الفصل السادس... شريط الذكريات

( أم محمد) تكلم نفسها ياترى يامحمد عامل أيه مع المحروسة مراته بعد طرد أهلها ؟ ربنا يستر وسهير متقلش بأصلها وتطلعه عليك حي ني لما اقوم أطلع للولد ده أشوف اخباره مع المحروسة أيه

صوت خطوات وصعود سلم ودق على الباب وصوت باب يفتح

(سهير) بإستهجان مين حماتي يأهلا وسهلا

(أم محمد) أهلا بك ياحبيبتي محمد ابني فين

(سهير) نايم تحبي أصحيه لك

(أم محمد) لا ياحبيبتي أنا هدخل أصحيه بنفسي

(سهير) تدخلي فين ياحماتي دي أوضة نومي يعني خصوصيات ومحدش يدخلها غيري أنا وجوزي

باب غرفة يفتح وصوت محمد

أمي أهلا وسهلا ياحاجة تعالي واقفة على الباب ليه ادخلي

(أم محمد) مستنية إذن البرنسيسة سهير تسمح لي بالدخول

(محمد) إذن مين يأمه ده بيتك واحنا ضيوف فيه

(سهير) بيتها ليه هو أنت مُت ولا مُت

(محمد) اخرسي ولمي الدور والا هتحصلي أهلك على الشارع

(سهير) من أمتى يأخويا صوتك علا عليا ولا عشان أهلي مشيو

(محمد) أهلك مين يازبالة يارمة هم دول أهل دول لمامة

(سهير) تعيط والله لاتصل بأخويا يجي يعلمك الأدب ويشوف ازاي تشتم أهلي

(محمد) طيب أعمليها اقسم بالله لتكوني طالق بالثلاثة

(سهير) تعيط عجبك كده ياوش البومة

(محمد) يضربها بالقلم محذرا أياك اسمعك تشتمي أمي ثاني أيه أنت لسه فاكرة إني عايش في غيبوبة حبك لا يا هانم خلاص أنا فوقت من يوم مالست أختك طولت لسانها على أمي فاهمة

(سهير) مبسوطة كده خلتيه يمد ايده عليا

(محمد) وكلمة زيادة هكسر رقبتك فاهمة ادخلي يأمي بيتك ومطرحك

(أم محمد) والله يابني مش قصدي تزعلوا من بعض أنا طلعت بس أطمن عليك بعد خروج المخفين أهلها ولم اسمع صوتك وحشتني يامحمد فطلعت اطمن بس

(محمد) يأمه متقوليش كده البيت بيتك واى وقت تطلعي وتدبي برجلك ربنا لا يحرمني منك أبدا

وينادي سهير هاتي لأمي حاجة تشربها

(أم محمد) لا ياحبيبي مش عاوزة حاجة أنا خلاص اطمنت عليك وهنزل شقتي

صوت خطوات وزعيق سهير تخاطب بنتها المولودة بس يابنت اسكتي خلاص هنسيبها لأبوك وأمه مخضرة يشبعوا بيها وتوجه كلامها لمحمد اشبع بيها يأخويا أنا رايحة عند أهلي أصلا أنا غلطانة اني قعدت معاك من الأول وكان لازم أروح معهم

(محمد) هتروحي فين الشارع! أبوك وأمك واختك قاعدين في بير السلم عند عمتك البخيلة وبيأكلوا من الزبالة يلا غوري روحي للبيئة اللي لميتك منها

(سهير) والله لأقول لأبويا وأخويا يعلموك الأدب

(أم محمد) أدب مين يابت أنت نسيتي أصلك ولا أيه أخوك مين ولا أبوك مين طيب ابعثيهم وأنا ياست هرجعهم لك ممسوح بكرامتهم الأرض أيه يابت أسالي أبوك احنا مين وكان هيموت ويناسبنا ليه يلا غوري من هنا وتعملي حسابك عاوزة تخرجي من هنا لما أبوك وأمك ميعرفوش يأكلوك وده اللي هيحصل محدش يجي يرجعك البيت مفتوح ياحيلة أمك أبقي تعالي زي ما خرجتي

(سهير) مش جاية وخلي ابنك يطلقني

(محمد) بقى كده طيب هاتي البت مش هتأخديها معاك بنتي مش هتتربى في بير السلم مع أهلك البيئة

(أم محمد) البت بترضع يامحمد مينفعش تسيبها

(محمد) اللبن الصناعي موجود وبعدين البت هتتربى هنا معك ومع أختي في بيئة نضيفة

(سهير) أنت فاكر أنك هتلوي دراعي عشان البت يبقى بتحلم

(محمد) ماشي ياشاطرة بس قولي لأبوك ميجيش يعيط عشان يرجعك ياعيلة جعانة

(سهير) هنزل اشتغل وأعيش حياتي وابقي وريني هتعمل أيه ياسي محمد وبنتك عندك ربيها بمعرفتك

