الحلقه الخامسه

: في فيلا فريدة

(الجو في البيت هسس ومكتوم. الإضاءة خافتة بس مبينة توتر مش طبيعي.

"فريدة" قاعدة على الكرسي، وبتقطع في المنديل اللي في إيدها من كتر الرعب والوشوشة اللي في دماغها. فجأة، يدخل ابنها الكبير "يونس

​يونس (بيقلع جاكيت البدلة ويرميه على الكنبة بنرفزة)

: أمي.. إنتِ صاحية لحد دلوقتي ليه؟

​فريدة (تتخض وتداري رعشة إيدها بسرعة)

: يونس! خضتني يا حبيبي.. أه صاحية، مستنياك. مالك يا بني وشك مقلوب كده ليه وجاي بتنهج؟

​يونس (يقرب منها ويقعد على ركبه قدامها، ويبص في عينها بتركيز):

المصايب مابتخلصش يا أمي.. ورد.. ورد انضرب عليها نار في وسط الشارع وهي دلوقتي بين الحيا والموت في المستشفى!

​فريدة (وشها يصفر تماماً وترجع لورا بصدمة):

إيه؟! ضرب نار؟ ورد مين.. ورد خطيبة أدهم القديمة؟ ومين.. مين اللي عمل كده؟

​يونس (يضيق عينه وبيراقب رد فعلها الخايف جداً): ل

سه المباحث ماعرفتش. بس الموضوع مقصود يا أمي.. الرصاصة كانت ليها هي بالذات. أنا مستغرب.. تفتكري مين اللي له مصلحة يخلص من بنت غلبانة زي دي؟ مين اللي جواه كل السواد ده عشان يأجر حد يخلص عليها في الشارع؟

​فريدة (تقف فجأة وبتتحرك ناحية الشباك عشان تهرب من نظراته):

وأنا.. وأنا إيش عرفني يا يونس؟ أنا مالي ومال البنت دي ولا عيلتها! تلاقيه حد من منطقتهم.. أو يمكن أدهم له دخل، إنت عارف أخوك طايش ومشاكله كتير!

​يونس (يقف ويمشي وراها، ونبرة صوته تبقى أعمق وشاكة):

أدهم؟ لأ يا أمي، أدهم كان معاها وكان بيموت من الرعب عليها، هو اللي شالها وجري بيها على المستشفى. لكن إنتِ.. إنتِ مالك خايفة ومتوترة كده ليه؟ إيدك بترتعش يا أمي، كأنك عارفة حاجة وخايفة تقوليها.. أو كأن ليكي يد في الموضوع!

​فريدة (تلف له بزعيق مصطنع عشان تداري رعبها):

يونس! إنت اتجننت؟ بتشك في أمك؟ أنا فريدة الهواري هوسخ إيدي بحاجات زي دي؟ اتفضل اطلع برة وسيبني أرتاح!

​(يخرج يونس وهو مش مقتنع نهائي، وفريدة تقع على الكرسي، وتحط إيدها على قلبها وتهمس برعب: "عملتها الغبية.. وديتيني في داهية يا يارا!").

في طرقة المستشفى

(الجو مكهرب، والأنوار البيضاء مخلية المكان كئيب. "زينب" أم ورد قاعدة على الأرض، بتعيط بحرقة وتلطم على وشها. "أدهم" واقف بعيد، هدومه كلها دم من ورد، وعينه حمرا من البكاء والندم. فجأة، باب العمليات يتفتح ويخرج الدكتور وهو بيمسح عرق جبينه).

​زينب (تجري على الدكتور وتمسك في قميصه): طمني يا دكتور! بنتي.. ورد صحيت؟ قولي إنها بخير عشان خاطر ربنا!

​الدكتور (بأسف وباين عليه القلق):

ادعوا لها يا جماعة.. الرصاصة عملت لها نزيف داخلي حاد، وإحنا قدرنا نوقفه بالعافية، بس الحالة خطيرة جداً وفقدت دم كتير.. وفصيلة دمها نادرة (O سالب) ومفيش في بنك الدم حالياً، لازم متبرع فوراً وإلا هنفقدها في أي لحظة!

​أدهم (يقدم بلهفة ويشمر كمامه):

أنا يا دكتور! أنا فصيلتي (O سالب).. اسحب مني حالاً، اسحب دمي كله بس ورد تعيش!

​زينب (تندفع ناحية أدهم بكل قوتها وتزقه في صدره بغل وزعيق يهد المستشفى):

لأ!! مستحيل! على جثتي إن دمك يدخل جسم بنتي! إنت مش هتبرع لها بحاجة!

​أدهم (بدموع ورجاء):

يا طنط زينب أرجوكي.. ده وقت خناق؟ البنت بتموت!

​زينب (بصراخ هستيري وعيون كلها كره)

: تموت وهي طاهرة، ولا يعيش في عروقها دمك أنت! دمك سم يا أدهم! إنت السبب في كل اللي بنتي فيه.. كسرت قلبها ليلة فرحها وسبتها للناس تاكل في وشها، ولما رجعت تظهر لها تاني، رجعت وجايب معاك الموت! غور من وشنا.. دمك مش هينقذها، دمك هو اللي قتلها!

​(في اللحظة دي، يوصل "يونس" الطرقة، ويشوف الخناقة ويفهم إن الوقت بيجري).

