٤

بعد انتهاء الحصة، تذهب لين ولارا وماريا إلى المكتبة.

كانت المكتبة من أكثر الأماكن هدوءًا في المدرسة، المكان الوحيد الذي يستطيع الطلاب فيه الابتعاد قليلًا عن الضوضاء والانشغال بما يحبون.

وأثناء دخولهن، ينتبه ريان لوجودهن.

يرفع رأسه من الكتاب الذي بيده ويبتسم بسخرية.

"إيه ده؟ الحقوا شوفوا مين جه."

لا يرفع آدم عينيه من كتابه.

"كمل قراءة وخليك في حالك."

تبدأ الفتيات في البحث بين رفوف الكتب.

تجد ماريا ولارا الكتب التي تريدانها، لكن لين تظل تبحث بين الأقسام دون أن تجد ما تبحث عنه.

تلاحظ لارا ذلك فتقترب منها.

"لين، لسه ملقتيش الكتاب اللي أنتِ عوزاه؟"

تنظر لين إلى الرفوف مرة أخرى.

"لا، مش لاقياه... مع إن أمين المكتبة قالي إنه موجود في القسم الرابع هنا."

تنظر لارا إليها.

"هو اسمه إيه؟ وإحنا ندور معاكي."

تجيب لين:

"البحث العلمي والذكاء الاصطناعي."

في الجهة الأخرى، كان كريم يستمع دون قصد، فيلتفت عندما يسمع اسم الكتاب.

"ده الكتاب اللي معايا."

ينظر إليه ريان بابتسامة ساخرة.

"بقولك إيه، أنا شايف إنك تاخدها فرصة وتقوم تكلمها."

يرد آدم دون أن ينظر إليه:

"أنت مبتضيعش فرصة يا ريان."

ينظر كريم إلى الاثنين بضيق، ثم يتركهما ويتجه نحو لين.

"لو سمحتي."

تلتفت لين ولارا إليه.

يقول كريم بهدوء:

"أنا آسف، أنا مكنتش أقصد أسمع كلامك، لكن أخدت بالي من اسم الكتاب اللي قولتيه... هو نفسه الكتاب اللي معايا."

تبتسم لين قليلًا.

"مفيش مشكلة، استأذنك بس أول ما تخلصه آخده منك."

يهز كريم رأسه.

"لا، أنا خلاص خلصته. تقدري تاخديه."

ثم يضيف بنبرة فضول:

"بصراحة أنا مكنتش أعرف إن عندكم كمان شغف بالبحث العلمي."

ترفع ماريا حاجبها وتبتسم بسخرية.

"أهو هنبدأ تاني."

ينتبه كريم لما قالته فيحاول التوضيح بسرعة.

"لا والله مش قصدي... أنا بس أقصد إن الكتاب ده صعب، وفي حاجات كتير مش فاهمها."

ترد ماريا:

"أكيد يعني... إحنا اكتشفنا إن قدراتكم محدودة."

تنظر إليها لارا بضيق.

"ماريا، اهدي شوية، بلاش كده."

تأخذ لين الكتاب من كريم وتنظر إليه.

"أنا هقرأ الكتاب، ولو قدرت أفهم النقاط اللي أنت مش فاهمها هقدر أساعدك أكيد."

ينظر كريم إليها باستغراب بسيط، ثم يبتسم.

"شكرًا... الحقيقة أول مرة حد يعرض عليا المساعدة، لكن أنا محتاج أفهم فعلًا، لأنه هيساعدني في المشروع اللي بعمله حاليًا."

تقول لارا بهدوء:

"مفيش داعي للشكر، إحنا لازم نساعد بعض."

يهز كريم رأسه ثم يذهب، لكنه يتوقف بعد خطوات ويلتفت إليهن مرة أخرى.

"هو المفروض إن بكرة وبعده عطلة المدرسة، ويوم الأحد إجازة رسمية من الدولة... والمفروض يوم الاثنين أقدم المشروع. إزاي هقدر أتواصل معاكي؟"

تنظر لارا إلى لين.

"لين، ممكن تتواصلي معاه على الواتس."

ينظر كريم إليها.

