الفصل التاسع

_أشرقت، خلصي ترويق الشقة و بعدين ادخلى المطبخ جهزي في الغدا أوام قبل ما بنتى وجوزها يوصلوا، رفعت بيحب السمك نضفيه حلو عشان الزفارة فاهمة؟

رمقتها بضيق دون أن تجيب وهي تفرغ غضبها بتنضيف الغبار، ها هى تخدم العقربة حتى بعد زواجها، كل يوم ترسل والدتها طعام مطهو بحجة انها عروس، رغم مرور عدة أشهر على زيجتها، تنهدت تقارن بحسرة حالها، لا أحد يدللها، الجميع يستغلها لمصلحته.

أتت قمر زوجها الذي احضر معه هدايا للجميع، لم تتوقع أبدا أن يتذكرها ويخصها بشيء، لن تبالغ لو قالت إن زوجها عزت لم يهاديها مرة واحدة منذ زواجهما.

_مبسوطة مع جوزك يا بت يا قمر؟

بنبرة اهتمام حانية تسائلت والدتها لتجيب الأخيرة:

_مبسوطة خالص يا امي، وكله كوم ورحلة الاقصر وأسوان اللي طلعتهم مع رفعت،اخوه اعتبر تكاليف الرحلة هديته لينا بعد الجواز، كنا في فندق حلو اوي ولينا أوضة لوحدينا وكل حاجة بتتعمل لينا على الجاهز، من الفطار والغدا والعشا لحد التنقلات بالباص، كل يوم مكان جديد و يجنن.

واستطردت بحماس:

_رفعت قالى كل سنة هنطلع الرحلة دي مرة في الشتا، غير المصيف اللي هنطلعه لما الصيف يبدأ، أصل شغل اخوه اللي بيظبط الرحلات دي.

هللت الأم بتفاخر:

_ صلاة النبي على النسب اللي يشرف، والله أهل جوزك طلعوا بيفهموا ومش ماسكين على القرش.

_ ابدا يا أمي، وحماتي من يوم ما رجعنا كل يوم تعملنا أكل ومدلعانا، أصلها بتحب رفعت جوزي اوي، بصراحة أنا مبسوطة اوي معاهم.

_الحمد لله يا قلب امك، دعاية طلع من نصيبك واطمنت من ناحيتك.

_اطمنى يا امى رفعت مش مقصر معايا خالص.

ربتت على ظهرها برفق:

_طب يلا يا روح امك زمان الغدا جهز، نادي جوزك و عزت، وانا هشوف مرات اخوكي عشان تحط الأكل.

-----

_ تسلم ايدك يا اشرقت، الاكل تحفة.

ابتسمت لتقدير رفعت لها وقالت:

_ بألف هنا يا استاذ رفعت.

انتهى اليوم بعد تناول الجميع وليمة الغداء التي أعدتها أشرقت، و دعى رفعت أهل زوجته لزيارته يوم عطلته الأسبوعية القادمة لقضاء يوم في منزله.

وأتى يوم ذهابهم لبيت قمر، أخيرا سوف تنال أشرقت دور الضيفة المكرمة لا الخادمة، اتت بصحبة زوجها عزت و والدته، استقبال رفعت لهم دل على تقديره لقيمة الضيف ولأهل زوجته.

بحكم طبيعة أشرقت المتعاونة، صممت أن "تجلى" كل الأواني والصحون المتسخة بعد الغداء بمفردها، لأول مرة لا تستاء من هذا العمل، يكفي أن تلك العجوز الطيبة هي من صنعته وحدها، فلترتاح قليلا.

_________

أربعة أشهر مرت و الوضع لم يطرأ عليه جديد على حياة اشرقت، وذات صباح أتت قمر تستجير بوالدتها، ما أن فتحت الاخيرة الباب حتي اندفعت تعانقها، شعرت بالريبة وتساءلت:

_قمر؟ خير يا بنتى ايه اللي جابك السعادي، مش عوايدك تيجى بدري كده.

غمغمت بعد ولوجها البيت:

_مخنوقة شوية يا امى وجيت افضفض معاكي، ماليش غيرك اشكيله همي.

ألتاع قلبها هاتفة بجزع:

_مخنوقة ليه وهم ايه يا بنتى بعد الشر عنك احكيلي.

هتفت قمر بحزن:

_ انا وجوزي بقينا نتخانق كتير اوي،  رفعت زعلان منى يا امى عشان بقوله فيها ايه لو امك تفضل تطبخ لنا كل يوم لانى مش بعرف، زعقلي وقالى مش هيخليها تعمل حاجة تاني وانى لازم اتعلم، وكمان بيتهمني أني مش نضيفة في بيتى ودايما متبهدل ومش بهتم به ولا بمظهره.

