الفصل الرابع... ناس جِبِلة باردين

(الأم) آه ياحبيب أمك قاعدين عندك فوق مع أن المفروض كانت مراتك تخرج من المستشفى على بيت أمها عشان تخدمها للسبوع وبعد كده مراتك تشرف بيتها لكن هم أصروا ترجع بيتك وهم يجوا يخدموها قلت ماشي يابت اهو أسبوع ونخلص من المولد ده الأسبوع بقى شهر والشهر بقى اثنين وثلاثة هنفضل في الهم ده لامتي يامحمد

(محمد) يأما دول قاعدين عندي مش عندك

(الأم) لا والنبي كنت هاتهم عندي بالمرة ياوله خلي عندك دم أبوك عيان ومعدش بينزل واللي جاي على قد اللي رايح وأنا زهقت هاتي يأما هاتي يأما ايه هي أمك دي ايه البنك المركزي وبعدين أنا أعرف حماتك تقعد عندك فوق أخت مراتك ليه وجوزها وثلاث عيال ليه وأبوها وأخوها ليه؟

(محمد) يأما كبري دماغك أهم بيخدموها

(الأم) يخدموها ومين بيأكل كل دول مش أنا يوله خليهم يروحوا بيتهم بقى أنا تعبت اجيب لك منين واأت جبلة مش بتحس أناني مش بيهمك الا نفسك

(محمد) يأمه مأنا بشتغل ف ثلاث شغلانات بس الفلوس مش مكفية

(الأم) ولا عمرها هتكفي تكفي كل دول ازاي طيب إبراهيم جوز أختها قاعد أكل شارب نايم بيعمل ايه فوق؟

(محمد) مهو ابن أختك أعمله ايه؟

(الأم) آه ابن أختي بس قاعد فوق بصفته جوز المحروسة أخت مراتك أقولك أنا هطلع اطردهم كلهم يروحوا بيتهم كفاية كده

(محمد) وتكسفيني قدامهم يأمه أرجوكي

(الأم) يخرب بيتك أنا تعبت أنت عيل بارد يلا قول كنت جاي ليه خلصني وأمشي من قدامي

(محمد) عاوز كام كيلو رز

(الأم) كام كيلورز ليه ده شيكارة الرز جيباها لك من أسبوع لحقت تخلص

(محمد) معلش يأمه أرجوك كفاية تقطيم بقى هاتي الرز خلينا نطبخ

(الأم) خد منك لله أنت وأهل مراتك يلا امشي من قدامي

خطوات باب يقفل يرزع

صوت صريخ وزعيق

(الأم) فيه ايه ربنا يستر وتجري على السلم لتصعد شقة ابنها يامحمد فيه ايه عندك يابني مراتك بتصرخ ليه فيه ايه اوعى تكون بتضربها ياوله

(أخت الزوجة) يضربها دانا أكسر ايده

(الأم) كسر حُقك ياشيخة أنت لسه هنا بتعملي ايه ياباردة يارخمة

(أخت الزوجة) بيت أختي وأنت مالك

(الأم) ملتي على جنابك ياشيخة يلا خدي عيالك وجوزك أرخم خلق الله وامشي من هنا وبالمرة خدي أمك وأبوك عديم الفايدة ده يلا غوروا من بيت ابني

(الأخت) ابنك لا ياحبيبتي ده بيت أختي وبنتها أنت اللي تنزلي من هنا ومتطلعيش هنا ثاني

(الأم) يخرب بيتك ويخرب بيت بجاحتك بتطرديني من بيت ابني يابت ده بيتي ولا نسيتي

(الأخت) لا منسيتش بس ده بيت أختي وهي حاضنة يعني ملكيش فيه

(الأم) طيب لما يجي ابني نشوف الكلام ده

(الأخت) ولحد مايجي ابنك يلا انزلي من هنا

(الأم) يخرب بيتك خرابة البيوت مش نازلة الا لما أعرف سبب الصراخ ده

(الأخت) بتخانق أنا وجوزي أنت مالك

(الأم) مالي طيب يأختي روحي بيتك واتخانقي مع جوزك هناك براحتك

(الأخت) قلت لك أنا في بيت أختي يلا انزلي بيتك ياولية أنت بلاش وجع دماغ

(الأم) وجع دماغ ياعيلة جعانة والله لأخلي ابني يطلق أختك ويرموكم ف الشارع

(الأخت) قلت لك أختي حاضنة أعلى مافي خيلك اركبيه

(الأم) ربنا ينتقم منك ياشيخة وتعيط ياريتني سمعت كلام أختي وكان كفاية من الحلة مغرفة واحدة