"أيوه، هيكون أفضل... لو مكنتيش ممانعة."

تجيبه لين ببساطة:

"مفيش مشكلة، ممكن تليفونك أسجل رقمي."

يخرج كريم هاتفه.

"أكيد."

تسجل لين رقمها، بينما يراقب ريان الموقف من بعيد دون أن يتدخل، لكنه للمرة الأولى لا يجد تعليقًا ساخرًا يقوله.

في نهاية اليوم، يجد كريم رسالة على هاتفه.

يفتحها باستغراب.

"أنا خلصت قراءة الكتاب. ممكن تبعتلي النقط اللي أنت مش فاهمها وأنا هحاول أوضحها لك."

يتعجب كريم للحظة.

كيف استطاعت إنهاء الكتاب بهذه السرعة؟

يرد عليها:

"إزاي خلصتيه؟ أنا فضلت أقرأه ٤ أيام."

تأتيه الإجابة بعد لحظات:

"عشان أقدر أساعدك. أنت قولت إن المشروع يوم الاثنين، يعني معتش فيه وقت."

ينظر كريم إلى الرسالة بابتسامة بسيطة، ثم يكتب:

"شكرًا لمساعدتك، لكن أنتِ ليه مهتمة بالبحث العلمي؟ أنتِ بتعملي مشاريع بردو؟"

ترد لين:

"لا، أنا بس بحب أقرأ وأكتسب معلومات، يمكن تنفعني بعد كده. متنساش تكتب كل الأسئلة والنقط في ورقة وصورها عشان أرتب أفكاري وأقدر أساعدك."

يبتسم كريم عندما يرى ردها.

"أنا كتبتها فعلًا في ورقة وأنا بقرأ الكتاب. ثواني وهبعتهالك."

بعد لحظات تصل إليه رسالة منها.

"تمام، هرتب أفكاري كويس عشان أقدر أشرحلك النقط دي."

يرد كريم:

"معلش هتعبك معايا، وشكرًا ليكي مرة تانية."

"مفيش داعي للشكر، أول ما أخلص هبعتلك."

ينتهي اليوم.

وفي صباح اليوم التالي تصل رسالة من لين:

"أنا خلصت الأسئلة، ياريت أعرف هتكون فاضي إمتى عشان نتناقش."

بعد ساعة يرد كريم:

"أنا آسف على التأخير، أنا دلوقت فاضي لو وقتك يسمح."

تجيبه:

"تمام، أنا بردو معنديش حاجة دلوقت."

يبدأ الاثنان في النقاش.

تشرح لين النقاط التي لم يفهمها كريم، ويبدأ هو في عرض أفكاره وتوضيح تفاصيل مشروعه. يتحول النقاش إلى تبادل حقيقي للمعرفة، فكل واحد منهما يكتشف طريقة تفكير مختلفة عن الأخرى.

تمر الساعات دون أن يشعروا.

حتى تصبح الساعة الثانية صباحًا.

ينظر كريم إلى الوقت ثم يقول:

"الساعة بقت ٢."

ترد لين بهدوء:

"أنا محستش بالوقت... وبعدين باقي ٤ أسئلة بس وهنخلص."

يصمت كريم للحظة ثم يقول:

"بس أنتِ سهرتي طول الليل امبارح عشان تقرأي الكتاب، ودلوقت الوقت اتأخر. الأفضل تنامي وبكره نكمل عشان متتعبيش."

ترد لين:

"عشان تقدر تخلص مشروعك في أسرع وقت. كده هيكون فاضل يوم الأحد بس عشان تقدر تنفذه."

يبتسم كريم.

"مش مشكلة، هقدر أخلصه بسرعة طالما فهمت النقط اللي وضحتيهالي."

تغلق لين الكتاب الذي أمامها.

"تمام، بكره الساعة ١٢ هبدأ أشرح النقط الباقية."

"اتفقنا."

ينتهي اليوم، لكن هذه المرة لم يكن مجرد يوم دراسي عادي.

فلأول مرة يبدأ طالبان من عالمين مختلفين في اكتشاف أن الاختلاف بينهما لم يكن سببًا للصراع... بل كان سببًا للتعلم.