SPECIAL CHAPTER 3 (PART 5)

Ngumiti siya at sinapo ang kanan nitong pisngi. "Mahal na mahal din kita, Elvin," wika niya.

Ngumiti rin si Elvin at dumukwang sa kaniya pero hindi pa man nito nalalapat ang labi sa kaniya nang biglang umiyak ang magkambal. Nang tingnan nila ang dalawa, nag-aaway na ito— naghahampasan ng mga laruan. Kaagad silang gumawa ng aksyon, kinuha niya si Erin habang si Elvin naman ay kinuha si Elvis.

Bakit parang pakiramdam ni Shanelle ay mamanahin ng dalawa ang ugali ng ama nila? Huwag naman sana, baka mamatay siya kaagad nang maaga.

KATULAD NG USAPAN, sa isang buwan na sila magpapakasal sa Spain kaya sa isang linggo ay lilipad na sila sa patungo sa nasabing bansa para maghanda. Patungo si Shanelle sa Cavite— sa restaurant niya na pinamamahalaan muna ni Fatima. Ilang oras pa ang nakalipas ay nakadating na siya.

"Good afternoon po, Ma'am Shanelle," anang isang waitress.

"Magandang hapon din," nakangiti niyang bati pabalik.

Binati pa siya ng mga empleyado niya na sinasagot din nama niya kaagad.