CHAPTER 2

Bakit naman kasi napaglaruan siya ng tadhana? Ang nag-iisang lalaking crush niya simula ng high school ay anak pa ng girlfriend ng kanyang ama!... and worst, magiging step-brother niya!

Matagal na siyang inaawitan ng kanyang daddy na umuwi para siya naman ang tumulong sa negosyo, pero ayaw niya. Flight stewardess siya, pero sa ibang company siya nagtatrabaho imbes na sa company nila. Iyan lagi ang ikinagagalit ng kanyang ama kapag nagkakausap sila.

Hindi lang naman siya stewardess, marami siyang pinagkakaabalahan sa America, kaya hindi siya makakuwi ng basta-basta. Isa rin siyang modelo sa isang sikat na lingerie company.

Sinong mag-aakala na ang isang ugly duckling at nerd noong high school ay highest-paid model na ngayon sa America?

“Nikita, are you still there?” pukaw ng daddy niya.

“Pag-iisipan ko, Dad. I'll clear my schedule.”

“Anak… hindi ka ba naaawa sa akin? Simula nung naghiwalay kami ng mommy mo at naiwan ako dito sa Pilipinas. It’s been what, 5 years? Wala na ang mommy mo, at obligasyon mo naman sigurong magpakita sa akin bilang anak ko. I miss you too, My Nikita! Di ka ba naaawa sa daddy mo?” paawa nitong sabi.

'My Nikita' ang tawag nito kapag naglalambing sa kanya. Kapag narinig niya ang mga katagang iyon, pakiramdam niya ay 5 years old ulit siya. Alam na alam nito kung paano siya palambutin.

“Okay, okay, Dad… aayusin ko lang ang schedule ko para bisitahin ka diyan sa Pilipinas. Pero hindi ko maipapangakong magtatagal ako dahil andito na ang buhay ko sa America.”

“Pangako mo ba ‘yan, My baby Nikita?”

Humugot siya ng malalim na hininga sa kakulitan ng kanyang daddy. “Yes, Dad. I will visit you.”

“Thank you, anak!” Halata ang saya sa boses nito. “I'm sure your Tita Vivian will be happy to see you too. Matagal ka na niyang gustong makita nang personal. Sa mga magazine ka lang namin kasi nakikita. She is your big fan, anak.”

Napangiti siya. “Oo na, Dad. Uuwi na nga ako, di ba? Hindi mo na ako kailangang bolahin!”

“Hahaha… hindi kita binobola. Proud lang ako sa narating mo diyan sa America. Napakasikat mo na, anak, at pinagmamalaki ko na anak kita.”

Muntik na siyang maiyak. Sa totoo lang ay daddy’s girl talaga siya. Mas close pa nga siya sa kanyang daddy kaysa sa kanyang mommy. Pero ang daddy niya mismo ang nagdesisyon na sumama siya sa kanyang mommy sa America nung maghiwalay ang mga ito. Hindi siya nito matutukan nang maayos sa dami ng negosyo ng pamilya nila.

Kahit naghiwalay ang kanyang mga magulang, ang daddy pa rin niya ang patuloy na sumusuporta sa kanila sa America. Hindi na muling nag-asawa ang kanyang mommy, at nanatiling walang nobya ang kanyang daddy.

Pagkamatay lamang ng kanyang mommy naisipan ng kanyang daddy na pumasok sa isang relasyon, dahil na rin sa pangungulit niya. Ngunit hindi niya inaasahan na ang magiging nobya nito ay ang mismong mommy ni Kieran!

“Alam mo ba, anak” dagdag pa ng kanyang ama, “may anak din si Tita Vivian mo na kasing-edad mo. Si Kieran. I hope you’ll get along. He’s a nice guy… parang anak ko na rin siya.”

Parang may malamig na tubig na ibinuhos sa kanya.

Nice guy? Kung alam lang ng daddy niya… Kung alam lang nito kung paano siya tinukso, inasar, at ginulo ng lalaking iyon noon. Hindi alam ng kanyang daddy na matagal na niyang kilala si Kieran Del Toro

"Tito Wesley..."

Napasinghap siya nang marinig ang boses sa kabilang linya. Speaking of the devil! Biglang bumilis ang tibok ng kanyang puso. Hindi niya kailangang hulaan. Alam niya... Si Kieran.

“Iho… what brings you here?” Halata sa boses ng kanyang ama ang galak.

Parang may sariling radar ang katawan niya pagdating sa lalaking iyon, kahit sa boses lang, kahit sa presensya na hindi niya nakikita.

“I have to go, iha,” paalam ng kanyang ama. “Andito na si Kieran. May pag-uusapan pa kami tungkol sa kumpanya.”

Kumunot ang noo niya, sabay higpit ng hawak sa telepono. “S-sige, Dad… may gagawin din ako. See you soon.”

“See you soon, my Nikita. I love you.”

Nang marinig niya iyon,  hindi niya napigilan ang paghapdi ng kanyang mga mata.

“I love you too, Dad…” pabulong niyang sagot, bago tuluyang pinatay ang tawag.

Biglang naging napakatahimik ng paligid. At sa katahimikang iyon, isang katotohanan ang unti-unting luminaw sa kanya...

Ang pagbabalik niya sa Pilipinas ay hindi lang simpleng pagbisita. Ito ay pagbabalik sa nakaraan. At sa pagkakataong ito, hindi na siya ang dating Nikita na kayang apakan, pagtawanan, at balewalain.

Pero ang tanong, kaya ba niyang harapin si Kieran Del Toro bilang kanyang magiging stepbrother? …o muli na naman siyang mahuhulog?

Napahiga siya sa kama sa kanyang apartment nang ibaba niya ang telepono. Hindi siya makapaniwala na ganito pa rin ang epekto ni Kieran sa kanya. He is her first and only crush… at malamang ay first love na rin.

Ganoon siguro talaga kapag first love... mahirap kalimutan. Idagdag pa na ito rin ang first kiss niya. Napangiti siya nang maalala kung bakit niya ito naging first kiss....