الفصل السابع

أتت ملك من الداخل بخطواتها السريعة المرحة، والابتسامة تزين وجهها الطفولي قائلة بلهفة: "حمد الله على السلامة يا أبيه! نورت بيتك.. أحضرلك الفطار بسرعة؟ أنا جهزت كل حاجة".

هز إسلام رأسه نفيًا وهو يجلس على المقعد بتعب: "لا ياحبيبتي تسلم إيدك، أنا فطرت بره خلاص.. قولي لي، أنتِ ميعاد درسك إمتى النهاردة؟".

أجابت ملك وهي تنظر إلى الساعة: "على الساعة اتناشر الظهر كده تقريباً".

أرجع إسلام رأسه للخلف وأغلق عينيه قائلاً: "خلاص تمام، أنا هدخل أنام شوية عشان مش قادر أفتح عيني، وابقي صحيني قبل ميعادك عشان ألحق أوصلك.. أمّال سمر فين؟ مش باينة يعني؟".

ردت ملك وهي تضع يدها في خصرها بتعجب: "سمر نزلت من شوية صغيرة راحت مشوار.. بس استنى هنا! من إمتى وأنت بتفطر بره يا أبيه؟ ده أنت مبتحبش تاكل لقمة من بره البيت أبداً، وبترجع تموت من الجوع!".

ابتسم إسلام بتعب وعفوية وهو يتذكر تفاصيل الصباح: "ياسمين.. هي اللي أصرت عليا أخد الساندوتشات والقهوة ومستسلمتش غير لما وافقت".

برقت عينا ملك بانتباه شديد وفضول أنثوي واضح، واقتربت منه قائلة: "ياسمين؟! ياسمين مين دي بقى يا دكتور؟".

تنهد إسلام بابتسامة غامضة وقال وهو ينهض متوجهاً لغرفته: "لا.. ده موضوع كبير وحكاية طويلة عريضة، هقعد أحكيهالك بالتفصيل أول ما أصحى من النوم".

تذمرت ملك طفولياً وتابعت خطواته: "هو أنا لسه هستنى لما تصحى؟! ما تحكيلي دلوقتي حالا شوية صغيرة.. 'دلوقتشي' يا أبيه لو سمحت!".

ضحك إسلام من قلبه على طريقة نطقها الطريفة وقال: "يا بنتي والله ما قادر، هموت وأنام.. لما أصحى والله العظيم هقولك على كل حاجة".

دخل غرفته وأغلق الباب، وقبل أن يغرق في النوم، تمدد على سريره وهو يتذكر ملامح ياسمين؛ تذكر كلامها الذكي، نبرة صوتها، ضحكتها الخجولة التي أضاءت وجهها الصباحي، وكم كان يشعر بسعادة غريبة وغير مفهومة بصحبتها في السيارة، لدرجة أنه لم يشعر بمرور الوقت أبداً. استرسل في أفكاره وحدث نفسه بتعجب:

"قد إيه البنت دي لذيذة ودمها خفيف وذكية جداً.. رغم كل الوجع والكسرة اللي باينة في صوتها وفي عنيها، لكن روحها لطيفة وبتدخل القلب بسرعة..". فجأة انتفض في مكانه وعقد حاجبيه بملامح جادة معاتباً نفسه: "إيه اللي أنت بتقوله ده يا إسلام؟ أنت في إيه ولا في إيه؟! البنت دي في موقف صعب وأنت المسؤول عن كسر رجلها، والمفروض تحافظ عليها لأنها أمانة في رقبتك وفي رقبة أهلك، مش تفضل قاعد تتغزل فيها وفي لطافتها كده!".

أغمض عينيه بقوة محاولاً طرد تلك الأفكار الغريبة التي تقتحم قلبه لأول مرة، واستسلم للنوم أخيراً من فرط التعب.

داخل أروقة جامعة الاقتصاد والعلوم السياسية، كانت ياسمين تسير ببطء متحاملة على عكازها وسط نظرات الطلاب الفضولية. ما إن لمحتها صديقتها المقربة "منى"، حتى أقبلت عليها بلهفة وابتسامة واسعة قائلة: "أهلاً أهلاً يا ياسمين! نورتِ الكلية يا بنتي.. كنتِ فين إمبـ...".

لم تكمل منى جملتها، وبترت الكلمات في حلقها عندما انتبهت فجأة للعكاز المعدني والجبس الضخم الذي يحيط بقدم ياسمين. شھقت بصدمة ووضعت يدها على فمها: "إيه ده؟! في إيه يا ياسمين؟ إيه اللي حصل لرجلك عملتِ في نفسك إيه؟!".

حاولت ياسمين رسم الهدوء على وجهها وقالت بنبرة خافتة: "اهدي بس يا منى مفيش حاجة تستاهل.. دي حادثة عربية بسيطة إمبارح وجت سليمة الحمد لله".

صاحت منى بزعل وإشفاق: "حادثة وبسيطة؟! وجاية الكلية النهاردة برجل مكسورة وتعبانة كده ليه يا بنتي؟ كنتِ خليكي في البيت ارتاحي كام يوم لحد ما تفكي الجبس!".

