CHAPTER 4

AVERY'S POV

“Anak mo ba yan Nora? Apaka ganda naman pala ng anak mo! Ang kinis at parang labanos sa kaputian!” bulalas ng isang babaeng bumili saamin ng banana q ni Mama. Araw ng sabado ngayon at wala akong pasok. Pag ganitong mga araw ay tinutulungan ko si Mama mag lako ng mga paninda niyang miryenda.

“Oo anak ko nga yan!” proud na sabi ni Mama.

Yung ngiti ko naman ay abot na yata hanggang tutuli ko. Ay mali, tenga pala! Hehe.. Ito talaga ang gusto ko kapag sumasama ako kay Mama mag lako ng paninda.. Yung reaction kasi ng mga bumibili saamin ay daig pa nila ang nakakita ng artista.. Relax lang kayo, ako lang toh.. Haha!

“Nay Nora, baka naman pwede nyo akong ipakilala dyan sa anak nyong maganda.” turan ng binatang tambay sa hinintuan naming tindahan.

“Ay naku Betong, nag aaral pa yang anak ko.” turan ni Mama na inilapag sa harapan nila ang basket naming dala.

“Papakyawin ko na yang paninda mo Nay, payagan mo lang akong ligawan ang anak mo.” pangungulit pa niya.

“Naku, Betong, hindi mo yata nakikilala ang ama niyan. Anak yan ni Ron, yung basagulero. Gusto mo yatang mahabol ng itak.” turan ng lalaki ring nakatambay na may edad na. Sa hitsura nito ay mukhang mas matanda pa ito sa tatay ko.

“Manong Fidel, handa kong harapin ang tatay niya, maipag laban ko lang ang pag ibig ko sa magandang binibining ito!” anito..

Nyeta!! Feeling ko ang laki-laki na ng ulo ko.. Hay! Hirap talagang maging maganda!

“Tumigil ka na Betong. Ubusin mo na lang itong paninda ko. May nobyo na itong anak ko, si Simon, yung anak ng may ari ng University na pinapasukan niya.” pagmamalaki pa ni Mama.

Ito talaga si Mama mas delulu pa saakin! Hehe.. Alam kasi ni Mama ang tungkol sa crush kong si Simon at napaka supportive naman talaga ni Mama. Yon nga lang diko pa naman talaga boyfi itong si Simon.. Advance lang talaga si Mama mag isip.

“Ah, ganon po ba? Eh, sige ho, saka na ho ako bibili kapag single na si Ms. Beautiful.” anito na kinindatan pa ako.

“Naku anak, swerte talaga pag kasama kita maglako nakakapaubos agad ako ng paninda.” tuwang tuwang sabi ni Mama habang patuloy kami sa paglalakad sa mga eskenita.

“Ate Nora, pabili..” tawag kay mama ng isang babae na makapal ang make up at namumula ang labi. Mataas ang pusod ng mahaba nitong buhok habang halos lumuwa na ang cleavage nito sa spaghetti strap nitong damit na kulay nude. Ang maong short naman niya ay abot na sa kaniyang singit. Pek**k short ba ang tawag sa ganon?

“Catheryn, anong sayo?” bati ni Mama sakanya.

“Tatlong palitaw po tsaka isang turon at dalawang banana q.” aniya na napatingin saakin. Mapanuri ang tingin niya saka ako sinuyod mula ulo hanggang paa. Tipid ko naman siyang nginitian.

“Sino iyang kasama mo, Ate Nora?” tukoy niya saakin.

Ngumiti naman si Mama. “Anak ko yan, Catheryn.” proud niyang tugon.

“Maganda ang anak mo ha!” aniya na ikinapalakpak na naman ng tenga ko!

“Syempre naman!” masayang sagot ni Mama.

“Ilang taon ka na?” baling niya saakin.

“20 years old po.” nahihiya kong sagot. Kung titingnan siya, sapalagay ko nasa 30 years old na siya.

Napatango tango siya habang sinasapa ang bubble gum sa bibig niya.

