الفصل الثالث.... معدش يفيد الندم

(الأم) اسم الله اسم الله سامع يا حبيب والديك امال لوكنتوا عملتوا حنة للعروسة وعزمتوا الناس كنتوا عملتوا ايه ده حتى في التنجيد احنا اللي اشترينا ساقع وأكل للمنجد والناس اللي جت تبارك

(محمد) خلاص ياماما مش حكاية اطلبي بابا يجيب لنا غدا ويعمل حساب أخت مراتي معانا

(أخت مراته) لا أنا اتغديت أنا جاية اطمن عليكم وخلاص هطلع أبص على أختي وأروح

(الأم) والله تبصي طيب ماكنتي يأختي كلمتيها فيديو من بيتكم واطمنتي عليها بدل مأنتي جاية ايد ورا وايد قدام

(أخت العروسة) تشخط في العريس متشوف أمك يامحمد

(الأم) يشوف أمه لا يأختي اطلعي أنت شوفي المحروسة أختك

وأنت يامعدول انزل هات الأكل من أبوك وأسأل أخت المحروسة هيبعثوا أكل بكرة ولا زي النهاردة مفيش عشان أعمل حسابكم معنا

واسالها بالمرة فيه سبوع وكحك وبسكوت ولا هو كمان بقي موضة قديمة

(محمد) يأما الله يصلح حالك عديها بقي وبلاش تحطي أهل مراتي في دماغك خلاص بقي احنا اتجوزنا وأنا مليش الا هي وبس

(الأم) لا ياحبيبي الواحد لما يتجوز بيجوز أهلها معاها عشان كده المثل بيقول (حاسب قبل ما تناسب)

(محمد) ماما أنا طالع شقتي سلام

صوت جرس وخبط جامد على الباب

(الأم) استر يارب استر فيه ايه اصبر ياللي على الباب اصبر

باب يفتح

محمد فيه ايه يابني مالك خير

(محمد) خير يأمي يلا بسرعة البسي عشان سهير بتولد

(الأم) متولد أنا مالي يخرب بيت عقلك خضتني افتكرت جرالكم حاجة

(محمد) مالك ايه ياما ده أول حفيد يلا عشان نروح المستشفى

(الأم) اروح فين وأنا مالي اطلب أمها وأختها يأخويا

(محمد) طلبت يأما طلبت بس لازم تكوني موجودة

(الأم) ليه أن شاء الله؟

(محمد) ده أول حفيد يأما

(الأم) واسم الله عليه حالف مينزلش الا لما أكون موجودة روح ياوله مع حماتك وأنا هحصلك بعد الضهر لما اصحي أبوك واعطيه علاجه وينزل البحر أحصلكم على طول

(محمد) مينفعش يأما

(الأم) ليه مينفعش ايه قلت نفعه

(محمد) المستشفى لازم ندفع فلوس الولادة واجرة الدكتور مقدم

(الأم) وماله ياحبيبي ادفع

(محمد) طيب يبقي لازم تكوني موجودة عشان تدفعي

(الام) نعم يأخويا ادفع ليه هو أنا اللي هولد

(محمد) لا مراتي بس مفيش معايا فلوس

(الأم) وايه الجديد مأنت من يوم ماخطبت المعدولة ومفيش معك فلوس الناس بيقولوا ابنك شغال الصبح في وظيفة حكومية بمرتب والضهر شغال في ورشة وبالليل واقف مع ابن عمك ف السوبر ماركت يعني ثلاث شغلات ومش ملاحق ودايما مديون ايه ياوله هو فيه ايه فعلا الناس أقدام

(محمد) يأما خلاص بقي مش وقته هاتي فلوس الولادة ومش عاوزة تيجي خليكي

(الأم) مفيش فلوس روح خد من حماتك ولا من أختها مش دول اللي قاعدين ليل ونهار عندك ولا خد من حماك اللزقة اللي قاعد لك ف الورشة أربعة وعشرين ساعة يطلب أكل ديليفري وشاي وقهوة اكنك اتبنيته ولا اتجوزت بنته عشان تصرف عليه ناس جعانة فعلا

(محمد) هو ده وقته هاتي الفلوس خليني أروح المستشفى

(الام) مفيش فلوس قلت يلا امشي من قدامي وتقفل الباب في وشه

(محمد) يأما يأما

(الأم) أعوذ بالله

صوت خطوات وزغاريد

(أخت الزوجة) اهي أمك جت يامحمد المستشفى يلا هات منها الفلوس خلينا نحاسب المستشفى ونمشي

(الأم) وأنت يأختي مستنية أمه عشان تحاسبي متحاسبي أنت ولا أمك ولا أبوك

(الأخت) وأنا مالي هي مراتي أنا ولا مرات ابنك عشان أحاسب أنا

(الأم)والله بس فالحة أنت وأمك

(محمد) ياما مش وقته يلا حاسبي المستشفى عشان نمشي يلا عشان تشوفي (آيات)