لم تكد ياسمين تجيبها، حتى انطلق صوت حاقد وسامر من خلفهما؛ كانت زميلة لهما في الدفعة، نظرت إلى عكاز ياسمين بلوى شفتين وضحكة صفراء وقالت بوقاحة: "الله! ياسمين العرجة جاية كمان بعكاز؟! هو أنتِ يا بنتي كان ناقصك عرج وضياع عشان تزودي عليه عكاز كمان؟!".

ولم يتوقف الأمر عندها، بل شاركها شاب آخر من زملائهم، ضحك بسخرية مفرطة وقال بأسلوب صبياني مقزز: "مسمهاش عرجة يا عبيطة.. دي اسمها 'أم رجل ونص'! عشان دايماً ليها رجل أطول من رجل !".

قالوا كلماتها السامة وانفجروا معاً في ضحك هابط ومستفز، متردد الصدى في الممر، دون أن يشعروا أو يهتموا بحجم الكسرة والتمزق الذي أحدثوه في قلب ياسمين التي تيبست في مكانها، وعادت بها الذاكرة فوراً لطعنات جيرانها وقريباتها في الماضي.

اندفعت منى بوجه مشتعل بالغضب تدافع عن صديقتها وصاحت فيهم بعصبية: "أنتوا مالكم أنتوا أصلاً؟! بأي حق تتكلموا معاها كده؟ أنتوا بجد بني آدمين معندكوش دم ولا إحساس ولا تربية!".

في هذه اللحظة، ورغم العاصفة التي كانت تجتاح قلب ياسمين من الداخل، إلا أنها استجمعت كل كبريائها وقوتها، ونظرت إليهم بعيون حادة وثابتة، وتحدثت بنبرة باردة كالجليد عكس كل ما يحتدم في صدرها:

"جايز أكون برجل ونص، أو عرجة زي ما بتقولوا.. بس على الأقل أنا أحسن من ناس كتير أوي هنا. على الأقل عمري في حياتي ما عايرت حد بحاجة ملوش ذنب فيها، ولا اتعاملت بمبدأ الأطفال المتخلف بتاعكم ده. المفروض إنكم كبار، وبتدرسوا في كلية محترمة ومن كليات القمة، كلية بتتخرجوا منها عشان تتعاملوا مع أرقى وأكبر فئات في المجتمع.. تفتكروا هتعرفوا تتعاملوا مع الناس برا وأنتوا عقولكم وتفكيركم بالمنظر البيئة ده؟".

احمرّ وجه الشاب غيظاً من ردها القوي المفحم، وحاول استعادة توازنه والرد بوقاحة أكبر ليجرح كرامتها وسلكها الدبلوماسي قائلًا: "وإنتِ فاكرة بقى لما تتخرجي هيختاروا واحدة عرجة ومكسرة زيك عشان تبقي سفيرة مثلاً وتمثل البلد بره؟! أنتِ بنفسك قولتيها.. إحنا بنتعامل مع أرقى فئة ومع ناس كبار وأجانب، يعني سوري يعني.. المظهر الخارجي ده مهم جداً جنب الثقافة والتعليم والمجموع.. أنتِ صحيح طلعتِ الأولى على الدفعة السنة اللي فاتت، بس في الآخر.. عرجة! أنا أصلاً مش عارف الكلية هنا وافقت على قبولك إزاي وبأي منطق!".

لم تسمح له ياسمين برؤية دموعها؛ بل نظرت إليه بتحدٍّ صارم كسر عينيه، وقالت بكلمة واحدة هزت ثقته: "هنظور ونشوف.. الزمن بينا."

ثم استدارت ببطء وتحاملت على عكازها وانصرفت من أمامهم بخطوات واسعة رغم الألم، وهي على وشك البكاء والانفجار. أسرعت منى خلفها ولحقت بها، وحاولت تهدئتها وهي تمسح على كتفها قائلة بمرارة: "ماتزعليش نفسك يا ياسمين عشان خاطر ربنا.. دي ناس فاضية ومريضة من جوه ومن بره، وغيرانين منك ومن نجاحك وترتيبك عليهم.. متحطيش كلامهم التافه ده في دماغك أبداً!".

تنحنحت ياسمين بصوت مخنوق بالدموع، وقالت بوجع دفين: "هما مش في دماغي أصلاً يا منى.. هما أقل بكتير من إني أفكر فيهم.. هما بس.. هما بس بكلامهم ده بيفكروني بحاجات ووجع بقالي سنين بحاول أنساه وأتخطاه.. بيثبتوا لي إن المجتمع ده مبيرحمش".

دمعت عينا منى حزناً على صديقتها وقالت بحنان: "اهدي يا حبيبتي اهدي.. منهم لله ربنا ينتقم منهم.. تعالي ندخل الحمام اغسلي وشك واهدي خالص عشان وراكِ محاضرة مهمة جداً ومينفعش تضيع منك".