“Hmm, baka gusto mong mag trabaho sa bar na pinapasukan ko. Hiring kami ng waitress.” alok niya saakin.

“Naku, Catheryn, walang experience iyang anak ko sa ganiyang klase ng trabaho.” kontra ni Mama.

“Wag kang mag alala ate Nora, hindi naman low class yung bar na pinapasukan ko. Ang mga customer namin doon ay mayayamang tao. Tsaka waitress lang naman ang iaalok ko sakanyang trabaho. Mag seserve lang siya ng mga inumin na inoorder ng mga customers. Pwede naman siyang tumanggi kapag ayaw niyang magpa table. Alam mo ate Nora, maganda itong opportunity na inaalok ko sakaniya. Malaki magpasahod ang boss namin at higit sa lahat malalaki mag bigay ng tips ang mga customer namin. Chance nyo na ito para makaahon sa kahirapan. Malay mo, dahil sa angking ganda ng anak mo, matipuhan siya ng bilyonaryo? Oh, de instant bilyonaryo na kayo.”

Hinawakan ako ni Mama sa braso ko. “Mas gugustohin ko pang kumain ng lupa, Catheryn kesa sa ibugaw ko ang anak ko.” ani Mama na buo ang paninindigang tumitig sa mga mata nung Catheryn.

Napaangat naman ang sulok ng labi niya at saka muling nginuya ang bubble gum sa bibig niya. May bagay siyang dinukot sa pagitan ng malulusog niyang dibdib saka tumingin saakin at ngumiti. “Heto ang calling card ko. Sakaling mag bago ang isip ninyong mag ina, tawagan nyo lang ako. Hanggat maaari mag isip-isip ka na agad ineng. Sayang baka maunahan ka ng iba.” aniya pa saka binayaran ang kinuha kay Mama na miryenda.

“Sige po, ate Catherine, salamat po sa alok ninyo. Pag iispan ko po muna.” sagot ko.

“Anak, wag mong sabihin na may balak kang tanggapin ang alok ni Catherine?” untag saakin ni Mama ng tahimik akong nakasunod sakaniya palabas ng eskenita.

“Iniisip ko ngang Mabuti Mama, kung tatanggapin ko ba ang alok niya.”

Tumingin saakin si Mama ng may pag aalala. “Pero anak, yung si Catherine, para yong Mamasang.. Nag bubugaw iyon ng mga babae sa bar! Kahit mahirap tayo anak, ayokong marumihan ang imahe mo. Pera lang iyan anak. Mas mahalaga saakin ang dangal mo.”

“Pero sabi naman po niya, waitress lang po ang magiging trabaho ko don.. Iniisip ko po kasi yung malaking kikitain ko don. Yung kinikita ko kasi sa fastfood ay kulang pang suporta sa pangangailangan natin.” paliwanag ko.

Hinila ako ni Mama sa gilid ng isang plant box at doon kami naupo. Ipinatong niya sa tabi niya ang basket niyang dala at hinawakan niya ang dalawa kong mga kamay. Tinitigan ako ni Mama sa mga mata ko.

“Anak, konting panahon na lang makakaraos na tayo.” aniya.

“Pero Mama, halos isang taon pa ang bubunuin ko bago maka graduate. Matagal pa yon. Paano kung map***y ka na ni papa sa bugb*g bago pa ako makapag tapos ng pag-aaral? Ma, nagsisikap ako makapag tapos kasi lahat ng ito para saiyo. Mawawalan ng saysay ang mga pangarap ko kung wala ka na.” naluluha kong turan.

Hinaplos ni Mama ang mukha ko. Nakangiti siya kahit punong puno ng lungkot ang mga mata niya.

