الفصل السادس

تابع إسلام حديثه بلهجة قاطعة تحمل كل حرص الأخ الأكبر:

"لا يا حبيبتي، مش هبقى مطمن أبداً وأنتِ لوحدك في البيت، بالي هيبقى مشغول بيكِ ومش هعرف أركز في شغلي ولا في الحالات اللي معايا.. وبرضه خلي بالك من الفون وجنبك على طول عشان لما أرن عليكي تردي، واقعدي ذاكري يا حبيبتي.. عاوزين مجموع كويس يرفع الراس السنة دي".

ابتسمت ملك بامتنان، واقتربت منه تطبع قبلة خفيفة على خده قائلة: "حاضر يا أبيه، متقلقش عليا أبداً.. ترجع بالسلامة".

قضى إسلام الليل بطوله في عمله، يتنقل بين غرف العمليات والحالات الحرجة. إن عمله كطبيب تخدير يجعله دائماً في حالة من التوتر واليقظة التامة، وخوف مستمر على حيوات المرضى وأنفاسهم إلى أن يستيقظوا بأمان ويعودوا إلى وعيهم. يرى في مشفاه من الحالات الكثير والكثير، وجميعهم يؤلمه حالهم وتعتصر روحه لأجلهم.

كثيراً ما قالوا له زملائه الأقدم: "ستعتاد على هذا الأمر بعد ممارسة المهنة لفترة، ستصبح مشاعرك أكثر جموداً"، وها هو يعمل بها منذ سنوات ولم يعتد يوماً، بل ما زال يتألم لألم كل مريض يمر تحت يديه وكأنه أول حالة يراها.

انتهت آخر عملية جراحية منذ ساعة كاملة، واطمأن على استيقاظ الحالة واستقرار علاماتها الحيوية. تنهد إسلام بعمق وهو يحدث نفسه: "أستطيع أن أرتاح الآن.. لقد أذن الفجر منذ قليل، سأصلي أولاً.. كان جسدي يصرخ طالباً النوم، لكن الصلاة أولاً يا دكتور".

استلقى على الأريكة في مكتبه بعد الصلاة، ولم يشعر بنفسه إلا وهو يغرق في نوم عميق، ليرن صوت الممرضة هناء فجأة وهي تهزه برفق: "دكتور إسلام.. دكتور.. يا دكتور إسلام".

فتح عينيه بصعوبة وتمتم بنعاس: "امممم.. في إيه يا هناء؟".

ردت هناء وهي تنظر إلى ساعتها: "اصحى يا دكتور، الساعة دلوقتي بقت سبعة الصبح، وأنت كنت قايلي أصحيك عشان عندك ميعاد مهم بعد ما تسلّم الشيفت".

انتفض إسلام من مكانه بزعر ونعاس وهو يحاول استجماع وعيه: "أيوة.. صح.. أنا هقعد أوصل ياسمين الجامعة!". وما إن نطق باسمها حتى تذكر ملامحها الشاحبة وفاق تماماً، وسأل بلهفة: "قلتِ لي الساعة كام دلوقتي؟".

أجابت هناء بدهشة: "سبعة يا دكتور.. بس ياسمين مين دي؟".

أجابها وهو يرتدي معطفه مسرعاً: "دي البنت اللي خبطتها إمبارح.. اعمليلي فنجان قهوة بسرعة عشان أفوّق وأنا هغير هدومي في ثواني".

ابتسمت هناء قائلة: "حاضر من عينيا يا ابني".

أخذ منها القهوة وتجرعها دفعة واحدة، ثم قال بامتنان: "تسلم إيدك يا هناء، تعبتك معايا.. أنا كده مضيت في الدفتر وسلمت النبطشية.. يلا سلام".

بعد حوالي ساعة إلا ربع من القيادة، وصل إسلام بسيارته أسفل بنايتها، وأخرج هاتفه ليرن عليها. انطلق صوتها الهادئ عبر الخط، فقال بنبرة مهذبة: "آنسة ياسمين، أنا وصلت تحت العمارة.. أنتِ جاهزة دلوقتي ولا أستنى شوية؟".

ردت ياسمين بسرعة: "لا أنا جاهزة وهنزل على طول.. بس اطلع فوق افطر معانا أو اشرب قهوة أولاً".

أجابها إسلام بامتنان: "شكراً جداً والله يا آنسة ياسمين، بس بلاش عشان منتأخرش على مواعيدك".

قالت ياسمين: "حاضر، أنا نازلة فوراً أهو".

بعد عشر دقائق، فُتح باب البناية ودلفت ياسمين تتوكأ على عكازها وتجر قدمها المجبرة بصعوبة، وكان بيدها حقيبة وحافظة حرارية. اقتربت من السيارة وقالت بنبرة خجولة: "معلش اتأخرت عليكي.. على ما ماما عملت الساندوتشات والقهوة دي عشانك.. وقبل ما تعترض، أنا عارفة إنك راجع من المستشفى وتعبان ومفطرتش أكيد، وعملت حسابك عشان تيجي بدري في ميعادك".

ابتسم إسلام بود حقيقي لمس قلبه، ومد يده يأخذ منها حقيبتها ليضعها في المقعد الخلفي قائلاً: "مكنش في داعي وتتعب نفسها بس.. كتر خيرها".

ردت ياسمين وهي تجلس بجواره بعفوية: "ما أنت تاعب نفسك وهتوصلني.. الفطار هو اللي هيتعبنا يعني؟".

أدار إسلام محرك السيارة، والتفت إليها يسألها: "قلتِ لي بقى.. جامعتك فين؟".

