٥

يبدأ اليوم التالي، لكن تتأخر لين عن الموعد المحدد.

ينظر كريم إلى الساعة أكثر من مرة، ويبدأ القلق يتسلل إليه، لكنه يتعجب من هذا الشعور.

لم يهتم من قبل لأمر أي فتاة، فلماذا يشعر بالقلق الآن؟

يحاول إقناع نفسه:

"يمكن عشان بس بتساعدني في المشروع... مش أكتر."

تمر ساعتان تقريبًا دون أن تصل أي رسالة منها.

يتردد قليلًا، ثم يمسك هاتفه ويرسل لها:

"لين... إنتِ كويسة؟"

ينتظر.

تمر ساعة أخرى دون رد.

يزداد قلقه، وتبدأ الأفكار تسيطر عليه.

ربما أصابها التعب بسبب السهر في اليومين الماضيين، ربما لم تكن بخير كما قالت.

وقبل أن يستمر في التفكير، يصل صوت رسالة إلى هاتفه.

يمسكه بسرعة.

كانت رسالة من لين.

"أنا آسفة على التأخير، بس أنا لسه صاحية... مش فاهمة إزاي نمت كل ده."

يأخذ كريم نفسًا عميقًا بعدما اطمأن.

"الحمدلله... أنا فكرت إن حاجة حصلتلك بسبب سهرك الأيام اللي فاتت."

ترد لين:

"لا، أنا كويسة. نكمل باقي الأسئلة."

يبدآن في استكمال النقاط المتبقية.

ومع مرور الوقت، ينتهي كريم من فهم كل شيء كان يريده.

تقول لين:

"أنا كده خلصت كل النقط اللي كنت باعتها. فيه حاجة تانية واقفة معاك؟"

يرد كريم:

"لا، كده كويس جدًا. تعبتك معايا."

"ولا تعب ولا حاجة، بالعكس أنا مبسوطة إني قدرت أساعدك. دلوقت تقدر تكمل مشروعك، مفاضلش وقت كتير."

"أنا هبدأ على طول دلوقت. ومش محتاج أقولك لو احتاجتي مساعدة أنا موجود أكيد."

"شكرًا ليك."

يأتي يوم الاثنين.

تدخل لين إلى الصف، لكن يبدو عليها القلق والتوتر بشكل واضح.

ينظر ريان وآدم وكريم إلى بعضهم البعض، ثم يلاحظون أيضًا غياب ماريا ولارا.

يقول ريان:

"تفتكروا فيه حاجة؟"

يرد آدم وهو يراقب لين:

"مش عارف... بس شكلها بيقول إن فيه حاجة."

ينظر كريم إلى لين بقلق.

"بعد الحصة هنعرف."

يدخل الأستاذ رضوان إلى الصف.

"كيف حالكم اليوم؟"

في الفترة الأخيرة، أصبح الأستاذ رضوان أكثر احترامًا للفتيات، فقد غيروا وجهة نظره عنهن بالكامل، وأثبتوا له أن القوة لا تعني فقط القدرات الخاصة، وأن العقل والمعرفة لا تقل أهمية عنها.

يبدأ الأستاذ رضوان في الشرح، لكن لين تظل شاردة ومتوترة، وكأن عقلها في مكان آخر.

وبعد انتهاء الحصة، تخرج مسرعة إلى الخارج.

تمسك هاتفها، وكأنها تنتظر شيئًا.

بعد أن تبتعد قليلًا عن المدرسة، يأتيها صوت من خلفها.

"لين."

تلتفت لتجد ريان وآدم وكريم خلفها.

يقول آدم بقلق:

"فيه مشكلة؟ شكلك مش طبيعي."

تجيب لين:

"لا... أنا بس مش عارفة لارا وماريا فين."

يسأل كريم:

"هما مقالولكيش إنهم مش هيحضروا النهارده؟"

تهز لين رأسها بالنفي.

"لا... أنا هحاول أوصل لهم."

تمسك هاتفها وتتصل بأحد الأشخاص.

بعد لحظات يأتي الرد.

"عمي نوح... عامل إيه؟"

"أنا كويس، إنتِ عاملة إيه؟"

"بخير... أنا بس كنت عاوزة أطمن على ماريا."

يصمت قليلًا ثم يجيب:

"هي مجتش المدرسة؟"

تتغير ملامح لين.

"إيه؟ لا... طب أنا هتصل عليها وبعد كده هطمن حضرتك."

تغلق المكالمة.

يسأل ريان:

"ميعرفش هي فين؟"

تهز لين رأسها بالنفي.

يقول آدم بجدية:

"كده الموضوع فيه حاجة غلط."

وفجأة...

يصل صوت خطوات سريعة.

تظهر لارا وهي تركض بسرعة غير طبيعية، وهي تلهث بقوة.

"لين!"

تلتفت الفتيات والطلاب إليها.

"لارا! فيه إيه؟"

تحاول لارا التقاط أنفاسها.

"ماريا... ماريا اختفت."

تتجمد ملامح الجميع.

"إيه؟ اختفت إزاي؟"

تبدأ لارا في شرح ما حدث:

"قبل ميعاد الصف طلبت مني أعدي عليها نيجي سوا. أول ما قربت من البيت، لقيت كائن واقف... مش إنسان. كان شكله مخيف."

تتوقف للحظة، وكأنها تحاول استيعاب ما رأته.

"أول ما ماريا فتحت الباب... اختفوا فجأة."

تنظر إليها لين بقلق.

"اختفوا؟"

تهز لارا رأسها.

"لكن لقيت واحد واقف ورايا... حاول يقرب مني، لكن قدرت أهرب منه."

يسود الصمت.

لأول مرة منذ دخول الفتيات إلى المدرسة، يشعر الجميع أن الخطر الذي كانوا يجهلون وجوده... بدأ يظهر أمامهم.