شيماء

عاد سامح الموظف بأحد المصالح الحكومية، والعاشق للروتين ومعوقاته، من عمله الى بيته القاطن به  بإحدى المناطق الشعبية ذات الشوارع الضيقة بعض الشيء، شاهد ابنته شيماء ذات الإحدى عشر عاماً تلعب من بعض الفتيات بمثل عمرها، ومعهن محمود ذو السبعة أعوام، ابن أحد الجيران بنفس البناية، يمسك بمرفقها، يحدثها ضاحكًا،

- مسكتك الدور عليكِ، أنت اللي فيها.

ارتسم على وجهها بسمة سعادة من الاستمتاع باللهو، تحولت إلى ذعر جلي حين سمعت صوت والدها ينادي عليها بغضب جم، أدركت هي بفطرتها الطفولية ما سيفعله بها بالأعلى، سرعان ما تحول فكرها إلى يقين عندما اقترب منها وجذبها من رسغها بعنف، ضغط عليه بقوة، تحرك يسوقها خلفه مسرعًا.

سألته بفزع:

-أنا عملت إيه يا بابا؟ والله قولت لماما قبل ما أنزل، حتي أسألها.

- اخرسي خالص، مش عايز أسمع نفس لحد ما أطلع.

استمعت أختها نادية من شباك غرفتها -المطل على تلك الجهة- لكلمات والدها الصارخة بالأسفل فأسرعت لوالدتها.

- ماما بابا تحت وبيزعق لشيماء جامد.

ردت والدتها بضيق متأففة:

-يوه، مش وقته خالص، عملت إيه أختك؟ ربنا يستر، أبوكِ لما بيعمل كده مش بيرتاح غير لما يعجنها ضرب.

استمعوا لصوت شيماء الباكي

-خلاص يا بابا، مش هعمل كدة تاني، خلاص والله.

دفعها أمامه بغضب جم؛ فتدخلت زوجته متسائلة.

- في إيه؟ البنت عملت ايه بس؟ فهمني.

-في إنك مش واخدة بالك من عيالك يا هانم، دول بنات لازم تفتحي عينك عليهم كويس، مش تسبيها تلعب في الشارع ومع أولاد كمان.

-مش أول مرة تلعب في الشارع، وأنت عارف، هيلعبوا فين يعني؟! في النادي! وبعدين ولاد أيه دول كلهم بنات، مفيش غير محمود، وعنده سبع سنين.

- اتريقي يا هانم، ده اللي شاطرة فيه، لكن تهتمي بالبنات، لأ، بناتك دول هيطلعوا بايظين وأنت السبب.

-وعلى إيه؟ بناتك عندك ربيهم لحد ما واحدة منهم تموت في إيدك، يا رب ترتاح وقتها.

ما زاده حديثها إلا غضبًا، سينصب بالكامل في تلك الطفلة المرتعدة من شدة الفزع، وبالفعل ما انهت والدتها جملتها، حتى وجدت شيماء نفسها طائرة من قوة دفع والدها لها، بداخل غرفته دفعها ناحية الفراش، ثم مد يده أعلى خزانة ملابسه أخذ عصا خرزان اشتراها خصيصًا لتأديب ابنتيه، بدأت شيماء ترجوه خوفًا مما ستتذوق بعد ثواني وجيزة.

-خلاص يا بابا حرمت والله، مش هلعب معاه تاني، خلاص والله، مش هلعب، مش هلعب خالص.

التفت إليها بغضب:

-مش عايز أسمع صوت، فاهمة؟

أومأت بذعر وبدأ هو حفلة التعذيب، عَصا تلو الأخرى، على كفيها تارة وإن تأخرت في فتح باطن كفها انهال على قدمها أو كتفها، صرخاتها دوت في المكان، سُمع صداها بساحة الشارع وما زال مستمرًا، ولم يتوقف.

تأففت والدتها من داخل المطبخ، بعد مدة نالت فيها ابنتها الكثير من الضربات حتى تورم كفيها وكل مكان حطت به تلك العصا اللعينة، توالت صرخات شيماء الراجية والمتألمة، التي من الواضح أنها ترضى والدها كثيرًا، بل بدا إنه يستمتع بها.

تقف نادية -الأخت الكبرى- بعيدًا تتابع بخوف وصل حد الهلع، شحب وجهها لمجرد الاستماع لصوت اصطدام العصا بجسد أختها، تتمنى لو تستطيع الفرار من هذا المنزل المرعب بالنسبة لها وبالتأكيد لأختها أيضًا.

طال الوقت وبدأت الأم في الاعتراض من مكانها، داخل المطبخ.

-كفاية، كفاية حرام عليك، كل يوم الجيران سامعين صوتنا، كفاية البت هتموت في ايدك.

نظرت نادية إليها دون فهم، لماذا لا تذهب إليه وتحول بينهما، لما لا تعترض بجدية دون ادعاء، إن أرادت أن يكف فلتتحرك إذن وتحاول إيقافه.

