Chapter 249

Margaux

Dahan-dahan kong iminulat ang aking mga mata, parang sa pelikula, at ang unang bumungad sa akin ay ang gwapo at panatag na mukha ni Draco. Nakangiti siya, para bang kanina pa ako hinihintay magising. Para akong nalunod sa titig niya na matamis, puno ng pagmamahal, at tila ba nagpapasalamat na muli akong bumalik sa kanyang mundo.

Bago pa man iyon, bahagya ko nang naririnig ang mga boses sa paligid, malumanay ngunit masigla, kaya hindi na ako nagtaka nang isa-isang sumilip ang mga mukha ng mga mahal ko sa buhay. Parang panaginip na naging totoo.

“How are you feeling, Sugar?” tanong ni Draco habang hinawakan ang kamay ko at marahang hinalikan iyon. Naramdaman ko ang init ng kanyang palad na kanina lang habang nasa delivery room ako ay damang-dama ko.

Ngumiti ako, kasunod ang pag-angat ng aking kamay papunta sa kanyang pisngi. Kinulong ko ito sa aking palad, sabik na sabik sa presensya niya. Ewan ko ba, natulog lang naman ako ng ilang oras, pero parang ilang taon kaming nagkalayo.