الفصل الثامن

مضي شهر منذ عودتها لعزت، لم يتغير روتين معيشتها القاسية، مازالت خادمة للجميع، وازداد الأمر عند تحديد فرح شقيقته، وصار لازما عليها اعداد ولائم طعام ضخمة بزفافها اليوم، اخيرا سوف تنقشع الافعى ليخف الضغط ولو قليلا.

تفقدت الثوب الرخيص الذي اشترته بالنقود الزهيدة، لكن رغم هذا كان في غاية الرقة والجمال، بثوبها الأسود ووشاحه الفضي البراق، وعيناها الواسعة تتألق بكحلها الأزرق، فلم تسلم من نظرات الجميع.

خاصة رفاق زوجها الذين تعرفهم جيدًا.

مال أحدهم ناحية الآخر وهو يتابعها بعينيه وقال بخفوت:

_ هو عزت جاب الجمال ده منين؟

ضحك الآخر وهو يهز رأسه:

_ والله ما كنت واخد بالي إنها بالحلاوة دي.

_ وعمره ما بيمشي بيها ولا بيخرجها معانا، كأنه مخبيها.

رفع الثالث حاجبه وهو يرمقها من بعيد:

_ أو يمكن هو نفسه غشيم مش مقدر جمالها.

انفجروا في ضحكات خافتة بينما قال الأول:

_ بصراحة خسارة فيه.

_ وطي صوتك يا بني بدل يسمعك.

_ يسمعني إيه؟ ما هو من ساعة ما جه وهو سايبها لوحدها، لا قاعد معاها ولا حتى باصصلها.

في تلك اللحظة التفتت أشرقت مصادفة نحوهم، فارتبك اثنان منهم وأشاحا أبصارهما سريعًا، أما الثالث فثبت نظره عليها لثوانٍ أطول مما ينبغي قبل أن يبتسم ابتسامة أثارت ضيقها.

أبعدت عينيها فورًا متجاهلة الأمر كله، وحاولت الاستمتاع بالحفل الذي أُقيم بقاعة راقية جدًا، بينما كان زوجها منشغلًا عنها تمامًا بين المدعوين والرقص مع رفاقه، كأن وجودها من عدمه سواء.

_أشرقت، انتي يا أشرقت.

أجفلها نداء زوجها فانتفضت كالعصفورة من شرودها وصاحت تجيبه:

_ نعم يا عزت انا هنا.

_ يلا عشان العرسان ماشين واحنا هنروح.

ابتعدت معه مسرعة الخطى، غافلة عن الشخص المبهم الذي كان يراقبها و سمع كل شيء مختبئا بإحدي الزوايا المظلمة.

في صباح ليلة العُرس، هتفت والدة. زوجها:

_ جهزتي حاجات الصباحية يا أشرقت؟

أجابت وهي تكاد تسقط من فرط الأعياء والتعب: _جهزت كل حاجة طلبتيها ياحماتي.

_ طب هاتيها يلا وحصليني تحت، التاكسي اللي اسمه "أوفر" ده جوزك كلمه وقال زمانه جه.

_ أسمه أوبر ياحماتي!

_ أوبر أوفر، أهي كلها أسامي مالهاش تلاتين لازمة، يلا حصليني وكفاية تأخير!

_ طب ابعتيلي عزت يشيل الحاجة معايا

_ ليه إن شاء الله؟! عيلة صغيرة مش هتقدري تشيلي شنطتين؟ عايزاني اطلع ابني السلم ده كله وأقطع نفسه عشان يساعدك؟ اخلصي وشيلي الحاجة وانزلي ورايا بلاش دلع ماسخ!

همهمت أشرقت داخلها بسخط:

_إلهي تتدلعي انتي وبنتك وابنك الدلع اللي انا فيه يا بعيدة منك ليها له، ولا ياخدك وارتاح منك.

حملت الحقائب الثقيلة وهي تترنح بها هابطة خلفها وصوت عقلها يسب والدة عزت ويدعوا عليها!

الزغاريد تصدح بتتابع صاخب ليزداد ألم رأسها ضراوة وهي تراقب حفاوة والدة زوجها بابنتها قمر ثم اختلت معها بغرفة نومها، بينما ظلت أشرقت تمشط المنزل الجديد بفضول، كم تمنت هي الأخري منزل جميل گ هذا.

بعد قليل خرجت الحماة تزغرد من غرفة ابنتها، فأيقنت انها اطمئنت عليها، وراحت تتفاخر وتدعوا لابنتها بالذرية الصالحة، هنا تذكرت حملها الذي لم يكتمل ولم تعلم به إلا بعد ضياعه، ليتها علمت لحافظت علي هذا الجنين بكل قوتها.

مر الوقت سريعا وعادت أشرقت مع زوجها ووالدته للمنزل، جسدها يحتاج راحة ليستعيد نشاطه بعد المجهود الذي بذلته قبل الفرح وبعده، أو بالأحري منذ عودتها لمنزلهم، عودة خادمة، لا سيدة.

__________

تتناولت اشرقت قطع الملابس المبتلة وقامت بنشرها فوق أحبال الغسيل لتسمع حديث الجارات.

_هتروحي المصيف السنادي يا ام كريمة؟"

لتجيبها الجارة بتأكيد:

_ طبعا يا حبيبتي، هو انا ينفع افوت سنة من غير مصيف! ده حتى ولادي يتجننوا، واهو انا وجوزي بنغير جو معاهم.

