KABANATA 33

Mabuti na lang at wala si Mr. Rado nang bumalik siya ng opisina nito. Para siyang lutang hanggang sa makaupo sa harap ng laptop.

Pinilit niyang bumalik sa ginagawa kanina pero ang mukha ng dalawang naglalandian ang nakikita niya sa screen ng laptop.

Hindi pa siya nakakatagal sa pagkakaupo nang tumunog ang Avaya phone. Inalis muna niya ang bara sa lalamunan bago sagutin iyon. Iniisip niyang baka magpa-follow up na si Lany sa pinagawa nito sa kanya. Hindi pa naman siya nakakapangalahati do'n.

"Yazmin de Lara of Mr. Rado's office." Iyon agad ang bungad niya dahil sabi ni Lany kanina ay magpakilala agad siya at sabihin kung saang office para malaman agad ng nasa kabilang linya kung tama ba ang natawagan nila. Puro internal calls o within the office lang kasi ang tinatanggap na tawag ng Avaya niya. Si Lany naman ay nakakatanggap ng mga tawag both internal and external. Ito kasi ang kumakausap sa mga clients bago iyon pinapasa kay Mr. Rado.

"Come back and get the documents, Miss de Lara,"