أجابت ياسمين: "جامعتي في..."

سألها باهتمام وهو يراقب الطريق: "بتدرسي إيه يا ياسمين؟".

تنهدت بعمق وقالت: "بدرس اقتصاد وعلوم سياسية، في الفرقة الثانية.. كان زماني خلصت واتخرجت من فترة، بس بعد الحادثة القديمة مقدمتش ورقي وفضلت حوالي تلات سنين م بطلعش من باب البيت".

رفع إسلام حاجبيه بدهشة وقال: "اشمعنى اقتصاد وعلوم سياسية؟ قليل أوي اللي بيدخل الكلية دي، ومعظمهم بيكونوا ولاد السياسيين وأعضاء مجلس النواب والسفراء".

ابتسمت ياسمين بمرارة وعلقت: "عارفة إن محدش بيدخلها كتير، ويمكن عدد الطلاب في الدفعة ميكملش ألفين طالب.. بس أنا دخلتها لهدف معين في دماغي.. أنا كنت جايبة 99% في الثانوية، وكان ممكن أدخل طب أو صيدلة وأحقق حلمي القديم.. يمكن لو مكنتش حصلت الحادثة دي، كنت زماني دكتورة زيك دلوقتي في طب أو صيدلة، كنت بتمنى ده من كل قلبي.. بس سبحان الله، الموازين اتقلبت، وأحلامي كمان اتغيرت معاها.. ويا عالم إيه لسه هيتغير في الأيام الجاية".

نظر إليها إسلام نظرة عميقة، تحمل في طياتها مزيجاً من الإعجاب بكبريائها، والأسى على حلمها الضائع، ثم قال بنبرة فلسفية دافئة:

"كل حاجة بتحصل في الدنيا دي ليها سبب وتدبير.. إحنا بنفتكرها في الأول صدفة مجردة، بس هي في الحقيقة بتكون سبب عشان تغير حياتنا بالكامل.. وبيكون ده كله متخططله من فوق، وتدبير ربنا دايماً بيكون أحسن وأجمل تدبير لينا".

أنهى جملته الهادئة وهو يضغط على الكوابح برفق، لتتوقف السيارة تماماً أمام البوابة الرئيسية للجامعة

"عندك حق فعلاً.. تدبير ربنا دايماً بيكون هو الأحسن."

قالتها ياسمين بنبرة هادئة حملت في طياتها الكثير من الرضا الممتزج بالشجن. امتدت أصابعها الرقيقة لتقبض على مقبض عكازها المعدني البارد، وضغطت عليه بقوة وكأنها تستمد منه ثباتاً افتقدته، ثم التفتت إليه وارتسمت على شفتيها ابتسامة خفيفة، شاحبة لكنها عنيدة، وفتحت باب السيارة وهي تمتم بصوت خافت: "الظاهر كده.. مش مكتوب لي أهرب من العكاز ده كتير، كل ما أحاول أبعد عنه يرجعلي في صورة جديدة".

راقب إسلام حركتها الحذرة، وشعر برغبة عارمة في النزول ومساعدتها حتى تعبر بوابة الجامعة، لكنه احترم استقلاليتها وكبرياءها الذي يلمحه في عينيها، فسألها باهتمام وصوت دافئ: "أجيلك الساعة كام بالظبط؟ موعد خروجك إمتى؟".

التفتت إليه وهي تثبت قدمها المجبرة على الأرض قائلة: "هخلص على الساعة اتنين الظهر تقريباً.. متقلقش".

رد إسلام وهو يعدل مرآة السيارة: "خلاص تمام، هكلمك في الفون قبل ما آجي بشوية عشان أكون مستنيكي هنا في نفس المكان".

"ماشي.. شكراً جداً ليك يا دكتور." قالتها بامتنان، ثم أغلقت الباب بهدوء ملموس. وقفت لثوانٍ على الرصيف، وأخذت نفساً طويلاً وعميقاً، وكأنها تملأ رئتيها بشجاعة تكفي لمواجهة العالم بأسره. نظرت نحو مبنى كلية الاقتصاد والعلوم السياسية الضخم، ورفعت رأسها بتحدٍّ وشموخ، وراحت تُحدّث نفسها بنبرة حاسمة في مونولوج داخلي صارم:

"يعني أنا كنت ناقصة تنمر وضغط نفسي؟ أنا عارفة إن المشوار النهاردة مش هيكون سهل، ومش هسلم من نظراتهم ولا كلامهم السخيف أبدًا.. بس معلش يا ياسمين، لازم تستحملي وتكوني أقوى من الأول. كلهم هنا في الكلية شايفينك منافسة قوية ليهم، ولو اتهزيتي للحظة واحدة أو اتأثرتِ بكلامهم هتقعي وهتخسري كل حاجة تعبتِ عشانها.. وأنتِ بالذات مينفعش تضعفي، ومينفعش تخسري أبداً. أنتِ قدامك هدف كبير وغالي، ولازم توصليله وتثبتي نفسك مهما حصل ومهما كانت العقبات!".

في الجانب الآخر من المدينة، عاد إسلام إلى منزله والإنهاك الجسدي يبلغ منه مبلغه بعد نبطشية ليلية قاسية وطريق طويل. أخرج مفاتيحه ورن الجرس ثم فتح الباب بهدوء حذر كي لا يزعج أهل البيت، ودلف إلى الصالة وهو ينادي بصوت منخفض ومجهد: "ملك.. يا ملوكة.. أنتِ صاحية؟".