الفصل السابع

بقدر سعادة جلال لقدوم زوج أخته ليأخذها معه لبيته، بقدر خوفه وقلقه عليها، هو يعلم علم اليقين ان عزت ليس أمين عليها، لو كان الأمر بيده لسعى في طلاقها منه زمن وجعلها تتعزز في بيته، لكن كيف هذا ورباب زوجته لا تترك فرصة إلا وتعايره بمكوث شقيقته الذي طال في منزلها، ليس أمامه إذا سوى التفاهم معه وتسوية الأمر.

_ أسمع يا عزت، أنا مش هعاتبك علي الفترة اللي سبت فيها مراتك من غير ولا سؤال ولا حتى اهتمام لما عرفت أنها كانت حامل و سقطت، ولا على تجاوز اختك اللي اتهمتها بالسرقة، مش هتكلم في كل ده.

واكمل بجدية:

_بس بما انك جيت انهاردة انا مش هقولك غير حاجة واحدة، أتقي الله في أختي أشرقت، كفاية ظلم ليها وخلي أمك تخف عليها شوية وتعاملها زي قمر اختك، مراتك غلبانة و عايزة تعيش وانت عارف ده ومتأكد من كده، اختي بنت ناس مش خدامة يا عزت، وصدقني كرامة الراجل مننا من كرامة مراته، لو سمحت بإهانتها تاني تبقي بتهين نفسك قبلها، ارجوك حافظ عليها وحطها في عينك.

شعر داخله بالضجر الشديد من تلك المحاضرة، لكنه أتي ليأخذها، ولا ضرر من بعض التنازل والكذب كي ينال ما يريده، غمغم بابتسامة صفراء:

_طبعا يا جلال من غير كلام أختك أشرقت في عيوني وان شاء الله مش هزعلها تاني، يلا بقا خليها تحضر نفسها عشان أنا هاخدها اعشيها برة عشوة معتبرة واراضيها قبل ما نرجع البيت.

ضوي وجه جلال واطمأن قلبه، البداية تبدو مبشرة لتلك العودة مع النزهة القصيرة، علها ترضى عن زوجها ويطيب خاطرة المكسور، فقال بحماس:

_حالا هخليها تجهز و تنزل معاك.

عبر لغرفتها فوجدها مستعدة للرحيل مع زوجها، اقترب منها و أحاط بكفيه وجهها قائلا:

_أشرقت جوزك عزت ناوي ياخدك يعشيكي برة عشان يصالحك، شكله فعلا جاي ندمان وعايز يراضيكي.

وتابع كذبا:

_ عارفة كمان قالي أنه زعل اوي لما عرف بسقوطك بس اتكسف يجي وقتها، ووعدني انه هيعوضك.

أومأت له بابتسامة لا تخلو من مرارة خفية داخلها، هي خير من تعلم طبعه، أخر همه ضياع طفلهما، قالت لأخيها بعد برهة من صمتها هاتفة :

_ربنا يهديه يا اخويا.

وجدته "يدس" بكفها ورقات من النقود و قبل أن تعترض أمرها جلال بحسم:

_خديهم و بلاش مناهدة، اهم قرشين معاكي بعيد عن عين جوزك، لو نفسك في حاجة اشتريها. واستطرد بصوت مكسور:

_ أنا عارف يا أشرقت اني ظلمتك بالجواز دي، وانك كنتي مش مرتاحة عندي وان رباب مراتي كانت...

قاطعته بقولها:

_ خلاص يا جلال ده نصيب ومكتوب عليا والندم على اللي فات مش هفيد بحاجة دلوقت، أما مراتك رباب ليها عذرها وانا كنت مبسوطة يا جلال مفيش حاجة ضايقتني، بس كل الحكاية الواحدة فينا اما بتتجوز خلاص بتحس بالغربة في اي مكان غير بيتها، وده الصح يا اخويا، انت لك ظروفك وانا أكتر واحدة حاسة بيك.

ربت علي خدها بحنان وقال ببعض المرح:

_طب يلا احسن جوزك مستعجل وشكله جاب أخره في بعدك.

ضحكت ببعض الخجل واستعدت للرحيل، وتدعو الله ألا تعيش أزمة جديدة علي يد والدة عزت المتحكمة الأولى بحياتها والسبب الرئيسي لكل مشاكلها.

___________

_مبسوطة بالعشوة المعتبرة دي يا بت يا أشرقت؟ أنا دافع في الأكلة دي مبلغ محترم، بس مش خسارة فيكي يا حبيبتي.

ابتسمت له رغم كل شيء، تكفي محاولته إرضائها، كان يمكن أن يعود بها لبيته لينال بغيته دون عناء أو غرامة لشئ، فحدثته بتقدير:

_ أي حاجة تعملها عشان تفرحني هتخليني مبسوطة منك يا عزت، صدقني انا سهل تراضيني، اتقي الله بس فيا وعاملني گ بني أدمة وانا هكون ملك ايدك وتحت رجليك، واعمل كل حاجة تسعدك و تريحك.

أخذ من كلماتها المعني الذي وافق هواه قائلا وعيناه تتفحصها برغبة واضحة:

_ عايزك تركزي في الأخيرة دي بالذات، ابسطيني و ريحيني وانا هحس بيكي على الأخر، ومش هخلي حد يضايقك.

