabi nito na naiiyak na natatawa. Kaya maging siya ay emosyonal ngunit natatawa rin dahil sa sinabi nito.

Niyakap muna nila ang isa’t isa at inilibot ni Reinna ang tingin sa kabuuan ng kwarto. Ito na ang huling beses na masisilayan niya ito.

Palabas na sana sila ni Anna nang biglang bumukas ang pinto. Nakapameywang na bumungad sa kanila si Angela.

“Bakit ang tagal mo ha, Reinna? Ano pa ba ang kinuha mo bukod sa mga damit mo lang?” mataray na sita sa kanya ng babae.

“Wala kang pakialam kung natagalan man ako. And for your information, tanging mga sariling gamit ko lang ang dinala ko,” palaban na sagot ni Reinna kay Angela.

“Maganda na iyong malinaw Reinna. At saka bilisan mo na ang kilos mo dahil naaalibadbaran ako sa pagmumukha mo," pairap nitong sabi. "And thank you nga pala, dahil sa wakas ako na ang titira rito sa mansion. Hindi na ang kagaya mong walang silbi!”

Humigpit ang hawak ng kamay ni Reinna sa maleta niya. Tila nagpantig ang tainga niya sa narinig. Kaya kailangan na niyang umalis dito bago pa mapatid ang pagtitimpi niyang sabunutan ang babaeng ‘to at ilampaso ang pagmumukha nito sa sahig!

“And oh, one more thing nga pala, dear. Invited ka sa engagement party namin ni Jacob at lalong invited ka sa aming nalalapit na kasal,” nakangising sabi ng bruha.

Parang may tumusok na karayom sa dibdib ni Reinna sa sinabi nito. Hindi na niya pinansin si Angela at hinila na niya ang isang maleta saka bumaba ng hagdan. Nakasunod naman sa kanyang likuran si Anna sa na bitbit din ang isang malaking maleta niya.

Pagbaba ng hagdan ay naabutan niya sa living area ang biyenan niyang babae. Maldita itong nakatitig sa kanya at kulang na lang ay hilahin na siya palabas ng mansion. Sobrang sama ng ugali talaga na tiniis niya sa mahabang taon dahil sa respeto niya bilang asawa ng anak nito.

“I hope ito na ang huli nating pagkikita. Nakakaawa ka Reinna, siguradong hindi mo alam saan ka pupulutin ngayon,” pang-uuyam ng matanda sa kanya.

Sarkastika siyang ngumiti at humarap sa matanda. “Alam mo kung sino ang mas nakakaawa sa ating dalawa ma?" aniya sabay ngiti ng mapakla. "Ikaw, iyon. Ikaw, kasi matanda ka na nga pero masama pa rin ang ugali mo!” palaban niyang sagot kahit nasa tabi nito si Jacob. Wala siyang pakialam. Total aalis na siya sasabihin niya ang gusto niyang sabihin. Makabawi man lang siya kahit sa masakit na salitang ibabato niya rito.

“Don’t talk to my mother like that, Reinna. She is still your mother-in-law!” duro ni Jacob sa kanya.

“Ex-mother-in-law Jacob! Mother-in-law na sana hindi na lang nangyari dahil pinagsisisihan ko lahat. At ayusin mo iyang mga salita mo. Hiwalay na tayo,” singhal niya sa dating asawa.

“Bastos! Walang modo kang babae ka! Dapat lang talaga na hiniwalayan ka na ng anak ko!” akmang sasampalin siya nito pero sinangga niya ang kamay ng matanda kaya nabitin ito sa ere. Ilang beses na siya nitong napagbuhatan noon ng kamay, pati ba naman ngayon? Aalis na nga lang siya sasaktan pa rin siya. Marahas niyang binitawan ang kamay nito na muntik na nitong ikatumba. Mabuti na lang at nasa likod nito si Jacob na ex-husband niya.

“You bitch!” sigaw sa kanya ni Jacob at matalim siyang tinitigan.

“Wala kang respeto! Layas!” namumula sa galit na sigaw ng matandang ex-biyenan ni Reinna.

Napangisi naman si Reinna sa loob-loob niya. Talagang aalis siya sa impyernong mansion na ito.

Bumaling siya kay Anna at kinuha niya ang isang maleta niya.

“Ihatid na kita sa labas Ma’am Reinna,” ani nito na hinawakan pa siya sa kamay at ayaw bitawan ang maleta niya. Pero ayaw niyang mapagalitan si Anna kaya umiling siya.

“Huwag mong tulungan ang babaeng iyan, Anna kung ayaw mo na sesantihin kita sa trabaho mo at paalisin dito sa pamamahay ko!” gigil na bulyaw ng matanda kay Anna.

Ngumiti naman si Reinna kay Anna at tinanguan ito. Ayaw niya na madamay rito si Anna, kaya kinuha na niya ang maleta sa kamay nito. Walang lingon likod na naglakad siya palabas sa mansion hanggang sa tuluyan na siyang nakalabas sa malaking gate ng mga Salazar..

Naglakad pa si Reinna hanggang sa makarating siya sa main gate ng subdivision kahit may kalayuan mula sa mansion ng mga Salazar. Agad niyang pinara ang isang taxi na buti na lang ay saktong dumaan. Kinontrata niya ito at nagpahatid sa lumang bahay ng parents niya.