أشرقت في قلبه

تدفق من ذاكرتها تفاصيل ما حدث لها من عزت، زوجها الظالم، صياحها الغاضب المقهور امتزج بضحكاته الساخرة حينها.

-بتضربني يا عزت؟! يعني بدال ما تجيب حقى وتنصفني تيجي عليا وتفرحهم فيا؟!

بذهول وعيون دامعة حدثته ليجيبها بقسوة:

- أمال احسس عليكي لما تضربي اختي؟ الإيد اللي تتمد على قمر" اقطعها، والصوت اللي يعلى على امي أخرسه.

- أشارت لصدرها بكسرة هاتفة: طب وأنا حقي فين؟ أنا ضربت أختك لأنها طلعتني حرامية وقالت اني سرقت الخاتم بتاعها، وامك بدال ما تقولها عيب صدقتها و بهدتلني.

ثم دنت إليه قائلة وهي تتفرس ملامحه: انت مصدق ان مراتك حرامية يا عزت؟ انا حرامية؟

رمقها مليا قبل أن يطعنها بقوله القاسي:

-ليه لأ؟ يمكن الخاتم عجبك وقولتي اسرقه، وقولتي لنفسك محدش هيشك فيكي.

ارتحت ذراعيها جوارها وترقرقت حدقتيها بحزن مخذولة من جوابه وقالت:

_ يعني ده ظنك في مراتك يا عزت؟

ليشتعل داخلها وميض التمرد بصراخها:

_أنا خلاص مابقيتش قادرة اتحمل العيشة دي، تعبت منكم ومش حاسة اني بني آدمة و متهانة وسطيكم، أسمع يا عزت انت لازم تجيبلي شقة لوحدي اسكن فيها.

أجابها بسأم:

- وبعدين في موال كل يوم ده، مش هنخلص؟.

هدرت عليه وقد نفذت طاقتها:

-لا مش هنخلص غير لما تنفذ طلبي, وتشوف لي شقه في مكان تاني بعيد عن أمك, وتوفي وعدك اللي قلت عليه لما اتجوزتني وتبقى أد كلمتك مره واحدة في حياتك يا عزت

حدجها باستخفاف، وسريعا ما تبدلت نظرته وهو يطوف على قدها بنظرة شهوانية تعرفها أشرقت جيدا، اقترب فحذرته بحدة:

- انسى، مش هخليك تقرب مني بعد كده انا خلاص زهقت منك، انا مش عبدة عندك ولا جارية اشتريتها لمزاجك.

عزت ببرود و هو يحل أذرار قميصه:

- انا جوزك وده حقي، وهاخد حقي منك واتبسط.

_ وهو انت ما تعرفش غير حقك وبس، طيب فين حقي وراحتي أنا؟ من يوم ما اتجوزتك ماليش حقوق عندك، بس دلوقت مش هتنازل عنها.

- يعني هتعملي ايه؟

-هسيبلك البيت.

قهقهته الساخرة افقدتها عقلها لتصرخ عليه: -متضحكش انا مش بهزر يا عزت، و همشي دلوقت حالا عشان تصدق إني مش بهزر.

"سخر منها" بقوله المحتقر لها:

-هتمشي تروحي فين؟ لاخوكي الخيخة؟ ولا مراته اللي بتشغلك خدامة عندها هي وولادها؟ طب علي الاقل انتي هنا بتخدمي في بيت جوزك وامي أحق بخدمتك من رباب مرات اخوكي

اشعلتها معايرته لها و ذمه بشقيقها فصاحت بصراخ:

- من انهاردة مش هخدم أي حد، مش هسمح اتظلم تاني، ولا انت ولا امك ولا رباب ولا أي مخلوق في الدنيا

جلجلت ضحكته ثانيا ثم دني ليهدئها، رغبة لإرضاء نفسه ونيله لها:

- طب اهدي كده متخليش الليلة تبوظ، طاوعيني وسيبي نفسك خليني اروق مزاجي عشان اسيبك في حالك.

ثارت عليه اكثر و واصلت رفضه فلم يستسلم عزت وقال بقسوة:

- يبقا انتي اللي جبتيه لروحك، اللي عايزه هيحصل.

قاومته اشرقت فتغلب عليها بقوة جسده، لتنتهي الليلة بينهما بشكل مهين لها بعد ان اخذ منها رغبته.

قال وهو يسحب الغطاء فوق جسده:

_ تصبحي على خير يا شوشو.

ازدادت مرارة و قهر، مدركة انها إن ظلت بين تلك الجدران، لن تكون لها سوى قبرا يبتلعها كل يوم.

------------

في اليوم التالي

لذهب إلى منزل أخيها بنيّة الزيارة، جلست في غرفة الاستقبال الصغيرة تضم طرف عباءتها بين أصابعها في توتر، بينما كان شقيقها يجلس قبالتها يرمقها بقلق لم يخفه:

_ مالك يا أشرقت؟ وشك مصفّر كده ليه؟

رفعت عينيها إليه بنظرة باهتة لا حياة فيها:

_ بقى لسه بتسأل مالك يا جلال؟

انعقد حاجباه.