ثم نهض مستقيما أمامها بغتة:

_يلا بقا نرجع البيت قبل ما مفعول الأكلة يروح، عايزنها ليلة مبروكة.

ابتسمت له بدلال وعيناها تعده بالكثير والكثير، أليس زوجها وواجب عليها إسعاده؟ فليجرب و ينصفها دائما وهي كفيلة بجعله ملكا متوجا علي عرش قلبها.

تغاضت عن استقبال والدة عزت الفاتر وربما المهين لها، و ولجت غرفتها لتبدأ سهرة حافلة هي و زوجها بعد طول غياب، لتروي بها ظمأه وتنال هي اخيرا هدنة وتنعم بغرفتها.

في الصباح ذهب عزت لعمله بينما مكثت أشرقت بفراشها تشعر بكسل كبير بعد ليلتها الدافئة مع زوجها، قررت أن تكمل نومتها الهانئة، لكن لم تمهلها والدته تلك الفرصة و هي تقتحم غرفتها دون استئذان صائحة بتهكم:

_جري ايه ياختي! انتي هتنامي للضهر وتعمليلي فيها لسه عروسة ولا ايه يا حلوة؟

حدقتها أشرقت بذهول امتزج بنفورها وهى تخدش خلوتها، كيف تقتحم غرفة نومها بهذا الشكل، اختبأت أكثر مستترة بغطائها لتخفي جسدها المكشوف معظمه وهي تهتف بضيق واضح:

_جري ايه ياحماتي في حد يصحي حد ويدخل عليه بالشكل ده؟ انتي نسيتي اني لسه راجعة امبارح لجوزي بعد غياب تلات شهور بحالهم؟ فيها ايه لو نمت للضهر يعني.

شملتها والدة عزت بنظرة غيرة واضحة وهي تفهم ما بين السطور. لتغمغم بصرامة:

_انتي عايزاني استأذن في بيتي يا بت أنتي؟ وبعدين ايه يعني لسه راجعة امبارح؟ وانا يخصني ايه في كده، الليل ليكي انتي وجوزك، انما بالنهار لازم تبقي طوع أمري يا عنيا، الشقة عايزة تنضيف من الأرض للسقف، يلا قومي فزي خلينا نشوف اللي ورانا.

تابعتها أشرقت وهي تغادر غرفتها لتدمع عيناها بحزن و شعور المهانة لا يزال يطعن كرامتها و ينحر قلبها، ماذا لو كان لها منزل وحدها؟ هل كان استحل أحدا خصوصيتها بهذا الشكل الفج؟ تنهدت بقهر و استعاذت من الشيطان الرجيم وقامت تتحمم و تتوضأ قبل ان تصلي وتدعو الله ان يعطيها القدرة و الصبر لتتحمل ظلم والدة عزت المستفحل.

_عايزاكي تخلي كل سجاحيد الشقة بتبرق وزي الفل، عشان هشيلهم وابقى ارجع افرشهم بعد فرح بنتى "قمر"، والحيطان عايزة تنضف وتتغسل، والستاير كلها عايزة تتكوي، يلا مفيش وقت عايزين نخلص قبل العصر.

حدجتها بحنق وهي تصب عليها القليل من استنكارها:

_وانا هغسلهم واعمل كل ده لوحدي يا حماتي؟ ما تخلي بنتك تغسل وتكوي وتنضف قصادي ونخلص سوا.

_ لأ طبعا بنتي عروسة هتخرج مع صحباتها يشتروا اللي ناقصها وتحجز الكوافير، ولا عايزة حيلها يتهد وهي داخلة علي جواز عشان ترتاحي يا ست هانم؟

صاحت ساخرة:

_هانم؟ قولي خدامة بقا.

واستطردت بتهكم:

_ عشان كده خليتي ابنك يجي يرجعني البيت مش كده؟

احتدت ملامح والدة عزت وهددتها:

_انتي شكلك عايزة ترجعي لبيت اخوكي تاني، أهو علي الاقل اما تخدمي ام جوزك أحسن ما تخدمي مرات اخوكي وتشتري الخضار وتشيلي أنبوبة البوتاجاز علي كتافك وتقفي في فرن العيش بالساعة والساعتين تجيبلها العيش، أقول كمان ولا كفاية كده؟ انتي فاكراني معرفش كنتي عايشة ازاي هناك؟

وواصلت تنمر عليها:

_ أخلصي بقا وشوفي اللي وراكي وكفاية ضياع وقت لحد كده، ولو مش عاجبك لمي هدومك وعلي بيت اخوكي، بس المرة دي يمين بالله ما هتعتبيها تاني يا أشرقت، وانتي عارفة اني اقدر عليها فاهمة ولا لأ؟

أتعرفون القهر حين يتحول لنصل قاسي ينحر فيك القلب والكرامة؟ هو ذاته ما أنتابها وهي ترمق تلك السيدة البغيضة الظالمة المتجبرة،

تنهدت بعمق ونهضت تحضر المياة الممزوجة بالصابون وراحت تسكبها فوق السجاد، ثم أمسكت الفرشاة وراحت تنظفها لتزيل عنها الغبار وهي شاردة بحالها لا تشعر بألم معصمها من فرط الجلي، لكن حين أنتهت من كل شيء، كان الألم بسائر جسدها و عظامها لا يطاق.