(الام) آيات مين مهي حماتك قاعدة قدامي اهي متشوفش وحش

(محم) لا يأمه آيات حفيدتك

(الأم) مين؟ وكمان سميتها على اسم حماتك

طب والله مأنا دافعة ولا مليم خلي المعدولة حماتك تدفع امشي من قدامي ويمين كمان مأنا دافعة

(محمد) يأما الناس بتتفرج علينا

(الأم) تتفرج دانا قعدت أترجى مراتك تسمي البت على اسمي تقولي اسمك قديم ياطنط

بقى (فاطمة) اسم قديم وآيات اسم جديد طيب والله مأنا دافعة روح خلي حماتك الغالية تدفع لك أنا ماشية

(محمد) ياما استني مينفعش كده

(أخت الزوجة) والعمل يامحمد أنت عارف مفيش فلوس نحاسب المستشفى

سامية الخالة وأنتم من امتي معاكم يامرات ابني؟

(أخت الزوجة) بقولك ايه ياولية أنتي اقعدي ساكتة لتمشي من هنا مش ناقصينك أنت ولا أختك

(سامية) باني يأختي على حقيقتك باني

(محمد) وده وقت تصفية حسابات ياخالتي

سبيني في مصيبتي هتصرف ازاي وأجيب فلوس المستشفى منين متسلفيني ياخالتي

(سامية) اسلفك وهي المحروسة أخت مراتك سايبة ليا قرش عشان أسلفك مهو إبراهيم ابني عامل فيا زي مأنت عامل ف أمك من يوم معرفتهم منين ياحبيبي مكنش يتعز يلا روح ورا أمك استسمحها وأمك طيبة هتيجي تحاسب المستشفى

(أخت الزوجة) طيبة دانتم كلكم سلالة واحدة

(سامية) أحسن منكم على الأقل مش عايشين سُحت على قفا غيرنا زي عيلتك

(محمد) ياخالتي الله يصلح حالك كفاية قومي روحي قومي

(سامية) بتطردني عشان أخت مراتك

(محمد) مهي مرات ابنك ومش وقت تصفية حسابات بينكم كفاية الهم اللي أنا فيه

(سامية) أنت لسه شوفت حاجة نصحتك وقلت لك كفاية مغرفة واحدة من نفس الحلة وأنت مسمعتش الكلام خلاص اشرب

(محمد) ايه ياخالتي شمتانة فيا

(أخت مراته) سيبك من الست الخرفانة دى يامحمد وانزل استلف الفلوس خلينا نخرج شكلنا بقي وحش قوي قدام إدارة المستشفى

(سامية) الأمر لله الحق أختي أجيب منها الفلوس ونحاسب المستشفى وخليك أنت مع النسب اللي يشرف

صوت خطوات

(سامية) استني يأختي استني يام محمد تعبت جري وراكي اهدي، وتعالي

(الأم) أنت عاوزة ايه أنت كمان

(سامية) معدش يجي منه يلا تعالي حاسبي المستشفى مأنت عارفة دول ناس جبلة مش هيعملوا حاجة غير أنهم يغرقوا ابنك يلا يأختي استهدي بالله وتعالي حاسبي المستشفى

(أم محمد) عاوزة أأدبه يأختي وأشوف هيتصرف ازاي

(سامية) تأدبي مين ده خلاص بقى شبهم مش بيتكسفوا ولا بيتلموا يلا ياحبيبتي ادفعي خليهم يروحوا

(أم محمد) الأمر لله عشان الفضايح بس والله هدفع

(سامية) تعيشي وتدفعي ياحبيبتي أنت لسه شوفتي حاجة

(الأم) هشوف ايه مرار أكثر من كده

(سامية) لسه البمبرز ولبن البت لسه كثير وأكل الجرمق ده كله دول ناس نتنة هيفضلوا عَلَى قلب ابنك لحد مايعلن افلاسه وتجيبي اخرك مانت شايفة إبراهيم ابني كان فين وبقي فين بقي شحات والبركة فيهم

(الأم) الله يبشرك بالخير ياريتني سمعت كلامك وكلام عمته يلا معدش يفيد الندم

(سامية) لا يأختي معدش يلا خلينا نخلص وربنا يقدرك على اللي جاي

(اأام) ايه ثاني؟

(سامية) بكرة تشوفي مستعجلة ليه اصبري

خطوات جرس الباب

(الأم) أهلا يامحمد ايه أهل مراتك مشيوا ولا لسه لازقين من يوم الولادة

(محمد) فيه ايه يأما أنت شيلاهم على دماغك مهم قاعدين عندي فوق