استمر سامح حتي أخرج شحنة غضبه منها، أو من يومه المرهق، أو ربما من مديره الذي عنفه بالصباح لتأخره عن موعد العمل، هو نفسه لا يعلم، ربما يحب الحالة نفسها، بالنهاية شيماء هي من تحملت اليوم، ألقى العصا على الفراش متحدثا بغضب.

-على الله تتكرر تاني ولا أشوفك تلعبي مع أي ولد سواء أصغر أو أكبر منك فاهمة.

أماءت بذعر وألم، فصرخ بها:

-امشي ساعدي أمك في تحضير الأكل.

خرجت مسرعة تبكي وتنتحب، خرج خلفها، فنظر إلى أختها وتحدث بغضب.

- يا ترى الهانم خلصت مذاكرة، ولا ضيعت اليوم.

أجابت سريعا:

-لا والله يا بابا ذاكرت، وما قومتش غير لما ماما طلبت حاجات أعملها، وهكمل بعد ما أنضف المطبخ بعد الغدا.

رد بغضب كالمعتاد:

-هنشوف، واللي مش هتسمع الكلام هي حرة، "العصا لمن عصى".

ردت الأم بغضب:

-وأنت وراك حاجة غير كده، وتدي أوامر وبس كده.

أجابها بسخرية:

-وأنت عايزاني أعمل إيه؟ أقوم أنضف لك المطبخ، ما أنا طالع عيني في الشغل، وبديكي مصروف البيت أول كل شهر.

- مصروف آه، اللي بيخلص من يوم عشرة وبنقضي الشهر خناق.

-شكلك كده، طَلبة معاكِ خناق، أنا هنام لحد الغدا ما يجهز وبعدين لو عايزة نكمل خناق عادي، أصل الجيران ما سمعوش كويس، فلازم نسمعهم على حق ربنا.

تركهن ودخل الغرفة ينعم بالنوم والراحة، تاركًا خلفه ابنتان ترتعدان خوفًا، وزوجة ناقمة، بينما هو مرتاح البال بعد أن اخرج شحنة غضبه بإحداهن.

وبغرفة الفتاتين جلست شيماء تبكي بانهيار تنظر لكفَّيها المحترقين والمتورمتين، فحدثتها نادية مؤَنّبة.

- قولت لك ما تنزليش قولتي ما أنا قولت لماما وهي وافقت، إيه رأيك بقى؟!

- المرة اللى فاتت ضربني عشان ما استأذنتش كنت فاكرة إني كدة مش هاضرب.

   - اديكِ شوفتي النتيجة اسمعي كلامي بعد كده أكبر منك بيوم يعرف عنك بسنة وبعدين مش وراكي مذاكرة هتخلصيها امتى؟

- إيدي واجعاني قوي.

- بطلي عياط وقومي خلى ايدك تحت الميه الباردة شوية وترتاحي.

استمعوا إلى صوت والدتهم بالخارج تصيح عليهما.

-هنفضل نزغي ومش هتساعدوني ولا لازم أمسك عصاية أنا كمان، والله أصحيه وأنتم عارفين هيدور فيكم ضرب وجربتم قبل كده.

انتفضتا مسرعتين تنفذان كل يطلب، حاولت شيماء تجاهل ألم يديها وجسدها حتى وضعوا الطعام على المنضدة وبقيت مهمة إيقاظ الأب لتناول الغداء، مهمة كرهتاها لما ينالهما من سبْ وتحقير.

جلسوا على الغداء اخيرًا، لم يخلوا وقت طعامهم من الكلمات المؤلمة، ولا بأس من بعض التنمر على أي من الفتاتين، لذا تكرهان وقت تجمعهم، فتأكلا سريعًا، ثم تتحججا بعملٍ لتبتعدا، فيبقي الوالدان فقط، كل منهما يلقي الآخر بوابل من الاتهامات أو من النظرات النارية، لأسباب أقل ما يقال عنها عديمة القيمة.

بعد أن انتهت كل من شيماء ونادية من تنظيف المطبخ وغسل الأطباق وإزالة مكان الطعام وترتيب كل ما هو غير منظم بالمنزل تبدئا في استذكار دروسهما، وبالطبع بعد أن انتهيا والديها من الطعام انتقلا لمشاهدة التلفاز، وانتظرا إحدى الفتاتين لتقدم لهما الشاي دون تأخير بالأكيد، وإلا سمعت ما يؤذي.

وأخيرًا انتهيتا من أعمال المنزل وجلستا لاستذكار دروسهما، حتي انتهى اليوم وبالصباح ذهبتا  للمدرسة حيث الحرية والكرامة دون إهانات بسبب أو بدون، وهناك معروفة شيماء بروحها المرحة محبوبة بين زميلاتها ومدرسيها بالرغم من ضعف مستواها التعليمي. أما نادية والتي تكبر شيماء بأربعة أعوام، معروفة بالجدية ومستواها المرتفع، استطاعت جذب أنتباه مدرسيها وكذلك حبهم لها من خلال تفوقها الدراسي، لم تكن ترى أمامها سوى مستقبلها لتستطيع التحرر من تحكم والدها والاستقلال بنفسها بأسرع وقت.