Chapter 5: Self-imposed Overtime

“Namimihasa na ang mga beastmen. At mukhang napansin nila kung gaano na lang ang pagkakaiba ng mistress nila ngayon sa mistress nila noon.” inanalyze ni Andrea kung ano ba dapat ang next move niya.

Nung una, kusa siyang nagbigay ng dugo kay Hermes sa paghilom ng sugat ni Triton. Tapos, nakipag-deal sa kanya si Gin para makakuha ng dugo sa pagluto. At ngayon naman, barter para sa mga bolang asin. 

Nagkakaroon na ng micro-economy dito sa bagong mundo ni Andrea. 

“OK lang. Basta ba ‘di muna umabot sa sampung patak ng dugo ang mabigay ko sa kanya… at baka maunahan ako ng mga ‘to. ‘Di pwedeng mabawi ang mga kontrata ko sa kanila na di ko pa nakikita ang ama ni Freya.”

Hindi pinakita ni Andrea ang takot niya kay Triton. Muli niyang hinawakan ang kanyang pendant at binuksan muli ang kanyang sugat sa darili gamit nito. Piniga ni Andrea ang kanyang daliri para may lumabas na isang malaking patak ng dugo. Dahan-dahan siyang lumapit kay Triton at nilagay ang patak sa scorpion seal sa may dibdib ng merman. Umilaw ang seal at nabawasan ng konting kulay. Siyam na patak na lang, mawawala na si Triton sa kanyang kontrol.

“Isang patak para sa mga bola ng asin. Patas at tapat na kalakalan.” matapang na sinabi ni Andrea kay Triton. Tinatago ni Andrea ang kanyang takot sa kanya, bilang alam niya kung gaano siya kalakas ‘pag nawala na ang seal ng kontrata. “Maraming salamat, Triton.” pahabol ng dalaga.

Inabot ni Triton sa kanya ang mga bolang asin. ‘Di napansin ni Andrea na nahawakan niya ang mga to gamit ang sugatan niyang daliri. 

“Aaa!” hikbi ni Andrea. Nagulat ang dalawang beastmen at ngayon lang nila narinig ang iyak ng nagmamalupit sa kanila. Napangiti si Triton at sa wakas, nakatikim na rin ng sakit ang mala-demonyong mistress. 

Hinintay ni Gin na magalit siya sa kanila… pero ni masamang tingin, wala.

Madaling kinuha ni Andrea ang mga bola at nilapat ito sa lalagyan. Tinitimpi niya ang sakit at luhaan na ang mga mata niya. Pero hindi niya ‘to pinaalam sa dalawa. Habang nag-aayos ng mga gamit, hinawakan niya ang kanyang pendant para linisin ang dugo. Sa paghimas ng pendant, biglang dumilim ang paligid.

Bigla siyang napadpad sa isang kwarto. Foggy, parang Tagaytay lang. Sa ngayon, wala itong laman, pero bumangga sa isip niya na puwede itong paglagyan ng mga gamit.

“Aba, para ‘tong bulsa ni Doraemon ah.” excited na naisip ni Andrea. “Sa wakas, may magic na rin ako! ‘Di na lugi kahit paano.” 

Inimagine lang ni Andrea, nakabalik na siya sa kuweba. Inutusan niya si Gin na dalhin na si Triton sa kanilang kweba nang makapag-pahinga na ang lahat para sa paglalakbay kinabukasan.

“Time to pack!” 

Dahil sa bagong nadiskubreng magic ng kanyang kwintas, nakapag-impake si Andrea ng mga gamit galing sa kuweba – kahit mga items na di naman kailangan sa paglalakbay. Mga balat at balahibo ng mga hayop, mga pinggan, mga iba’t ibang primitibong kasangkapan… pati na rin konting mga bolang asin. Inisip niya, at least may pwede siyang mapaglagyan ng mga importanteng gamit at hindi siya mapapagod kaka-bitbit. Habang nag-iimpake, nangarap din siyang sana nagkaroon na ng ganitong teknolohiya sa mundong pinanggalingan niya. 

Nagtira siya ng mga ibang gamit sa kuweba para hindi siya mapaghalataan. Hindi niya kayang ibunyag sa mga beastmen na may special power na rin siya. Kahit na anong bait na niya, sigurado pa rin siyang may malaking “target” sa kaniyang likod para sa mga beastmen. 

Basta ba matupad niya ang planong makita ang ama ni Freya para may high-level beastman na magtatanggol sa kanya. 

Sa mundo ng mga beastman, may iba’t ibang levels ng power. Ang ama ni Freya, si Vali, ay isa sa mga nasa pangalawang baitang ng lakas. Ibig sabihin, mas malakas siya sa mga ka-kontrata niyang beastmen. At least yun yung alam niya. 

Binibisita na ng antok si Andrea. Inisa-isa niya ang logistics, supplies, route, at iba pa para sa paglakbay nila. Ginamitan niya ng SWOT analysis ang bawat kakontrata niya.

“Para kay Lev: Strengths: well, malakas siya. Siya ang fighter ng grupo. Weakness: hindi ko pa alam. Opportunities: kung may magtangka sa kin na beastman, puwedeng idefend niya ‘ko. Threats: puwedeng patayin niya ko.”

“Kay Altair naman. Huh… wala pa kong alam sa kanya. Bukod sa pogi siya and kamukha ng fave K-drama actor ko. Haha. Siguro siya ang puwede kong pambato sa mga diplomatic na usapan? Mukhang may pinag-aralan si kuya.”

“Si Gin. Strengths: may sense of humor. Weakness: minsan uto-uto. Or baka pabebe lang? Opportunities: mukhang siya ang puwede kong kaibiganin para maka-espiya sa ibang mga beastmen. Threats: ay… baka pala siya ang espiya para sa mga beastmen. Sa kanilang lima, siya ang pinaka-magaan ang loob ko. May gayuma ba yung barbeque kanina?”

“Si Hermes naman. Napaka-mysterious. For sure, ang strength niya ay ang pagiging healer niya... pero hanggang 9 times na lang ko puwedeng mag-utos sa kanya ng ganun. Weakness: hindi ko pa alam. Opportunities and Threats… masyado pang maaga para malaman. Kailangan ko pa makasalamuha ang mga ‘to.”

“Huli naman si Triton. Paano ko ba siya mapapakinabangan eh kailangan pa namin siyang bitbitin habang nagtatravel? Strengths: Gumagawa ng asin. Magaling lumangoy. Weakness: ‘di makagalaw sa lupa. Opportunities: sa naaalala ko, mas malakas pa siya kay Lev. Baka puwede kong magamit ang merman magic niya. Threats: mukhang siya ang pinaka-matindi ang galit sa akin… ay kay Mistress Freya pala.”

Napailing si Andrea nang narealize niyang lahat sila, galit na galit pa rin sa kanya. Ang tanong – kailangan niya bang ma-convert ang mga yun para ‘di siya saktan? Extra effort pa para sa kanya. At ano na lang ang gagawin ni Andrea ‘pag umiral na yung “carnal desires” ng mga beastmen? Kapag nalagyan na sila ng kontrata, naghahanap na ng aksyon yung mga katawan nila. 

“Hay nako. Hindi. Ako. Ready.” bulong ni Andrea sa kanyang sarili. Unti-unti na siyang nakakatulog. 

Hindi niya nahalata, pero may nakapasok sa kuweba. Matangkad. Misteryoso. Pinulupot nito ang kamay sa leeg ni Andrea.