البداية

نهايات زمهرير شتاء  ٢٠٠٣

تغادر مسرعة من أسوار جامعة  حلوان غاضبة، حزينة، تصعد أول ميكروباص يقابلها، وخلفها صديقتها تحاول اللحاق بها تناديها، ولا إجابة، فاستقلت أول ميكروباص قابلها ولحقتها إلي ساحة انتظار المترو بحثت عينها بناظريها حتى وجدتها، فأسرعت إليها.

- طيف، يا بنتي بنادي عليكِ من بدري مركبة عجل في رجلك.

تنَهَدت بملل

- ما تزعليش بكرة تتصالحوا.

- سهى، أنت فاكره إني زعلانة عشان قال كدة.

-امال زعلانة ومشيتي مرة واحدة ليه؟

سألتها بتعجب من حالها، وصل المترو فصعدتا ولم تنتبها بأي عربة هما.

- أنا عارفة إني غلط من الأول، اللي مزعلني إني كنت عايزة أعمل كده وأبعد وما قدرتش خايفة، أصلا ما ينفعش وغلط العلاقة دي من البداية.

- يمكن عشان ظروفك قبلتي.

- مش مبرر صدقيني، أنا عارفة إني غلط ولازم اتحمل نتيجة غلطي.

-طيب مش هتكملي المحاضرات النهاردة ليه؟

ابتسمت بحزن مسترسلة:

-نسيتي إن أول ما الجدول نزل وبابا شافه قالي أحضر محاضرة واحدة بس عشان في بينهم ساعتين فاضيين، فممكن أفسق فيهم!

وصل المترو الي نهاية الخط الأول ثم بدل سيره للاتجاه الآخر ثم عاد بهما إلى نفس المحطة.

- شوفتي أدينا ركبنا العربية المشتركة بالغلط، انزلي هنا وارجعي عشان تحضري المحاضرة التانية وكالعادة هاتيها بكرة أنقلها منك.

- وأنت مش هتنزلي تركبي عربية السيدات.

-المترو فاضي هاقعد هناك وكلها كام محطة ونازلة الحقي قبل ما يقفل.

استجابت سهى وعادت للجامعة، جلست طيف بأحد المقاعد، وكأنت عريضة تساع فردين متقابلة يليهم كرسيان بنفس الوضع، بعد أن جلست مباشرةً أتي شاب، وجلس أمامها وتحدث مبتسمًا،

-أنا ممكن أبدل معَه ومش هفركش ما تخافيش، وهاخرجك كمان، أنا حازم وأنت اسمك أيه؟

نظرت إليه بذهول، أدركت الآن أنها، تحدثت بصوت عالٍ وسمعها من بالعربة، صدمت لكن لا وقت للصدمة الآن عليها التصرف سريعًا، رفعت بصرها قليلا؛ فوجدت ضابط يجلس خلف الشاب مباشرةً، حاولت اصطناع التّبسُّم.

- أفكر بس ممكن تخبط علي كتف اللي وراك.

فعل الشاب وهو ينظر إليها مبتسما، فقد حظى عليها بسهولة شديدة.

التف الضابط إليهما، وتحدث برسمية ظنها سيئة بالفعل.

- أفندم.

- مش الشرطة في خدمة الشعب.

رفع أحدى حاجبيه وصَمت فأكملت

- الشاب ده بيضايقني، وأنا الصراحة خايفة المترو فاضي تقريبًا.

 

ابتسم لها

- مش كنت هتفكري.

أحمر وجهها خجلًا

-احمم أنا كنت بقول كده عشان يطمن وينادي عليك.

تحدث الشاب متحفزًا:

-بقولك أيه، ما تعمليش مؤدبة، أنا سامعك والباشا كمان وأنت بتكلمي صاحبتك.

أمعن الضابط بوجهها، بينما هي صدمت بقوله، انسابت بعض دمعاتها فأمسكتها سريعًا، كادت أن تشرح وتوضح، لكن الضابط أنهى الموقف، وجه حديثه للشاب معنف إياه.

-لما يكون في ظابط واقف معاك يبقي تسكت وتبطل تقل أدبك.

- أيه يا باشا هي عجبتك ولا إيه!

- واضح إنك ناويها.

قبض على رسغه بإحكام، وسحبه باتجاه الباب.

- تعالي بقي يا حلو نشوف مين عجب مين، انزلي معانا واركبي عربية السيدات.

أماءت موافقة واقتربت بصمت.

وبالمحطة التالية هبطوا جميعًا، أشار الضابط لعسكري المحطة فاقترب سريعًا.

- امسك الأخ نشوف حكايته أيه؟

التف فوجدها بمحلها.

- ما ركبتيش ليه؟

أجابت بخجل شديد من نفسها ومما ترتب على عدم تركيزها:

- ممكن ما تأذيهوش، أنا غلطانة صوتي كان عالي، بس والله مش قصدي.

