CHAPTER 4

ALANA POV

Alas-syete pa lang ng umaga, basang-basa na ng pawis ang likod ko. Hawak ko ang walis tingting habang kunwaring abala sa paglilinis ng service entrance malapit sa loading dock ng mansion. Dito dumadaan ang mga delivery trucks para sa mga maintenance supplies at catering ng pamilya Suarez.

Medyo masakit pa ang likod ko dahil sa puyat kagabi sa opisina ni Sir Clark, pero walang oras para mag-inarte. Ito ang pinakamagandang timing para makuha ang mga gate pass at delivery logs na kailangan namin.

"Alana, neng! Paki-abot naman nung basahan doon sa tabi ng toolbox," sigaw ni Kuya Dante habang nakadungaw sa ilalim ng hood ng isang lumang service van.

"Ito po, Kuya," sagot ko sabay abot ng sako. Lumapit ako ng bahagya, tinitingnan ang paligid. May dalawang driver mula sa logistics wing na kasalukuyang nagkakape sa bench, bitbit ang mga clipboard nila.

"Naku, Dante, balita ko mainit daw ang ulo ni Sir Clark ngayon sa head office," sabi nung isang driver na may bigote, sabay higop ng kape mula sa styrofoam cup. "May audit daw na nagaganap sa bodega sa Manila. Lahat ng gate pass namin, pinapabura at pinapa-recheck."

"Totoo ba, Nelson?" sagot ni Kuya Dante habang nagpupunas ng kamay na may grasa. "Eh paano yung mga kargamento na galing sa  V-Logistics Partner? Di ba sila ang may hawak ng special clearance tuwing weekend?"

Muntik ko nang mabitawan ang walis ko. V-Logistics Partner. Iyon ang eksaktong kumpanya na nakita ko sa ledger kagabi. Swerte ko naman, hindi ko na kailangang maghanap ng kung anu-anong rason para magtanong. Ang mga tao na mismo ang naglalatag ng chismis.

"Iyon nga ang problema, eh," sagot ni Nelson, sabay baba ng boses na parang may natatakot na makarinig. "Sabi ni Ma'am Rochelle, huwag daw muna kaming magpapasok ng kahit anong truck mula doon habang nandoon si Sir Clark sa head office. Safe-keeping daw muna ang mga logbook ng nakaraang tatlong buwan."

"Bakit daw?" tanong ni Kuya Dante.

"Ewan ko. Ang utos lang sa amin, i-surrender yung mga carbon copy ng gate pass sa opisina niya sa taas bago mag-alas-dose ngayon," sabi ni Nelson sabay tayo. "O sige na, Dante. Mauna na kami. Baka maunahan pa kami ng traffic sa South Superhighway."

Nang maglakad ang dalawang driver paalis para sumakay sa truck nila, mabilis kong tinapos ang pagwawalis. Lumapit ako kay Kuya Dante na kasalukuyang inaayos ang makina ng van.

"Kuya Dante, may itatanong lang po sana ako," maingat kong panimula.

"Ano 'yon, Alana?"

"Saan po ba dinadala yung mga logbook na sinasabi ni Nelson? Kasi po, inutusan ako ni Tita Baby kanina na maglinis ng mga lumang folders sa mezzanine sa logistics office mamaya," pagsisinungaling ko. Alam kong walang ganoong utos si Tita Baby, pero kailangan kong malaman ang lokasyon ng mga dokumento.

"Ah, doon sa tambakan sa likod ng admin building ng bodega sa Makati," sagot ni Kuya Dante nang walang kahinala-hinala. "Pero wag kang basta-basta papasok doon nang walang permit mula kay Ma'am Rochelle. Strict doon ngayon dahil may gulo sa mga numero."

"Sige po, salamat po!" sabi ko sabay ngiti.

Pagpasok ko sa kusina para ibalik ang walis, nakita ko si Tita Baby na abalang-abala sa pag-aayos ng mga lunchbox. "Alana, salubungin mo nga si Jeric sa labas. Kadarating lang, may dalang mga bagong papeles para kay Sir Clark. Iakyat mo agad sa East Wing, bilisan mo."

"Opo, Tita," sagot ko.

Sinalubong ko si Jeric sa tapat ng main entrance. Mukha pa rin siyang hindi natulog mula kagabi. Iniabot niya sa akin ang isang makapal na brown envelope na may selyo ng kumpanya.

"Ibigay mo agad ito kay Sir Clark, Alana. Sobrang importante niyan," bulong ni Jeric, tila ninenerbyos bago muling sumakay sa sasakyan niya para bumalik sa head office.

Mabilis akong umakyat sa second floor. Pagdating ko sa tapat ng opisina, kumatok ako ng tatlong beses bago binuksan ang pinto.

Nadatnan ko si Sir Clark na nakatayo malapit sa bintana, nakatalikod sa akin, habang may kausap sa telepono. Maluwag na naman ang kanyang necktie at bakas ang galit sa boses niya.

"I don't care about your excuses, Rochelle. I want the full inventory of V-Logistics on my desk by Monday. No extensions," mariin niyang sabi bago ibaba ang telepono sa ibabaw ng mesa nang may kalakasan.

Humarap siya sa akin, bahagyang nagulat nang makita ako. Inilapag ko ang brown envelope sa harap niya.

"Galing po kay Jeric, Sir," sabi ko, lumapit ako ng isang hakbang para mas humina ang boses ko. "At may nalaman ako sa labas mula sa mga driver. Pinapabura at pinapatago ni Rochelle ang lahat ng gate pass at logbook ng V-Logistics para sa nakaraang tatlong buwan. Dadalhin daw ang mga kopya sa opisina niya bago mag-alas-dose ngayon."

Naningkit ang mga mata ni Clark, ang kamao niya ay dahan-dahang humigpit sa gilid ng kanyang mesa. "So, she's trying to destroy the evidence before the internal audit begins tomorrow."

"Mukhang ganoon na nga, Sir," sagot ko, diretso ang tingin sa kanya. "Kung gusto nating makuha ang mga orihinal na dokumento, kailangan nating maunahan ang mga tao niya sa bodega sa Makati."

Tinitigan ako ni Clark, tila may mabilis na planong nabubuo sa kanyang isip. Iniabot niya sa akin ang isang kulay itim na access card mula sa kanyang bulsa.

"Magpalit ka ng damit, Alana. Sasama ka sa akin sa head office ngayon," utos niya habang kinukuha ang kanyang suit jacket mula sa pagkakasabit.