و واصلت شكواها:

_ أصل امه كانت بتعمله كل حاجة حتى كوي هدومه.

والدتها بغير إنصاف:

_وهو ماله المحروس جوزك حمقى كده ليه، واحدة واحدة عليكي لحد ماتتعلمى، ومفيهاش حاجة لو أمه كل يوم تعمل حسابكم في طبق طبيخ لغاية ما تتعلمي تطبخى لجوزك يا قمر.

صاحت بضجر:

_ يا امى انا بكره وقفة المطبخ أصلا وبتخنق منه، حاولت اعمل اكل وما عجبوش، قام بسلامته سابني و راح ياكل عند أمه لما حاسة انى هموت من الغيظ.

ربتت على كتفها بحنان وقالت:

_طب استهدى بالله يا عين امك وادخلي اوضتك ارتاحى، وانا هخلي البت شروق تعملك لقمة فطار تاكليها بدال ما وشك دبلان كده وزي اللمونة.

اومأت لها قمر بطاعة متلذذة باستعادة شعورها بالدلال في منزل والدتها، لكنها

وقفت ببعض التردد والحيرة هاتفة:

_طب "ياما" في حاجة كده حصلت معايا و كنت عايزة اقولك عليها.

ثم دنت تحدثها بصوت خافت، ليضوي وجه الأم و تطلق  زغرودة صاخبة وهي تقول:

_يا ألف نهار ابيض، ألف مبروك يا قمر، انتي حامل يابت.

همست بخجل:

_ شكلى كده يا امى

_  و جوزك عرف بحملك؟

انقلبت ملامحها النفور:

_لسه معرفش، اتغاظت منه بعد ما اتخانقنا بالليل، وقولت مش هعرفه غير لما اروق ناحيته، وصحيت جيت علي هنا.

_ خير ما عملتي يا بت، ومن هنا ورايح لازم تروقي دمك وتهدي اعصابك عشان اللي في بطنك.

_ أهدى ازاي ورفعت جوزي كل يوم يقطمنى بالكلام عشان مش عارفة اطبخ ولا انضف البيت.

غامت عين والدتها بشخوص عميق مغمغمة:

_خلاص يا قمر، من انهاردة رفعت مش هيقدر يزعلك تاني، العيل اللي في بطنك هيرجعك بيتك وانتى قوية و حاطة رجل على رجل، سيبي امك بقا تخطط لك مظبوط، وأنا اوعدك اخلي رفعت ده خاتم في صباعك هو وامه كمان.

تنهدت صغيرتها بقلق:

_ربنا يستر يا امى ويكون كلامك مظبوط.

_اطمنى و سيبي امك تخطط لك وهتشوفى هوصلك لأيه.

---------

سمعت أشرقت حوارهما وشعرت بالنفور، تلك الشمطاء حماتها تكيل كل شئ بمكيالين، ما ترضاه عليها هي، ترفضه وتستنكره أن يحدث لابنتها، أزدواجيتها مقيتة وكم تبغضها.

أما الغصة التي وقفت بحلقها، هي معرفتها بحمل قمر، حنت رأسها تنظر لأحشائها بحزن، هنا كانت تحمل صغيرا فقدته قبل حتى أن تدري عنه شئ، ربما لو اتى لتلونت حياتها بألوان الفرحة لكنه قضاء الله.

___________

_ مزعل اختي ليه يا رفعت؟"

الأخيز مدافعا: أنا مزعلتش حد ياعزت، أختك هي اللي مش عايزة تعيش زي ما الناس عايشة وتقوم بدورها زي اي ست مسؤولة عن راجل وبيت.

_ معلش قمر متدلعة شوية يا رفعت، امى عودتها ما تشلش أي مسؤولية.

_والله ده مش ذنبي، انا من حقي اكون مرتاح في بيتى واحس أن مراتي بتتعب عشان ترضيني، لكن اختك قمر بتحب تاخد ومتديش يا عزت، وده مايرضيش ربنا، وأنا بصراحة مش عاجبني العيشة بالشكل ده وكأنى مش متجوز.

حدجه عزت مليا قبل ان يرمي قنبلته:

_والله براحتك يا رفعت، بس قبل ما تاخد اي قرار تندم عليه، احب اعرفك حاجة مهمة لسه متعرفهاش.

وصمت يراقب فضوله باستمتاع قبل ان يقول:

  _مراتك قمر حامل يا رفعت.

يتبع

يتبع.