Chapter 4

CHAPTER 4

Agad na rin naman na nagsimula ang naturang event at matapos nga nilang kumain ay nanatili lamang silang mag asawa roon sa kanilang kinauupuan. Gustuhin man ni Benjamin na mag ikot ikot dahil maraming kilalang tao sa mundo ng negosyo ang naroon ay pinili na lamang niya na magstay sa kanilang kinauupuan kasama ang kanyang asawa dahil matanda na nga siya at mabilis na rin mapagod.

“Mr. Suarez, good to see you here,” bati ng lalaki na papalapit sa pwesto ng mag asawa. “Kumusta na? Mukhang napakatinik mo pa rin talaga ngayon pagdating sa babae ah,” dagdag pa nito at saka ito napatingin sa gawi ni Allaicka.

Natawa naman si Benjamin sa sinabi na iyon ng lalaki na walang iba kundi si Jordan na isa rin magaling sa mundo ng pagnenegosyo.

“Ganon talaga,” tatawa tawa pa na sagot ni Benjamin habang hawak niya ang kamay ni Allaicka. “O by the way. Eto nga pala ang napakaganda at napakasexy kong asawa si Allaicka,” pagpapakilala na niya sa kanyang asawa rito.

“Really? Oh, hi Mrs. Suarez. Nice to meet you,” sagot naman ni Jordan. “I’m Jordan… Jordan Herrera,” pagpapakilala pa niya sa kanyang sarili at saka niya inilahad ang kanyang kamay rito.

“Nice to meet you too, Mr. Herrera,” sagot naman ni Allaicka at saka niya tinanggap ang pakikipagkamay nito.

“Nasaan nga pala si Mr. Alvarez?” sabat naman na ni Benjamin sa mga ito.

“Si kuya? Nariyan lang yun. Baka nag iikot ikot lang. Masyado kasing marami ang bisita niya at kailangan niyang puntahan isa isa ang mga yun,” sagot naman ni Jordan.

Napakunot naman ang noo ni Allaicka ng sabiin ni Jordan ang salitang ‘kuya’ dahil kung magkapatid ang mga ito ay bakit magkaiba ang apelyido ng mga ito.

Agad naman na napansin ni Jordan ang pagkunot ng noo ni Allaicka at tila ba naguguluhan nga ito.

“Nakatatanda kong kapatid si Jake Alvarez at kung nagtataka ka kung bakit kami magkaiba ng apelyido ay yun ay dahil sa magkaiba kami ng ama. Siya ay sinunod ang apelyido ng aming ina habang ako naman ay sa apelyido ng aking ama,” pagpapaliwanag ni Jordan kay Allaicka.

Dahan dahan naman na tumango si Allaicka sa paliwanag na iyon ni Jordan sa kanila.

Habang nag uusap usap nga sila roon ay sakto naman na dumating na si Jake ang nakatatandang kapatid ni Jordan.

“Tsk. Bigla ka na lang nawawala sa likuran ko,” napapailing naman na sabi ni Jake kay Jordan ng lapitan niya ito. Ang akala kasi niya ay nasa likuran lang niya ito kanina pero nagulat na lang siya dahil bigla na lang nga itong nawala.

“Hindi mo naman ako buntot kuya at isa pa ay ikaw ang kausap ng mga yun at hindi ako kaya naghanap na lang ako ng makakausap ko,” sagot naman ni Jordan.

Napapailing na lamang talaga si Jake sa naging sagot na iyon ng kanyang kapatid at kahit kelan talaga ay napakamainipin nga nito.

“By the way kuya. This is Mr. Benjamin Suarez and his wife Mrs. Allaicka Suarez,” pagpapakilala ni Jordan sa mag asawa na kanina pa niya kausap.

“Good evening Mr. Alvarez. Nice to meet you,” bati naman ni Benjamin dito kasabay ng paglahad niya ng kamay sa binata.

Bigla namang sumeryoso ang mukha ni Jake at saglit pa nga siyang napatitig sa matandang kaharap niya ngayon. Napatingin din siya sa nakalahad nitong kamay pero hindi niya iyon kaagad tinatanggap.

Napansin naman ni Jordan ang ginawa na iyon ng kanyang kapatid kaya naman pasimple niya itong siniko ng mahina.

“Kuya, si Mr. Suarez ang may ari ng Suarez Group of Company na kilalang kilala ngayon na namamayagpag sa mundo ng pagnenegosyo. Isa rin si dad sa mga investors sa kanilang kumpanya kaya nakilala ko siya,” sabi pa ni Jordan at saka niya muling mahinang siniko ang kanyang kapatid.

Saglit pa na pinakatitigan ni Jake si Benjamin at saka siya nagpakawala ng isang malalim na buntong hininga bago niya tinanggap ang pakikipagkamay nito.