الفصل الرابع والعشرون.....العشا على العريس

أم محمد رغم عدم قدرتها على النطق تصرخ وتمد يديها لتمسك محمد وتحاول أن تثنيه عن فعله ولكنه أصر على طلاق سهير وطرد أمها وأبيها من منزله

(سامية) يلا ياحلوة أنت وجوزك مع السلامة من غير مطرود

(أم سهير) شمتانة فينا ربنا ينتقم منك

(أبو سهير) هات البت آيات عشان دي من حق أمها

(محمد) هتربيها فين في بير السلم

(أبو سهير) لا في شقتك فوق وهنيجي كلنا نقعد على قلبك فوق من بكرة هروح للمحامي وهخرب بيتك قضايا

(محمد) يلا يارجل أنت أخرج برة واحلق شنبي وميبقاش على رجل إذا عتبت هنا ثاني أنت ولا المحروسة بنتك يلا برة ويشده يرميه على السلم

(أم محمد) تبكي وتنوح

(محمد) اهدي يا أما مش هيدخلوها ثاني أنا روحت للأستاذ مصطفى المحامي وفهمني أعمل أيه

(سامية) هو أنا مش بحبهم بس مكنش وقته اليومين دول يا محمد

(محمد) اسمعي يا خالتي أنت هتروحي الوقت دار المسنين اللي أنت عايشة فيه هتجيبي حاجتك أنت وجوزك وتيجي تقعدي في شقتي فوق عشان تراعي أمي لأني من بكرة نازل الشغل أجازتي خلصت وكمان فاطمة هتنزل الكلية

(سامية) مينفعش يا حبيبي مرات إبراهيم تبهدلني وبعدين ترجع تيجي ليا هنا وأنت مش عاوز تشوف وشها دي خرابة بيوت

(أم محمد) تشاور لسامية تقعد وتحرك رأسها بالموافقة

(سامية) مش هيسبونا في حالنا يا أختي

(محمد) بصي يا خالتي مالهمش حاجة عندي غير الصالون المعفن والحاج سالم قالي تعالى أنا هقف جنبك هنزل أروح له وأشاوره ونتفق هنعمل أيه ماشي وكمان العفش كله فوق فواتيره باسم أمي فلا تقلقي سلام الوقت أنا رايح القهوة للحاج سالم

(سامية) مع السلامة ياحبيبي يكتب لك في كل خطوة سلامة

(أم محمد) تشاور على آيات وتحط أيدها على بُقها فتفهم سامية أنها عاوزاها تأكل البت وتروح تعمل لها رضعة وتشربها لها وتستأذن من أختها تروح دار المسنين تدفع حسابها وتيجي تقعد معها لحد ماتخف وتبقى كويسة

(فاطمة) والعمل يا ماما البت الصغيرة دي ذنبها أيه تعيش من غير أم

(أم محمد) تعيط وتنظر لها فقط لا غير

(محمد) يذهب للقهوة ويجد حماه يجلس على القهوة وفارد صدره ويشكو من ظلم محمد لبنته وأنه رميها بدون أكل ولا فلوس

وعندما يرى محمد يتخض ويقوم يمشي مو القهوة

(الحاج سالم) صحيح طلقت البنت يا محمد

(محمد) أيوة ياحاج معدش ينفع تقعد في بيتي بعد اللي أخوها عمله

(الحاج سالم) وهي ذنبها ايه بس والبت بنتك ذنبها أيه راخرة

(محمد) بنتي محتاجة تتربى في بيت نضيف وأمي هتربيها زي ما ربيتنا لكن سهير خلاص متلزمنيش

(الحاج سالم) هيبهدلوك في المحاكم دول ناس جعانة

(محمد) البركة فيك ياحاج حضرتك بدل أبويا تخلص معهم تشوف عاوزين كام ويروحوا لحالهم ويأخدوا الصالون بتاعهم وخلاص

(الحاج سالم) ربنا يعمل اللي فيه الخير تمام هقوم أقعد مع أبوها وتشوف لها حل بس ممكن تعمل تمكين للشقة ويجوا يقعدوا على قلب أمك

(محمد) لا حضرتك نسيت قضية الطرد اللي أمي عملتها ليا هنفذها وهنزل عفشي قدام الشارع كله وهجيب خالتي سامية تقعد في الشقة وهخلي أمي تعمل لها عقد من يوم ما كسبت قضية الطرد ويبقوا يضربوا دماغهم في الحيط

(الحاج سالم) خلاص وأنا هقوم أقنع أبوها يأخد قرشين يأجر شقة يقعدوا فيها بدل بير السلم ده ويخلي عنده دم وينزل يشتغل ويصرف على أهل بيته بدل عيشتهم على قفا غيرهم

(محمد) تمام ياحاج بس بلاش يتمرع ويزود في الطلبات وفيه حاجة كمان بنتي يتكتب تنازل عنها قبل كل شيء وأنا هقوم أنفذ حالا وياريت حضرتك تسرع في الموضوع ده