_والله نفسي اطلع بس الحالة ماتسمحش.

لتهون عليها الجارة:

_ ما كلنا نفس الحال يا حبيبتي، بس انا بعمل جمعية للمصيف، وبنروح اسكندرية نأجر شقة على قدنا لمدة أسبوع وبندبر نفسنا في الأكل، المهم عندنا قعدة البحر وجماله ونسمة الهوا اللي ترد الروح، ماهو مش هنستخسر في نفسنا الواحد لازم يعيش ويتمتع ولو بالقليل.

أثارت تلك المحادثة العابرة بين السيدتات رغبة أشرقت الشديدة وأمنيتها السابقة بقضاء ولو يوم بهذه الأجواء، هل مستحيل تحقيق هذا الحلم البسيط؟ ألا يستحقه مثلها؟

_عزت، ممكن اطلب منك حاجة؟

أومأ لها بانتباه لتواصل أشرقت بتمهيد:

_أظن على يدك من يوم ما رجعت البيت ومفيش راحة، أمك مش رحماني من شغل البيت والمشاوير هنا وهناك.

تأفف بسأم:

_ يوووه، شكلها ليلة غم وهتوجعي دماغي طول الليل، أمك عملت وامك قالت.

صاحت سريعا:

_لا لا والله العظيم فهمتني غلط، انا بس بعرفك اني مش مقصرة في حاجة ومتحملة وصابرة عشان المركب تمشي، بس ده مش معناه أن تبقى حياتي كلها شقى.

_ انجزي يا أشرقت وقولي عايزة ايه خليني اتخمد.

اقتربت إليه وهي تدلله بلمسات ناعمة تعلم أنها تثيره:

_نفسي اطلع مصيف اغير جو زي الناس ما بتعمل حتى لو يوم واحد بس، عشان خاطري يا عزت نفسي ألمس مية البحر برجلي واعوم فيها واتمشى على الشط انا وانت، طلعنى مصيف في أي حتة وأنا مش هشتكى من امك تاني ابدا مهما عملت، وهدلعك على الاخر وهتشوف.

لانت ملامحه واقترابها أشعل إثارته، فالتفت ذراعه حول خصرها وألصقها به هامسا:

_يعني يا بت لو طلعتك مثلا اسكندرية يومين هتتبسطى وتبسطيني.

شهقت بفرحة:

_يومين؟ ده انا ارقصلك كمان.

همس وعيناه تلتهم تفاصيلها بنهم:

_ طب نشوف عينة كده؟

فرحتها بموافقته جعلت جسدها النحيل يدور وتتلوى بفتنة وفيرة لدى مثلها، لتنقضى ليلتهما وكلاهما راضين، هو غرق بعطاء أنوثتها السخى، وهي نامت وتكاد تسمع صوت البحر يناديها ورائحته تتخلل روحها.

_مصيف ايه ده يا واد اللي عايز تطلعه انت والمحروسة؟!

قابل استنكارها برجاء:

_ياما وفيها ايه بس، البت طالع عينها في البيت وانا بصراحة عمري ما خرجتها خروجة عدلة، نفسها تروح البحر فيها ايه يعني!

نفثت دخان ارجيلتها بتروى قبل أن تقول:

_فيها انك هتعودها على كده وشوية شوية هتاخد على الدلع وتتفرعن علينا وماترضاش تعمل حاجة وتخرج عن طوعنا، وبدال اليوم هيبقى اسبوع واتنين، وانت تصرف شقاك على كلام فاضي.

_أشرقت غلبانة ولا هتتفرعن ولا حاجه، دي يمكن تخدمك اكتر وتنفذ طلباتك وهي راضية، تلات تيام مش قصة يعني، هاخد انا و هي حتة شقة في اسكندرية و ....

قاطعته بحدة:

_ده انت خلاص مرتبها بقا وانا خلاص كلامى مبقاش له قيمة عندك يا ابن بطنى.

ثم تصنعت البكاء مسترسلة:

_أدي اللي كنت خايفة منه حصل، بنت فتحية هتطويك تحت جناحها وتعصيك على امك اللي ياما شقيت و تعبت عليك أنت واخواتك.

انكسر ضعفا لرغبة والدته فأسرع بقوله:

_صلى على النبي ياما حصل ايه لكل ده، أنا عمري عصيت عليكي و لا زعلتك؟

واصلت و لا تزال ترتدي قناع الحزن الزائف:

_ما انت اهو عايز تنفذ كلام مراتك وتعصاني، المصيف ده مالوش لازمة ومصاريفه احنا اولى بيها، خليها من وسع اكون عملت حسابي وانا اللي هقولك نطلع المصيف نغير جو كلنا، قلت إيه يا حبيب امك؟

طوته سريعا تحت جناحيها كالعصفور الساذج، رضخ لمكرها وتراجع عن وعده لزوجته أشرقت بأن تنال أمنيتها، حزنها و بكائها بعد أن علمت بتراجعه أحرق فرحتها و أطفأ بريق عيناها، صارت تقوم بكل مهامها وكأنها ألة لا تتفاعل مع شئ، لاحظ بؤسها واهتز قليلا ليعود لثباته و هو يتذكر خوفه من غضب والدته، هي وعدته انها ستتكفل بالأمر و ترتب لها ما تريده في وقت مناسب، وهذا يكفي.