(محمد) وماله على الأقل أنا عندي أم شبعانة تشم ضهر ايدها تشبع مش زي أمك الجعانة أم عين فارغة

(سهير) والله لأبهدلك في المحاكم

(محمد) وماله لما أهلك يلاقوا لقمة يأكلوها الأول ابقى وكلي محامي واعملي اللي أنت عوزاه ولا تحبي أوكلك أنا محامي تبعي

سهير تخرج وترزع باب الشقة وراها

(أم محمد) ليه كده يامحمد بس ذنب البت الغلبانة دي أيه دي لسه رضيعة ومحتاجة لبن أمها

(محمد) خلاص يأما هوديها لدكتور الأطفال حالا يوصف لها لبن مناسب وارجع لك وأنا واثق هتتربى أحسن مليون مرة من تربيتها مع أمها دي هترضعها كره لينا وحقد علينا

(أم محمد) والله يابني شوية وهتلاقي أبوها جايبها وجاي

(محمد) عارف يأما دأنا كل ماشريط الذكريات يمر في دماغي من يوم معرفتهم لحد النهاردة أبقى عاوز أضرب نفسي بالجزمة للدرجة دي أنا مغفل وكنت عايش في غيبوبة الزفت الحب

(أم محمد) معدش يجي منه خلاص اتورطنا وخلاص المهم البت دي يلا الحق دكتور عبد القادر اللي في أول الشارع وديها له يوزنها ويقرر هتأخد لبن أيه وأنت راجع فوت على الاجزخانة هات اللبن وتعالى عشان البت تأكل وقبل ماتصحى وتخوتنا عياط

(محمد) دكتور عبد القادر مين يأمه ده دكتور البهايم دكتور بيطري!

(ام محمد) ياوله بيفهم أحسن من أي دكتور بشري وطول عمري بروح له بيك وبأختك وبيوصف العلاج التمام

(محمد) عشان كده يأمه

(أم محمد) عشان كده ايه يامحمد؟

(محمد) يضحك طلعت حمار واتجوزت سهير اللي كل الناس قالت ليا بلاش وأنت اولهم وركبت دماغي وصممت واتجوزتها وجبت وجع الرأس ليا فهمت دلوقتي ليه

(ام محمد) تضحك يامجرم بقى كده طيب أمشي يلا روح ودي بنتك زي ماتحب بس والله ما هتلاقي زي دكتور عبد القادر

صوت خطوات ونزول سلم وخروج للشارع وصوت دوشة الشارع وبياع الخضار ينادي حلوة وحمرا ياقوطة

محمد يدخل عيادة الدكتور سامي علام طبيب الأطفال ويسأل الدكتور موجود

(الممرضة) نعم يافندم موجود كشف ولا إعادة

(محمد) كشف ويدفع ثمن الكشف

(الممرضة) تقدر تنزل دلوقت وتبعث الأم مع البنت الساعة عشرة بالليل

(محمد) نعم الساعة كام ليه دالبت تموت من الجوع

على كده بقى أسمع كلام أمي وأودي البت لدكتور البهايم

(الممرضة) مش فاهمة حضرتك تقصد أيه يافندم

(محمد) ولا حاجة هاتي الكشف

(الممرضة) ليه بس يافندم

(محمد) البت جعانة وأنا جاي للدكتور يوصف لها لبن بس مش أكثر

(الممرضة) كله بالدور يافندم الا إذا

(محمد) إذا أيه عاوزة إكرامية قولي كام وخلصينا

(الممرضة) أيه يافندم الإسلوب ده إكرامية أيه فيه كشف مخصوص إذا عاوز لا تنتظر دور وتدخل فورا

(محمد) طيب ماتقولي كده من الأول بكام المخصوص ده

(الممرضة) خُمس مائة جنيه

(محمد) كام خٌمس ميه مرة واحدة ليه هي ولادة

(الممرضة) هو فيه ولادة بكدة يافندم الولادة بتتكلف آلافات

(محمد) عارف يأختي عارف هاتي فلوس الكشف

(الممرضة) ليه يافندم حضرتك هتكمل بس عليهم وتدخل فورا

(محمد) لا ياستي هروح للدكتور عبد القادر أنا غلطان مسمعتش كلام أمي من الأول مني قدامك اهو حلو ولا شيفاني بنحق زي الحمار

(الممرضة) مش فاهمة يافندم

(محمد) مش مهم مش لازم تفهمي هاتي فلوس الكشف

(الممرضة) اتفضل يافندم

محمد يخرج من عيادة طبيب الأطفال وينزل السلم ويسمع بالشارع أصوات السيارات ثم يسمع حد بيقوله بتريقة اللي جابلك يخليلك ياحودة

يلتفت محمد ليرى إبراهيم ابن خالته سامية وزوج أخت سهير فيتلفظ بأقذر الشتائم والسباب له ويجري لوضع ابنته عند أمه ليعود لابن خالته ليثأر لكرامته منه