Kabanata 4

Elco POV

Nandito na ako sa Villarama Street, Norzagaray, Bulacan. Nasa tapat na ako ng bahay nila Tita Susie. Ito ‘yung picture ng bahay na sinend ni Tita Susie kay Nanay Rosie para hindi ako maligaw.

“Ito po ang bayad,” sabi ko sa tricycle driver na sinakyan ko. Pagkabayad ko, binitbit ko na ang malaking backpack ko.

Huminto ako sa tapat ng gate nila at saka sumigaw. “Tao po!”

Dito sa gate ay may narinig akong mga yapak na parang tumakbo. Hindi ako puwedeng magkamali, galing ang mga yapak sa mismong loob ng bahay. Akala ko ay may nakarinig na sa akin kaya hindi ko na inulit ang pagtawag ko. Pero lumipas ang ilang minuto, wala, walang lumabas para pagbuksan ako ng gate o pinto.

“Tao po!” sigaw ko ulit.

“Uy, mukhang may bagong salta sa kalye namin ah!” biglang sabi ng isang lalaki. Paglingon ko, nakita ko ang isang lalaking puro tattoo ang braso at binti. Adik!

“Ah, oo, bagong salta ako. Magbabakasyon ako rito ng dalawang buwan,” sagot ko sa kaniya kasi mukhang gusto niya akong kausapin. “May kakilala ka ba sa bahay na ito? Wala kasing sumasagot?” tanong ko pa sa kaniya.

“Naku, baka nasa palengke sina Aling Susie at Mang Darwin. Si Dasha naman ay baka nasa work pa. Nasa flower shop pa siguro,” sagot niya kaya mukhang wala pa ngang tao sa loob.

Pero kasi, may narinig talaga akong mga yapak sa loob. Natakot tuloy ako. Naisip ko na baka may multo pa sa bahay na ito. Lumang-luma pa naman na ang bahay.

Lumapit sa akin ang lalaking iyon. “By the way, I’m Jasper, tattoo artist ako at kung gusto mong magpa-tattoo, malapit lang dito ang tattoo studio ko,” sabi niya. Tinanggap ko naman ang kamay niya at nakipag-shake hands.

“Tattoo artist ka pala. Kaya pala ang dami mong tattoo,” sabi ko.

Napangiwi ako. Napagkamalan ko pa siyang adik. Nahahawa na tuloy ako sa ugali nila Nanay Rosie at Tatay Julio. Sila kasi kapag nakakakita ng taong maraming tattoo ay adik na ang tingin nila.

Maya maya ay may humintong tricycle sa harap ng gate. “Oh, ayan na ata sina Aling Susie at Mang Darwin,” sabi ni Jasper. “Sige na, maiwan na kita. Hinatayin na lang kita sa studio ko kapag interesado kang magpa-tattoo,” sabi pa niya saka siya umalis.

“Oh, ikaw na ba ‘yan, Elco?” tanong ng isang ale na kamukhang-kamukha ng Nanay Rosie ko. Inagaw ko naman agad sa kaniya ang bayong niyang punong-puno ng pinamili sa palengke.

“Opo, Tita Susie, ako na nga po ito,” magalang kong sagot saka ko inabot ang kamay niya para magmano.

“Kaawan ka ng diyos, Elco. Napakaguwapo mo pala sa personal,” sabi ni Tita Susie, kaya nahiya ako bigla.

Kasunod niya ‘yung isang manong na tila si Tito Darwin na ata. Sunod akong nagmano sa kaniya.

“Kaawaan ka ng diyos, hijo,” sabi naman nito sa akin.

“Sandali, bakit ba nasa labas ka pa? Hindi ka pa ba pinagbubuksan ni Dasha ng pinto?” tanong ni Tita Susie habang nagtataka.

“Wala po kasing sumasagot. Kanina pa ako tumatawag dito sa labas ng gate pero walang lumabas. Mukhang wala po ata sa loob si Dasha,” sagot ko sa kaniya.

“Ang babaeng talagang iyon, nakalimutan atang darating ka ngayong hapon.” Sinuksok na ni Tita Susie ang susi sa padlock na nakalagay sa gate. Siya na ang nagbukas nito.

Pagpasok namin sa loob, binaba ko ang bayong sa may lamesa. Okay naman pala ang istura ng bahay sa loob. Maganda, nakaka-relax tignan kasi halatang matandang bahay na ito.

