K6

CLAUDINE

Masakit ang ulo ni Claudine nang magising siya kinabukasan dahil nakainom siya ng marami. Mabuti na lang, nandiyan si River at inihatid siya sa bahay niya kagabi.

Bumangon siya sa kanyang kama. Nanuot sa ilong niya ang mabangong amoy ng nilulutong almusal ni aling Liza. Kumalam ang kanyang sikmura at agad na nagtungo sa kusina.

"Gising ka na pala. Mag-almusal ka na. Nakapagluto na ako," sabi ng matanda sa kanya.

Nginitian niya ito. "Nag-almusal na po ba kayo? Kumuha po kayo ng almusal niyo ng mga apo niyo. Hindi mo naman po iyan mauubos," sabi niya sa matanda.

"Salamat, Claudine. Doon na lang ako mag-aalmusal sa bahay para may kasama ang mga apo ko."

"Sige lang po. Ayos lang ako dito. Kumain na po kayo," aniya sabay ngiti.

Nang kumuha ang matanda ng kanilang pagkain, nagtungo na si aling Liza sa kanilang munting bahay. Kumain naman mag-isa si Claudine. At nang matapos siya sa pagkain, siya na ang naghugas at nagligpit.

Naupo siya sa sala at saka sumilip sa malaking bintana. Ang ganda ng view sa labas. Puro luntian. Malamig ang simoy ng hangin dahil puro puno. Naalala bigla ni Claudine ang naganap kagabi.

"Tsk. Akala niya yata maghahabol pa ako sa kanya. 'Di na uy," inis na sabi ni Claudine sa sarili.

Hindi kasi niya napigilang mainis kay Hunter kagabi. Lalo pa't niyayabangan siya nito na kunwari lang siyang matapang. Pero ang ending, hahabulin niya lang ito sa huli. Malakas siyang tumawa sa sinabing iyon ni Hunter. Inis na inis siya sa kayabangan nito.

"Ano ba akala niya? Habambuhay akong baliw sa kanya? Gagò!" dagdag pa niyang sabi.

Nagtungo siya sa kuwarto upang magpalit ng damit. Pupunta siya sa farm para bisitahin ang mga hayop doon na dumating kahapon. Titingnan niya rin ang ginawang kulungan ng mga hayop doon kung maayos ba ang pagkakagawa.

"Good morning!"

Muntik pa siyang mapasigaw sa gulat nang sumulpot sa kanyang harapan si River. Natawa siya bago inirapan ang binata.

"Daig mo pa ang kabuti na bigla na lang susulpot kung saan," aniya sabay hawi sa kanyang buhok.

"I'm sorry kung nagulat kita. Saan ka pala pupunta?"

"Sa farm. Titingnan ko kung maayos ba iyong pinagawa kong kulungan ng baboy pati na manok. Tapos may ipapagawa pa pala akong kulungan ng mga baka. Sana maging maayos ang lahat," wika ni Claudine sabay hingang malalim.

Hindi naman kasi siya maalal sa pagkakaroon ng negosyo. At iyon ang unang negosyo niya at magiging libangan niya.

"Magiging maayos ang lahat. Huwag kang mag-alala, tutulungan kita," wika ni River.

"Salamat, River. The best ka talaga. Ano? Sasama ka ba sa akin?"

"Oo. Gusto ko ring makita ang pinagawa mo. Mainam iyan para pasok lang nang pasok ang pera sa iyo. Kaysa labas ka nang labas ng pera."

Tumango siya bilang pagsang-ayon kay River. "Yes dahil mauubos din basta ang pera ko kapag panay lang ako gastos. At least ito, sarili ko na talagang pera ito. Negosyo ko na mismo. Mabuti na lang talaga malaking lupa ang iniwan sa akin ni daddy. Magagamit ko."

Naglakad silang dalawa patungo sa kanyang malawak na lupain. Naroon na nga ang mga hayop na binili niya. Ilang inahin din ang binili niya. Sinabi sa kanya ni aling Liza na maayos na ang lahat. Pati na ang mga pagkain ng mga hayop doon.