​يونس (يقرب بسرعة وبصوت رزين وقوي):

اهدي يا أمي.. اهدي يا حاجة زينب. أنا أخو أدهم الكبير، وأنا كمان فصيلتي (O سالب) زي أدهم بالظبط. أنا اللي هتبرع لورد فوراً.

​زينب (تبكي وبتبص ليونس براحة):

ربنا يكرمك يا ابني ويديك الصحة.. يله معاهم بسرعة الحق بنتي.

​[جوه أوضة التبرع بالدم / وبعدها عند العناية المركزة]

(يونس نايم على السرير، والممرضة بتسحب منه الدم. بيبص لكيس الدم وهو بيتملي، ويحس بإحساس غريب أوي، كأن روحه اتوصلت بروح البنت دي اللي عمره ما شافها غير في الصور. بعد ما يخلص، يصر يونس إنه يشوفها من ورا الإزاز بتاع العناية المركزة).

​(يونس واقف يبص من ورا الإزاز. "ورد" نايمة على السرير، وشها شاحب وزي الملايكة، والأجهزة محوطاها من كل حتة، وشعرها الأسود مفرود على المخدة. في اللحظة دي.. يدق قلب يونس دقة عنيفة وعالية عمره ما حس بيها في حياته. جمالها الهادي رغم التعب خطف قلبه، وحس إنه عاوز يحميها من الدنيا كلها. يهمس لنفسه وعينه بتدمع).

​يونس (في سره): إيه الإحساس ده؟ أنا أول مرة أشوفك.. ليه حاسس إنك حتة مني؟ ليه قلبي بيدق ليكي كده وإنتِ بين الحيا والموت؟

​(فجأة، يفتكر أخوه أدهم اللي قاعد برة بيموت عليها. ملامح يونس تقلب ذنب وحيرة).

​يونس (يكمل في سره بمرارة):

لأ.. مستحيل. دي البنت اللي أخويا بيعشقها.. البنت اللي أدهم ساب الدنيا كلها عشانها. أنا مش هينفع أخون أخويا.. حتى لو في خيالي. بس غصب عني.. مش قادر أشيل عيني من عليكي.

​[ جوه أوضة العناية المركزة

(صوت جهاز ضربات القلب شغال بانتظام (بيب... بيب...). ورد تبدأ تتحرك بحركة خفيفة، جفونها تترعش، والصفار مالي وشها، وبتحرك شفايفها الناشفة بصعوبة، وبتحاول تنطق اسم واحد وهي غايبة عن الوعي).

​ورد (بصوت واطي ومبحوح كله وجع): أدهم.. لأ.. أدهم.. سيبني.. أدهم..

​(بتكرر الاسم بكسرة قلب كأنها عايشة الكابوس جوه حلمها، ودمعة تنزل من عينها وتصفي على المخدة).

​[في: طرقة المستشفى - يارا توصل]

(توصل "يارا" أخت ورد المستشفى. لابسة لبس شيك ومظبطة نفسها بس بتحاول تظهر إنها منهارة. تجري في الطرقة وهي حاطة إيدها على بؤها وبتصوت بدموع وتعمل شو عشان الناس تتفرج).

​يارا (بتمثيل ودموع تماسيح وهي تترمي في حضن أمها زينب): أختي!! ورد!! جرى لها إيه يا ماما؟ مين الندل اللي عمل فيها كده؟ أنا كنت هموت من الرعب عليها في السكة! حبيبتي يا ورد يا أختي.. يا ريتني كنت مكانك!

​زينب (تضمها بضعف): ادعي لها يا يارا.. ادعي لأختك تقوم لنا بالسلامة.

​(يارا ترفع راسها من على كتف أمها، وفي ثانية واحدة، تختفي الدموع المصتنعة دي وعينها تقلب نظرة باردة، كلها غل وقلق. تلفت وتلمح "أدهم" واقف في آخر الطرقة، وتلمح كمان "يونس" وهو خارج من أوضة التبرع).

​يارا (في سرها، وعينها بتلمع بخبث وخوف): يا نهار أسود.. أدهم هنا؟ ويونس كمان هنا؟ لو البنت دي عاشت ونطقت، هتدمرني وتدمر فريدة هانم.. الخطة لازم تتغير، ورد مش لازم تفتح عينها تاني في المستشفى دي!

(وهي يارا سرحانة في مصيبتها وتفكيرها، يقرب منها "يونس" بخطوات تقيلة ونظرات حادة زي الصقر. يقف قدامها بالظبط، ملامحه متفسرش خير، ويمد إيده ويمسك دراعها براحة بس بقوة تمنعها تتحرك).

​يونس (بصوت واطي جداً وحاد، ويهمس في ودنها)

: حمد الله على السلامة يا يارا.. غريبة يعني، تليفونك كان مشغول بقاله ساعة وأنا قالب الدنيا عليكي عشان أقولك على أختك.. كنتِ بتكلمي مين ومستعجلة أوي كده لدرجة إنك ماردتييش

​(يارا تتجمد في مكانها، وعينها توسع من الرعب وهي مواجهة يونس بذكائه، ومن كتر الخضة تقع شنطة إيدها على الأرض وتتفتح.. ويظهر منها تليفون تاني "سري" بيرن في اللحظة دي بالذات، ومكتوب على الشاشة الاسم: "فريدة هانم"!).

​(يونس يبص لشاشة التليفون ببطء، وبعدين يرفع عينه ويثبتها في عين يارا الميتة من الرعب).

يا تري هيحصل اي تابعوني

شيماء عبد الرحمن