“Halika, hijo, ihahatid kita sa kuwarto mo. Sana lang ay nalinis na iyon ni Dasha, kundi, masasabunutan ko talaga siya mamaya,” sabi ni Tita Susie na tila stress na stress sa pinsan ko. Sumunod ako sa kaniya saka kami pumasok sa loob ng kuwarto ko. “Oh, malinis at mukhang mabango na pala ang kuwarto. Nakapagtataka naman. Nasaan si Dasha? Mukhang umuwi na siya kasi malinis na itong kuwarto mo,” sabi ni Tita Susie. Ngumuso-nguso pa siya sa paligid nung lumabas ulit ng kuwarto. “Saka, amoy ko ang pabango ni Dasha. Parang kakawisik lang niya. Amoy na amoy, e,” dagdag pa niya.

“Eh, baka po pagkalinis nitong kuwarto ay umalis agad kasi may iba pa po siyang lakad. Ang mahalaga po ay nalinis na po niya itong kuwarto,” sagot ko na lang para hindi na siya ma-stress pa.

“Tama ka. Mainam at nagawa pa rin niya ang inuutos ko. Sige na, magpahinga ka muna sa kuwarto mo. Ipaghahanda muna kita ng merienda at tiyak na gutom ka,” paalam niya sa akin.

Tumango ako at saka ko na sinara ang pinto. Binaba ko ang backpack ko sa kama at saka binuksan ang bintana. Napangiti ako nung matanaw ko ang magandang bundok sa malayo. Kitang-kita rin dito ang kalye ng Villarama at ang bahay ng mga kapitbahay. Maaliwalas ang hangin dito at mukhang mag-e-enjoy ako sa pagbabakasyon ng dalawang buwan.

Hindi na ako nagsayang ng oras. Nilabas ko na ang mga damit sa bag ko at nilagay ko na sa aparador na walang laman. Doon ko pinagsasabit ang mga damit ko. Inilabas ko na rin ang dala-dala kong laptop. Dito ako nanunuod ng movie tuwing gabi kaya hindi puwedeng ‘di ko ito kasama.

Bandang alas kuwatro nang may kumatok sa pinto.

“Pasok po,” sagot ko.

Bumukas ito at niluwa si Tita Susie. May bitbit siyang mainit na kape at umuusok-usok pa na pancit na sobrang bango.

“Wow, ang bango! Mukhang ang sarap,” sabi ko agad nung tignan ko si Tita Susie.

“Paborito ito ni Dasha. Nagluto ako kasi baka magustuhan mo rin,” sabi niya at saka binaba sa lamesa ang pancit at kape.

“Salamat po, Tita Susie. Ngayon palang po ay mukhang mag-e-enjoy na ako sa pagbabakasyon dito,” masaya kong wika sa kaniya. Kita ko tuloy na masayang-masaya rin si Tita Susie. Mainam naman at halos magkasing bait sina Tita Susie at ang Nanay Rosie ko. Tila talaga sila pinagbiyak na buko. Iisa ang hulma ng katawan at mukha. Parang kambal. Kahit nasa malayo si Nanay Rosie ay parang nasa malapit lang din dahil dito kay Tita Susie.

“Oh, sige na, kumain ka na. Marami pa kasi akong gagawin sa kusina,” paalam niya. Kinain ko na agad ang pancit. Nung tikman ko ito, napapikit ako sa sarap. Gets ko na agad si Dasha kung bakit favorite niya ito. Ito na rin ata ang pinaka-masarap na pancit na natikman ko sa buong buhay ko. Ang sarap, lalo pa itong pinasarap nung pinigaan ng calamansi. Nakadagdag sarap ang mga sahog na manok, kikiam, squid balls at mga gulay. Wala pa atang five minutes ay ubos ko na agad ang pancit.

Pagkatapos kong mag-merienda, lumabas na ako sa kuwarto para maglibot sa bahay. Pumunta ako sa sala. May malaki silang TV, tapos napansin kong marami ring electric fan. Dito ay hindi uso ang aircon, pero mahangin naman kaya malamig pa rin.

Pagtingin ko sa malaking picture frame sa may dingding, napatingin ako sa isang dalagang kasama nila Tita Susie at Tito Darwin.

‘Yan na ba si Dasha?

Napakunot ang noo ko.

Ang weird pero parang nakita ko na ang mukha niya. Napatitig tuloy akong mabuti sa picture.

Na-meet ko na ba siya dati sa Manila?

B-bakit parang…parang nakita ko na siya?