“Anak, wag mo kong alalahanin. Matanda na ako. Ikaw, nagsisimula pa lang ang yugto ng buhay mo. Lahat ng ito, ginagawa ko para saiyo. Mangarap ka hindi para saakin kundi para sa sarili mo. Ayokong danasin mo ang buhay na dinadanas ko. Gusto kong makapag tapos ka ng pag aaral at magkaroon ng magandang trabaho, para oras na makatagpo ka ng lalaking kagaya ng ama mo, may lakas ka ng loob na bumitaw. Hindi kagaya ko na takot na takot iwanan ang papa mo dahil inaalala ko na hindi ko kayang itaguyod kayo ng ako lang mag isa kasi wala akong pinag-aralan. Ni hindi ako nakatapos ng elementarya.” malungkot na turan ni Mama.

Niyakap ko si Mama. “Mama, kahit hindi ka nakapag tapos ng pag aaral, napaka swerte ko na ikaw ang naging Mama ko. Mapag mahal at masipag. Lahat ginagawa mo para saaming magkakapatid.” sagot ko sakaniya.

Maaga kaming nakauwi ni Mama sa bahay dahil nakapaubos kami ngayon ng paninda. Dumiretso kagad kami sa tindahan ni Aling Mina para bumili ng Bigas. Kumita kami ng dalawang daang piso, labas na ang kapital ni Mama na five hundred peso. Kita ko sa mata ni Mama ang mumunting saya. Yung puso ko parang pinipiga habang pinagmamasdan si Mama. Masaya na siya sa ganon. Napakababaw ng kaligayahan ni Mama.

Kapag nakikita ko ang hitsura ng Mama ko, sobrang payat at haggard, mas lalong tumitindi ang pagnanais kong bigyan siya ng magandang buhay. Mahal na mahal ko si Mama. Lahat gagawin ko para mapalasap sakaniya yung masagang buhay na gusto kong maranasan niya.

“Ate Mina, pabili nga po ng isang kilong bigas at tatlong meatloaf.” ani Mama sa masayang tinig.

“Aba mukhang masaya ka yata ngayon, Nora?”

“Eh, kahit papano kasi ay nakapausbos ako ngayon ng tinda ko dahil kasama ko itong anak ko sa paglako kanina.”

“Ah, ganon ba? Oh, nakapaubos ka pala ngayon. Baka naman pwedeng magbawas bawas na kayo ng utang dito saakin?” aniya na nakataas ang isang kilay.

Medyo nakaramdam ako ng inis kay Aling Mina.

“Ate Mina, diba po sabi ko naman sainyo na sa akinse na lang po, babayaran ko po ng buo lahat ng utang namin diyan. Maghintay lang po sana kayo.” hindi ko na naitago ang nararamdaman kong inis sa boses ko.

Namewang siya at lalong tumaas ang kilay.

“Tingnan mo nga naman ang buhay! Kayo na nga itong pinautang, kayo pa itong galit pag sinisingil!” galit niyang turan.

“Eh, kasi naman po parang hindi kayo marunong makaintindi. Dalawang daan lang po kasi ang kinita ni Mama. Ito nga ho at ipambibili namin sainyo ng delata at bigas ngayon.”

“At ako pa talaga ang hindi makaintindi ha? Hayaan mo at huling utang ninyo na ito dito! Hindi na kayo makakaulit pa, tandaan nyo yan Avery!” aniya sa mataas na tono.

Sasagot pa sana ako pero pinigilan ako ni Mama.

Umiling iling siya saakin at humarap kay aling Mina.

“Ate Mina, pasensya ka na sa nasabi ng anak ko. Pasensya ka na talaga kasi yung kinita namin ay sakto lang talaga pambili namin ng pagkain ngayon.” pagpapakumbaba ni Mama.

“Ay ewan ko sainyo! Mga wala kayong utang na loob!” anito saka pagalit na ibinagsak ang sukli ni Mama.

Ang masayang mukha ni Mama kanina ay napalitan na naman ng lungkot.

Ayoko na ng ganito. Ayoko ng nakikita siyang parang kawawa.. Ayoko ng kinakawawa ng iba ang Mama ko. Porque ba ganito lang kami? Mag babayad naman kami ng utang eh. Bakit hindi siya makaintindi?

Naikuyom ko ang mga kamay ko. Desidido na ako. Kakagatin ko na ang alok ni Ate Catherine.

Ayoko na ng ganitong buhay.