Nakita niya ngang maayos ang pagkakagawa ng kulungan. At sinisimulan na ring gawin ang kulungan ng baka. Para kapag umulan, may masisilungan ang lahat ng alaga niyang hayop sa kanyang farm.

"Sabihan mo ako sa susunod kapag may naghanap ng supplier ng manok pati na itlog. Para ako ang magiging supplier nila," sabi niya kay River.

"Oo sige. Marami akong kilala dito. Ako na ang bahala," saad ni River sabay kindat.

Pinakain nilang dalawa ang mga hayop doon. Libang na libang si Claudine sa kanyang ginagawa. Wala siyang ibang naisiip kun'di ang pakainin ang mga hayop doon. Hindi pumasok sa isip niya si Hunter.

Kaya naman pagbalik nila, tawa nang tawa si Claudine. At ganoon din si River.

"Medyo mabaho pala talaga ang dumi ng baboy pero keri ko lang naman maglinis ng kulungan. Maigi ngang ma-experience ko para masaya," aniya sabay hagikhik.

"Oo masaya naman maglinis ng kulungan. Malakas ang pressure ng tubig kaya madaling maaanod ang dumi."

"Kaya nga. Sige, pasok na muna ako sa bahay. Magpapahinga muna ako. Mamayang hapon na ulit ako lalabas," paalam niya sa binata.

Hindi muna agad pumasok sa loob ng kanyang bahay si Claudine dahil diniligan niya muna ang mga halamang tanim sa paligid ng malawak niyang bakuran. Pati na ang mga naggagandahang bulaklak doon.

"Tapang-tapangan ka rin talaga, ano? Tingnan lang natin kung hindi ka maghabol sa akin paglipas ng ilang linggo o buwan."

Tumigil si Claudine sa kanyang ginagawa at saka napairap sa hangin. Tiningnan niya ang lalaking nagsalita sa kanyang likuran at saka umirap.

"Talaga lang, ha? Hindi ako sigurado. Wala na kasi akong pakialam sa iyo. Tama na ang ilang taong pagpapakatanga sa walang kwentang katulad mo," matapang niyang sabi.

Tumawa si Hunter. "Ganoon ba? Eh bakit ayaw mo pang mag-file ng annulment?"

"Simple lang, para may makuha naman ako sa iyo. Sayang naman ang araw-araw na pag-iyak ko kung wala akong makukuha sa iyo. Pero kahit sino pang babae ang kantutïn mo, wala akong pakialam."

Nanlaki ang mata ni Hunter. "Bunganga mo. Bastos ka ng manalita."

Tumawa siya. "Anong bastos doon? Iyon naman talaga ang tawag doon. Huwag kang feeling malinis diyan. Huwag ako. At isa pa, bakit nagpunta ka pa dito? Papansin ka lang? Hindi mo matanggap na kaya kitang iwan?"

Malakas na tumawa si Hunter. "At bakit naman ako magpapapansin sa iyo? Masayang-masaya nga akong sumuko ka na. Wala na akong problema pa."

Tumango-tango si Claudine. "Iyon naman pala. Eh 'di maigi. Ganoon din ako. Masaya rin akong nakahinga na ako sa iyo. Natatawa na nga lang ako sa sarili kong nagpakabaliw ako sa katulad mo. Marami naman pala siyang mas higit sa iyo."

"Sino? Si River? Malandi ka rin pala 'no?"

Asar siyang natawa. "Ni minsan hindi ako lumandi sa kahit na sino. Hindi ko na kasalanan kung may mga lalaking naaakit sa ganda ko. Hindi man ako maganda sa paningin mo, maganda naman ako sa paningin ng ibang lalaki," mayabang niyang sabi sabay kindat.

Nakita niya ang pagtiim-bagang ni Hunter pero agad na siyang tumalikod.

Ngayon, natutuwa na siyang inisin si Hunter.