Kabanata 7

Tinikom ni Monica ang labi pagkatapos ay ngumiti nang matamis, puno ng kasiyahan ang puso niya. Tuluyan niyang ibinagsak ang katawan sa bisig ni Shawn at inangat ang makinis na mukha para tingnan ito.

“Alam ko naman na hindi mo ako kayang tiisin. Hindi mo ako kayang iwanan,” banayad niyang bulong.

Si Shawn Velasco ang pinakamayamang lalaki sa Cavite. Gwapo at matikas. Higit sa lahat, makapangyarihan at kayang yumanig ng mundo sa isang iglap kung gugustuhin niya. Sa madaling salita, siya ang kumakatawan sa lahat ng pantasya ni Monica pagdating sa isang lalaki.

Pero tatlong taon na ang nakakalipas nang masangkot si Shawn sa isang aksidente at na-coma. Idineklara ng mga doktor na hindi na ito muling magigising kaya nagduda siya noon. Hindi alam ni Monica kung paano niya ilalaan ang pinakamagandang taon ng buhay niya para sa isang lalaking ganoon ang kalagayan.

Kaya tumakas siya.

Walang nag-akala na si Maxine ang papalit sa pwestong iniwan niya. At sa loob lamang ng tatlong taon, nagising si Shawn.

Hanggang ngayon, hindi pa rin alam ni Monica kung paano ‘yon nangyari. Mismong ang mga batikang doktor na tumitingin kay Shawn ay tinawag itong isang ‘medical miracle’.

Kaya bumalik ulit si Monica dahil alam niyang mahal pa rin siya ni Shawn at kailanman ay hindi siya nito kayang bitawan.

Tinitigan ni Shawn ang babae. “Kung hindi dahil sa nangyari noon, sa palagay mo ba ay kaya pa kitang mahalin nang ganito?”

Sa pagbanggit nito ng ‘noon’, nanigas si Monica at nagkaroon ng bakas ng guilt sa kanyang mga mata. Agad niyang iniba ang usapan. “Magkatabi ba kayong matulog ni Maxine?”

Muling ibinaling ni Shawn ang tingin sa kanya. “Kung hindi kami magkatabing matulog, ikaw ba ang dapat kong katabi?”

Alam na ni Monica ang sagot—hindi pa. Hindi pa pwede dahil labag iyon sa batas. Sinadya lang niyang itanong iyon at sinakyan lang ito ni Shawn kaya binigyan siya nito ng isang mapaglarong sagot.

Gustong-gusto ni Monica ang ganitong ugali ni Shawn—para sa kanya, isang kaakit-akit na kombinasyon iyon ng pagiging seryoso at pagiging mapanukso. Sa ilang salita lang, napapula nito ang pisngi niya. Ang malamig at tahimik na lalaking gaya ni Shawn ay ang mga tipo ng lalaking nais niyang tuklasin kung anong klase ng apoy ang nakatago sa ilalim ng kontrol nito.

Biglang gumalaw si Monica, inikot ang katawan at umupo sa kandungan ni Shawn. Sa ganoong paraan, nakayakap siya sa leeg nito at saka inilapit ang mga pulang labi para bumulong ng napakalambing.

“Gusto mo ba akong tabihan?”

Mabilis na itinaas ni Mike ang divider sa pagitan nila. Matagal na siyang nagtatrabaho sa boss niya kaya alam na niya ang gagawin.

Habang si Shawn ay tahimik lang na nakatitig sa babae. Provocative ang suot nito, isang pulang spaghetti-strapped na damit. Habang nakakandong si Monica sa kanya, bahagyang umangat ang laylayan ng palda at nabunyag ang mahaba at makinis nitong mga binti na nakapulupot sa pantalon ni Shawn.

Kaakit-akit at mapang-akit.

Hinigpitan lalo ni Monica ang pagkakapulupot sa bewang ng lalaki.

“Sige na, sabihin mo na. Gusto mo ba akong katabi sa pagtulog?”

Isang oo lang mula kay Shawn at handang ibigay ni Monica ang lahat.

Hindi naman pinanganak kahapon si Shawn. Alam niya kung ano ang gustong mangyari ni Monica. Pero may nangyari, biglang sumagi sa isipan niya ang imahe ni Maxine sa bar kanina. Ang mga binti nitong perpekto ang hugis, makinis at malambot. Naalala niya rin nang tanungin siya nito kung kaninong binti ang mas gusto niya—ang kanya ba o ang kay Monica. Hindi niya malaman kung bakit, pero si Maxine ang sumagi sa isip niya ngayon.

Naalala din niya ang paraan nang pag-angat nito ng binti, ang itim na high-heels nito habang umiikot sa bukong-bukong—kung paanong dumulas ang daliri nito sa paa sa kahabaan ng kanyang hita at nagtanong kung ang mga binti ba ni Monica ay pumupulupot din sa bewang niya.