_ قصدك إيه يا اشرقت؟

ابتلعت غصة مريرة، ثم قالت بصوت حزين:

_ يعني انت شايفني مبسوطة مع عزت؟ شايفني مرتاحة معاه؟

تنحنح وهو يعتدل في جلسته.

_ يا بنتي كل البيوت فيها مشاكل و…

قاطعته سريعًا ونبرة خيبة ثقيلة تتسلل إلى صوتها:

_ لا متقوليش كل البيوت فيها مشاكل.

ساد صمت قصير وقالت بحسرة:

_ أنا متجوزتش يا أخويا، أنا رحت أشتغل خدامة عنده هو وأهله.

واكملت بقهر:

- امه مشغلاني ليل نهار زي المرمطون عندها، مابترحش يا جلال، كأني بهيمة اشتروها، لما خلاص بفكر انتحر واموت روحي.

انتفض وجهه بضيق.

_ استغفري ربنا! إيه الكلام ده؟

ضحكت بمرارة، ثم مالت قليلًا تقول:

_ تحب أقولك يومي بيبدأ إزاي يا اخويا عشان تعذرني؟ بصحى قبل الكل ومن النجمة، أطبخ و أنضف و أخدم أمه، حتى حجر الشيشة اللي بتشربه انا اللي بعمله ليها.

واستطردت:

- ده غير طلبات أخوه، أخته مقصوفة الرقبة.

ثم همست بحزن:

- انا مش بلاقي وقت لنفسي حتى يا جلال، كأني مش بني آدمة عايشة وسطيهم.

ثم أضافت بصوت منخفض متألم:

_ تلات سنين ساكتة وشاربة المر، وبقول لنفسي كل يوم يا بنت اصبري وعيشي.

خفض بصره بخجل لتقصيره وغمغم:

_ طب وعزت؟

اتسعت عيناها كأن السؤال نفسه طعنها:

_ عزت؟!

صمتت لحظة ثم قالت ساخرة:

_ عزت لما بكلمه كأني بكلم حيطة، أقوله عايزة بيت، يقولي بعدين أصبري شوية الظروف صعبة، وأنا اللي كنت فاكرة إن الوضع مؤقت.

رفعت رأسها إليه مباشرة، والمرارة تتكدس في عينيها:

_ انت فاكر لما قال هنقعد عند أمه مؤقت؟ فاكر؟

تحرك في مكانه بعدم ارتياح:

_ أيوة فاكر، ما هو كان بيقول ظروفه على قده، ولما تتحسن هيجيب ليكي شقة لوحدك.

ابتسمت بسخرية موجوعة:

_ وأنت صدقته يا جلال وبعتني.

رفع رأسه نحوها وقد بدأ الانزعاج يتسلل إلى ملامحه:

_ يعني إيه بعتك يا اشرقت؟! ايه التخريف اللي بتقوليه ده؟ الراجل كان محترم وجاي يتجوزك!

تهكمت:

_ والمحترم يخلي مراته تعيش في بيت أهله تلات سنين؟ المحترم يسيبها خدامة البيت كله؟ تخدم الصغير والكبير؟

ثم خرج السؤال الذي طالما ابتلعته:

_ قولي يا جلال، انت ليه وافقت من غير ما تضمن حقي؟

أطرق رأسه للحظة.

_ أنا كنت فاكر إنه هيصونك يا اشرقت.

ارتجف فمها ابتسامة مكسورة وقالت:

_ وأنا كمان كنت فاكرة كده.

وساد الصمت بينهما للحظات ثقيلة، ثم تابعت بصوت خافت، موجوع أكثر مما هو غاضب:

_ تعرف إيه اللي قاهرني؟

رفع عينيه إليها فقالت:

_ إني كل ما أتوجع أقول أكيد أخويا لو عرف هيقف ليا ويحميني، بس أرجع أفتكر إن أخويا هو اللي سلّمني بإيده له، سلمني لزوج ميعرفش ربنا.

اتسعت عيناه بصدمة وصاح:

_ أشرقت! بتقولي ايه؟!

لكنها نهضت قبل أن يكمل، ومسحت دمعة بطرف عينها سريعًا، ثم قالت بابتسامة باهتة:

_ متزعلش مني يا جلال، أنا مسمحاك يا اخويا ، وجيت عشان كنت محتاجة أفهم، هو أنا ليه كنت رخيصة للدرجة؟ بس انا فهمت، انت كمان ظروفك صعبة وانا كنت حمل تقيل عليك يا جلال، مش كده؟

وتركت ورحلت لحياتها الأليمة، فلا بديل يعصمها من هذا العذاب.

يتبع