(الحاج سالم) أنا قايم رايح أنده عليه أهو

(محمد) واذا وافق الأستاذ مصطفي المحامي جاهز

محمد يترك القهوة ويتجه لبيتهم ويفتح المحل ويأخد (الفسبة) بتاعته ويذهب ويبيعها حتى يعطي لسهير وأهلها الفلوس دون أن يثقل الحمل على أمه

وعندما تعلم أمه تمرض مرضا شديدا خاصة أنه باعها بالخسارة وتحاول تبعث المحامي لمن أشتراها لتسدد له مادفع ويرجع (الفسبة) لكنه يرفض فقد حصل عليها بربع ثمنها ولن يتنازل عنها أبدا ويزداد مرضها ويحاول محمد تعويضها ويقرر المبيت معها يوميا خاصة بعد أن اخد عفشه وخزنه في جراش بعشة رأس البر وأحضر خالته سامية وزوجها للسكن في شقته ونجح الحاج سالم في التوسط لدى سهير وأهلها واعطاهم مبلغ مئة الف جنيه من محمد مقابل التنازل عن آيات وجميع حقوق سهير وفرح أبوها بالمبلغ وأجبر سهير على التوقيع بالتنازل عند المحامي وكان هو والحاج سالم شهود التنازل وأخد المبلغ وأستأجر شقة في مساكن شطا وذهب للعيش فيها مع أم سهير وسهير وأخت سهير وإبراهيم زوجها واضطرت سهير للنزول العمل هي وأختها في مصانع بورسعيد حتى تتمكن من العيش والصرف على نفسها وكذلك أختها تصرف على اولادها بعد أن جلس إبراهيم في البيت ولم يسعى للشغل

(محمد) موجها كلامه لأمه خلاص ياست الكل فضيت لك ومعدش ورايا غيرك بكرة بإذن الله حجزت لك عند أشهر دكتور مخ وأعصاب في المنصورة وخالتي سامية هتيجي معنا وفاطمة تقعد بفاطمة الصغيرة

وتنظر له أمه مستغربة فيقول لها من الحق مش أنا روحت السجل المدني وغيرت اسم بنتي من آيات لفاطمة مش عاوز أي حاجة تفكرني بالنسب الزبالة ده

ويتهلل وجه الأم وتطبطب عليه وتحضنه

(محمد) يلا وسعي هنام جنبك وهسليك خالص كل يوم هحكي لك حكاية أي والله مش أنت كنتي عاوزة تعرفي كل حكاياتي مع الموكوسة مراتي هحكي لك مش هخلي في نفسك حاجة أبدا يلا صلي على النبي بس استني قبل الصلاة اتاخري كده شوية لما افرش مفرش على السرير نقزقز اللب عليه احسن فاطمة تبهدلنا لما تلاقي قشره على السجادة

وتضحك أمه

(محمد) يلا تحبي أبدأ منين أقولك هبدأ من يوم الخطوبة يوم ما خلصنا الحفلة ولبستها الشبكة اللي خسارة فيها فاكرة يومها خدوني على بيتهم عشان اسهر معهم واضحكي ياستي قعدنا وقلت لسهير أنا جعان ياسهير خلي أمك تحط لنا عشا

راحت لأمها ورجعت ايد ورا وايد قدام قلت لها فين العشاء يابنتي هموت من الجوع

(سهير) ماما بتقولي تنزل أنت تجيب عشا لنا كلنا بتقول العشاء النهاردة على العريس

وضحكت وعديتها وقلت لها عادي هو أصلا من يوم ما عرفتك والعشاء عليا وقومت نزلت أجيب العشا ملقتش في جيبي ولا مليم روحت لعمتي وطلبت منها سُلفة وطلبت منها

متقولش لك

(أم محمد) تشاور عاوزة ورقة وقلم تكتب للرد عليه

(محمد) عاوزة قلم خدي يا قلبي وكمان ورقة أكتبي أهو نتسلى

(ام محمد) تكتب بس عمتك قالت ليا على طول وطلبت الفلوس واديتها لها يا موكوس

(محمد) يضحك أما عمتي دي طلعت خاينة

تضحك أم محمد

المهم رجعت بالعشاء لقيت سهير وأمها وأبوها وأختها وإبراهيم جوزها والعيال وكمان عمتها

(أم محمد) تكتب كل دول ياوله

(محمد) اي والله يا أما ونزلوا على الأكل حتتك بتتك وربنا ما فاض لقمة حتى أكلها وجيت يومها هموت من الجوع ودخلت أدور في المطبخ على أي حاجة أكلها

(أم محمد) تكتب فاكرة اليوم ده كويس يا محمد هو أنا كنت اقدر أنام وأنت برة البيت يانور عيني وكنت مخبية لك جوز حمام في فرن البوتاجاز ودخلت عليك المطبخ وسألتك بتعمل أيه يا محمد؟