ابتسم لها بود وتحدث متسائلاً:

-يعني أنت عارفة إنك غلط! وإن اللي حصل مش مناسب مع حجابك.

أومأت بأسف فتابع

-أوعدك هربيه وبس.

-لا، لا بلاش ضرب و...

- باااس، فهمتي ايه؟ هي فوضى! هما صوتين وخلاص، ويلا المترو جه اركبي عربية السيدات عشان ما يضايقكيش حد تاني.

أجابت بابتسامة رقيقة:

-حاضر.

صعدت ولازالت محتفظة بابتسامتها، تابعته حتى اختفى الغريب إنه فعل المثل.

اتجهت إلى بيتها، تشعر داخلها براحة وسعادة، يلاحقها طيفه، وما أن وصلت ودقت الجرس تبدل حالها؛ فاستقبلها والدها بوابل من السُباب، ولم تكد ترمش عينها تستوعب ما يحدث حتى فوجئت به يجذب حجابها بعنف شديد، وما زال يلقى على مسامعها بذئ الكلمات والشتائم، على مسمع من كامل البناية كما اعتاد دومًا، تحدثت مدافعة عن نفسها متسائلة:

- آه يا بابا شعري، آه أنا عملت إيه؟ طيب حتي نقفل الباب، آااه.

- بقي أنت تستغفليني، فاكرة إني مش هاعرف، اديني عرفت وهربيكِ من أول وجديد.

دكها بالأرض وأصبحت تحت قدميه ولازال يمسك بحجابها الذي ازيل عن رأسها؛ فظهر شعرها بالكامل؛ جمعه بكف يده بإحكام وأخذ يجذبه يمينًا ويسارًا بعنف شديد، يصْفعها براحة يده الأخرى على وجهها وكل ما تطول يده

- مين ده اللي كاتب لك شعر في كشكول  المحاضرات يا هانم، يا اللي ما لكيش ظابط ولا رابط.

- مفيش حد والله، مش بدي محاضراتي لزمايلي، طيب أشوفه عشان أعرف أرد، كفاية ضرب بالله عليك كفاية.

نفض يده عنها، دفعها بقدمه بعنف شديد، وتحدث بغضب جم

- قدامي على أوضتك، وإياكِ، شوفي إياكِ تكذبي، هاعرف.

بالكاد نهضت وكامل جسدها يؤلمها بشدة، تحركت أمامه بهلع وذعر وجسد مرتعش، فلا منجد أو مغيث لها إن ثار وغضب.

وبالغرفة وقفت كمتهمة بقفص الاتهام، وهو القاضي والجلاد، قذف بوجهها أحدى الكشاكيل الثقيلة؛ فارتطم بوجهها، أصابها وشق جزء من وجنتها، تحدث بغضب.

-افتحي يا هانم، اخر صفحة مكتوبة.

فعلت بيد مرتعشة ونظرت بداخله وردت بتلقائية صادقة

-والله يا بابا دي سهى صاحبتي ده خطها كان معَها الكشكول، هي بتكتب شعر.

أجابها ولازال بحالته:

- تاني مرة لما تاخد حاجتك ما تكتبش حاجة، أو ما تاخدش منك من الأصل، قال يعني فالحة قوي، امتي يجي لك عريس وأخلص من همك، أول واحد يخبط هوافق وأخلص وأرتاح من همك أنت كمان.

ترك الغرفة وغادرها، فجلست علي فراشها بوهن تبكي بنبرة شبه صامتة كي لا يسمعها والدها؛ فتنال المزيد من اللطمات، تحدثت مناجيه

-سيبتيني ليه يا ماما؟ كنت خليكي معانا، شوفتي بابا عمل فينا إيه؟ كل شوية يتلكك على حاجة ويضربني ببقي مكسوفة لما أقابل حد من الجيران صدفة، ومنال رماها وجوزها لأول واحد تقدم لها، وافق حتي من غير ما يسألها خصوصا لما عرف إنه هيسكن في بيت عيلة ومش عايز جهاز، أنا ما شوفتهاش من يوم الفرح مش راضي نروح، عارفة أنا بس اللي بسأل عليها  وأكلمها، هو نسيها أصلًا، أنا خايفة قوي  نفسي افرح، لأ، نفسي أطمن بس، أو أروح لك.

انتفضت عندما سمعت والدها يصرخ عليها من خارج الغرفة.

-مش هنتغدي ولا إيه؟ هافضل منتظر الهانم كتير.

أجابت مسرعة تجفف عَبَرَاتها وتبدل ملابسها

-حاضر، حاضر جاية أهو بغير بس.

وبسرعة شديدة بدلت ملابسها واتجهت للمطبخ لتعد الغداء وتقوم بأمور المنزل قبل البدء بمذاكرتها ومباشرة دروسها.