(الأخت) يلا ياولية غوري من هنا

(الأم) فعلا اتمسكن لحد ماتتمكن

(الأخت) قولت غوري امشي ولا أرميك على السلم

(الأم) منك لله يامحمد منك لله

(الأخت) خديه عندك يأختي يونسك ده حتى الشقة يدوب على قدنا

(الأم) أخده عندي ليه هو بيتك ولا بيت ابني

(الأخت) ابنك لا يأختي بيت أختي يلا امشي انزلي من هنا وياريت تسمعي الكلام وتاخدي ابنك عندك توسعي مكان

(الأم) تبكي وتنزل تدخل بيتها

الباب يخبط وصوت خطوات

(محمد) السلام عليكم ورحمه الله وبركاته يأمه مش قلت لك يأمه بلاش تطلعي فوق وتزعلي الجماعة

(الأم) بلاش اطلع فين وازعل مين يخرب عقلك بتلومني بدل ما تبهدل أخت مراتك اللي طردتني من بيتك طيب ويمين بالله يامحمد إذا مامشيوا من البيت وطردتهم لأعمل لك قضية طرد واطردك معهم

(محمد) اطرد مين يأمه أصلا أختها أصحاب البيت اللي هي ساكنة فيه طردوها عشان إبراهيم ابن أختك مكسور عليه إيجار سنة

وأمها بيتها وقع وعاوز يترمم ومفيش معهم فلوس لكل ده يبقى نستحمل وخلاص

(الأم) استحمل أنت لكن أنا ذنبي ايه

(محمد) عشانك أمي لازم تتحملي عشان خاطري

(الأم) جوزتك جوازة الندامة عشان استحمل عشاني أمك بدل مأرتاح أصرف عليك وعلى الانطاع دول

لا والله إذا ماخرجوا من الشقة لطرداكم كلكم منها

(محمد) أهون عليك يأمه

(الأم) تهون إذا كنت هونت عليك وأخت مراتك طردتني من شقتك ومش عاوز تطردها

(محمد) هتروح فين يامه بس؟

(الأم) وأنا مالي تروح في داهية هي والنطع اللي متجوزاه

(محمد) عشان خاطري يأمه عديها وخلاص

(الأم) اعديها يبقي لا أنت ابني ولا أعرفك خليك في حالك ابعد عني ملكش دعوة بيا ولا بأبوك وأختك سامع

(محمد) يأمه حرام عليكي وأعيش ازاي ده مفيش اي فلوس مكفية أعمل ايه أموت نفسي انتحر يعني

(الأم) لا ياحبيبي لا تنتحر ولا حاجة أنا هتصرف

(محمد) ازاي بقى ولا أقولك اعملي اللي أنت عوزاه المهم الوقت هاتي ٥٠٠ جنيه اجيب اكل للناس اللي فوق دول

(الام) يابجح ابعد عن وشي

(محمد) يأما يأما هجيب منين بس معدش حد راضي يسلفني

(الأم) أيوة أنا سديت كل اللي أنت سلفه من الناس ونبهت عليهم إذا سلفوك ثاني مش هسد ويبقوا بقى يسجنوك خلي مراتك وأهلها يرتاحوا

(محمد) وده يرضيك يأمه

(الأم) لك مو ابعد ياوله من وشي منتاش مكسوف يخرب بيتك امشي من وشي

وتقفل الباب وتكلم نفسها والله لأنا لأنتم في البيت ده استنوا عليا ياعيلة جعانة

صوت الفون

(الأم) أيوة يامتر مصطفى ازيك

(المحامي) الحمد لله أخبارك يأم محمد

(الأم) والله يامتر مصطفى الأخبار وحشة جدا عشان كده اتصلت بيك تشوفلي صرفة في الهم اللي أنا فيه

أنت عارف إن البيت بتاعي أبويا كاتبه باسمي من قبل موته وكتب لأختي (سامية) شقة رأس البر وهي اللي طلبت القسمة تكون كده وأبويا خاف عمامي يورثوا معنا عشان كده وزع الورث علينا في حياته الله يرحمه المهم أنا عاوزة أرفع قضية طرد على ابني محمد عاوزة أخرجه من البيت

(المحامي) ليه بس ياحاجة قلبك أبيض

( الأم) معلش يامتر من فضلك خدني على قد عقلي

(المحامي) زي ماتحبي ياحاجة

(الأم) ماشي يامتر هحول لك الفلوس فودافون كاش بس مش عاوزة حد يعرف ولا حتي محمد عاوزة اخلص من أهل مراته اللي احتلوا الشقة ومنغصين علينا الحياة

(المحامي) طيب وإعلان القضية هنعمل فيه أيه؟

لا ميهمكش ابعث على عنوان بيت أبويا القديم وهو ميعرفش مش مشكلة ابقى راضي المحضر ماشي يأخويا هعمل حسابي في فلوس له راضيه أنت وخلصني من المصيبة دي لكن اعلان الطرد ابعثه على عنواني هنا تمام ألف شكر يامتر