CHAPTER 3

"KUHANIN MO SA FINANCE department yung report na hinihingi ko," utos ko kay Omeng habang abala ako sa binabasa kong report ng opisina.  Nag-angat ako ng mukha nang mapansin kong ni hindi man lamang ito tumitinag mula sa pwesto nito, "Ano pang hinihintay mo?" Nakaangat ang isang kilay na tanong ko dito.  Waring atubili pa ito bago tumalima sa utos ko.  Siguro ay naiinis dahil sinabihan ko siyang kailangan naming mag-overtime ngayong Friday sa dami ng kailangang tapusin sa opisina.

Sa ngayon ay ako na ang CEO ng kompanya ng aking ama ngunit never akong nakakitaan ng aking mga empleyado ng katamaran.  I see to it na magiging mabuti akong halimbawa sa kanila kaya ganuon na lamang ako kasipag magtrabaho.  I also make sure na lahat ng documents na piniirmahan ko ay masusi kong pinag-aaralan.  Bagama't two years ng retired si Daddy, sa kanya pa rin ako huimihingi ng advice lalo na sa mga malalaking desisyon ng kompanya.

Kaya kung dati ay masipag na akong magtrabaho, mas lalo na ngayong sa akin na nakaatang ang isang malaking responsibilidad.  Ayokong masira ang tiwala sa akin ni Daddy.  Madalas nga nitong sabihin sa akin na kinatatakutan nitong baka tumanda na akong dalaga because I don't have time to play.  Mas lalong no time for love.  Marami namang nanliligaw sa akin, pero kasama ako sa no boyfriend since birth na mga kababaihan.

Bukod kasi sa mataas ang standard ko pagdating sa mga lalaki, sadyang wala pa akong natitipuhan sa lahat ng nagpaparamdam sa akin.

Hindi naman sa pagmamayabang, maganda talaga ako.  Ako iyong tipo na mapapansin kaagad sa karamihan dahil hindi naman ordinaryo ang ganda ko.  Ayoko mang aminin pero namana ko ang kagandahan ko kay Mommy na mestisa at artistahin ang dating.  Matangkad rin ako sa height na 5'8.  Matangos ang aking ilong, mapula ang aking mala-Angelina Jolie na mga labi.  Pino ang aking maputing balat, at hanggang balikat ang akong natural brown hair na pagkakintab-kintab dahil na rin siguro sa masusustansya kong kinakain.  

"Hindi mo sinasagot ang tawag ko kaya pinuntahan na kita dito," anang isang pamilyar na tinig mula sa kabubukas na pinto. Dinig ko ang lagatok ng heels nito habang naglalakad papasok sa loob ng aking opisina. Pag-angat ng mukha ko ay kaagad napakunot ang nuo ko nang makita ko si Mommy. Pusturang-pustura ito kasama ng alalay nitong may labit na isang maliit na bag, kung saan nakasuksok ang inumin ni Mommy at pamaypay.

"What brings you here?" Walang kabuhay-buhay na tanong ko sa kanya, bumuntong hininga lang ako ng malalim saka muling ibinalik ang tuon sa pinag-aaralan kong project proposal.  Gusto kong iparamdam kay Mommy na hindi ito welcome sa aking opisina lalo na at masyado akong busy para maglaan ng oras sa kanya.

"Yayain sana kitang magdinner." anang Mommy ko habang iginagala ang tingin sa kabuoan ng aking marangyang silid.  Dinapot pa nito ang picture naming dalawa ni Daddy nuong 18th brthday ko.  "Ang alam ko, dumating rin ako sa birthday mo 'nung debut mo pero ni hindi mo man lang inilagay ang larawan ko kasama ka," tila nagtatampo pa nitong sabi.

Hindi ko siya pinansin. Hah.  Ang lakas ng loob magdemand sa kanya?  Gusto ko sanang sabihin sa kanya na mga importanteng tao lang ang dinidisplay ko sa opisina ko kaya lang kahit naman paano ay ina ko pa rin ito kaya ayoko naman siyang sabihan ng ganuon.

"May ipinareserve akong table sa. . ."

Bago pa matapos ang sasabihin ni Mommy ay pinutol ko na iyon, "I'm sorry pero busy ako.  Kung wala na kayong ibang sasabin pwede na siguro kayong umalis.  Sa totoo lang, hindi ako basta-basta nagpapasok dito ng walang appointment!" Sabi ko sa kanya.

"Talaga bang ganyan na katindi ang galit mo sa akin, ha Pamela?" Tanong nito sa akin, may halong pagsusumamo habang nakatitig ito sa akin. Umiwas ako ng tingin sa kanya dahil ayokong lumambot ang puso ko.  Sakto namang bumalik si Omeng bitbit ang mga reports na ipinakuha ko.  Nagbago ang mukha ni Mommy nang makita ito.  Kumunot ang nuo nito nang mapansin ang mga bitbit na folders ni Omeng, "Ano ito?  Dakila mo rin ba siyang alalay bukod sa pagiging boyfriend mo?"