Hinawi ni Shawn ang mga kamay ni Monica mula sa leeg niya. “Hindi pa ako hiwalay.”

Natigilan si Monica at sinabi, “At ano naman ngayon?”

“Hindi ako mangangaliwa habang may asawa pa ako,” malamig na sagot ng lalaki.

Tumahimik si Monica. Biglang naglaho ang tensyon sa paligid. Tinapos na ni Shawn ang isyung iyon.

Kahit na may bahid ng pagkabigo, bumaba pa rin si Monica mula sa kandungan ni Shawn nang may kumpyansa. May pride pa rin siya—hindi siya ang tipo ng babaeng ipipilit ang sarili. Hindi niya ipipilit na ibigay ang sarili nang buo kung hindi rin siya tunay na ninanais ng lalaki.

“Shawn, kailan mo ba balak na hiwalayan si Maxine?” malamig niyang tanong.

Itinuon ni Shawn ang tingin sa bintana. Sa totoo lang, mas gugustuhin niyang si Maxine mismo ang maghain ng diborsyo kahit na buo na ang pasya niyang hiwalayan ito.

“Malapit na,” tugon niya sa malamig na boses.

****

Samantala, pag-uwi nina Maxine at Althea sa apartment nila, agad na binagsak ni Maxine ang katawan sa kama na parang pagod na pagod siya para sa kaganapan ng gabing iyon.

Simula bukas, babalik na ulit sa normal ang buhay niya.

Hinanap niya ang cellphone niya at binuksan ang messenger niya. May dalawa siyang account. Sa loob ng tatlong taon, ginamit niya ang Mrs. Maxine Velasco, pero ngayon, opisyal na niyang isasantabi ang katauhang iyon.

Nag-log in siya sa isa pa niyang account. Pagbukas niya, agad nagliwanag ang group chat na may may group name na ‘Loving Family’, at may mga mensahe doon.

Iyon ang pinindot ni Maxine.

Kuya 1:

Aba, ang bunso naming kapatid ay online na ulit!

Kuya 2:

Welcome home, little sister!

Kuya 3:

Yakapin ang bunso!

Lahat sila ay nagpadala ng mga virtual bouquets of flowers bilang pagsalubong kay Maxine.

Kuya 1:

Tatlong taon ka ring tumakas dahil may lalaki kang inibig nang husto. Iniwan mo si Lolo! Sulit ba, ha?

Maxine:

Nope, hindi sulit.

Kuya 2:

Mukhang nabigo ka sa pag-ibig, ha!

Kuya 3:

Sa palagay ko, hindi mo kinayang kontrolin at baguhin ang lalaking ‘yon.

Kuya 1:

Tama na ang pang-aasar niyo sa kanya! Sabihin na lang natin na ito ay isang trial of love. Pero sorry, bunso, ang hirap talagang pigilan!

Dahil sa pambubuska nito sa kanya, gusto na niyang sipain ang mga lalaki palabas ng group chat na iyon. Sa inis niya, binago niya ang pangalan ng group chat mula sa Loving Family sa Annoying Family.

Pagkatapos ng ginawa niya, naging seryoso na ang isa sa kanila, si Bernard.

Kuya 3:

Bunso, oras na para bumalik ka. Puno na ang schedule ng operasyon ko pero may naka-schedule akong isang komplikadong heart surgery para sa ‘yo bukas sa ospital.

Nagpadala si Maxine ng okay na emoji.

Pag-exit niya sa group chat, napansin niyang may isa pang friend request—galing iyon kay Shawn.

‘Kalokohan,’ bulong ni Maxine. Tatlong taon siyang nag-message gamit ang isa niyang account bilang Mrs. Velasco pero ni minsan hindi siya ni-replayan ni Shawn.

Ngayon na gamit niya ang tunay niyang account, siya na ngayon ang hinahabol nito.

Dati ay binabalewala lang siya nito.

Marahang tinapik ni Maxine ang screen…

****

Sa Velasco Group—ang gusaling sumasagisag ng kapangyarihang pang-ekonomiya ng buong Metro Manila,.nakaupo si Shawn sa opisina niya matapos maihatid si Monica.

Tahimik niyang binabasa ang mga dokumento sa ilalim ng malambot na liwanag. Marami siyang kailangan pirmahan na mga kontrata at papeles. Sa likod niya, tanaw mula sa salamin ang mala-alikabok na liwanag ng siyudad, mga ilaw na kumukumpas sa kanya—sa lalaking nagmamay-ari ng lahat.

Ping!

Isang malinaw at matinis na tunog ang bumasag ng katahimikan ng opisinang iyon.

Dinampot ni Shawn ang cellphone at binuksan ang messenger niya. Ang henyo at junior niya ay nagreply na kaya napahinto siya at dahan-dahang ngumiti…