الفصل الثاني ... يوم الصباحية شبعة بعد جُوعة

دول عالم منهم لله ده الوله إبراهيم قليل الأدب مقاطع أبوه بقاله أكثر من سنة عشان مراته

لا وايه الوله عاوز أبوه يروح يعتذر لمراته والا مش مكلمه ثاني

(الأم) ليه يأختي هو جوزك كان عمل لمراته ايه؟

(سامية) شتمها وكان هيضربها

(الأم) ليه بس؟

(سامية) كان رايح لابنه الورشة لقي مراته واقفة على باب الورشة تردح له وتقوله مليش دعوة أنا عاوزة فلوس تجيب منين معرفش ميلزمنيش روح هات من أمك او أبوك يعني هما هيعملوا ايه بالفلوس دول عواجيز ملهمش لازمة لكن أنا ولادي محتاجين الفلوس

والرجل سمع الكلام ده الدم غلي في عروقه ام شاتمها وكان هيمد ايده يضربها

لولا إبراهيم مسك ايده وزقه ومن يومها أبوه مخاصمه والوله كمان مخاصم أبوه

يرضيك كده ياختي

(الأم) لا ياحبيبتي ميرضنيش خلاص أنا هكلم الوله إبراهيم يروح يصالح أبوه ويراضيه

(سامية) مش هيرضي

(الأم) بتقولي ايه ازاي لا ياشيخة هو هيسمع كلامي

(سامية) والله يأختى مايقدر يكسر كلام البرنسيسة مراته

قالت قاطع أبوك يبقي خلاص والا يروح يعتذر للهانم والا بلاش

(الأم) معقول هو ايه إبراهيم مغيب ملوش كلمة كده؟

(سامية) بكرة تشوفي ابنك لو أخد أختها هيبقي نسخة من إبراهيم

(الأم) بتقولي ايه يأختي بعد الشر استحالة ده أبوه يكسره

(سامية) أنا أهو وأنت أهو والزمن بينا بكرة تشوفي العجب خاصة إن مرات إبراهيم ابني هي صاحبة الكلمة على أختها وأبوها وأمها محدش قدرتها

(الأم) بلاش تخوفيني ياسامية صوابعك مش زي بعضها وبعدين الواد بيحبها خلاص بقى تعالي معايا المغرب نكلم أمها

(سامية) أنا أدخل لهم بيت لا والله أبدا أنت حرة أنا نصحتك وأنت حرة خليك فاكرة كلامي أنا نصحتك بلاش لحستين من نفس الطبق وأنت حرة

(الأم) ربنا يسهل لما أشوف عمته إيمان تيجي هي بقى معايا

(سامية) براحتك ياحبيبتي براحتك

صوت زغاريط وفرقة وفرح وهيصة وناس كثير

(الأم) صلوا على النبي صلوا يلا ياعروسة ادخلي برجلك اليمين ادخل يامحمد برجلك اليمين

(محمد) حاضر يأمه الحمد لله دانا قلبي هيطير من الفرحة

(سامية) بكرة نقعد جنب الحيطة ونسمع الزيطة

(الأم) بتقولي ايه ياسامية أنت بتكلمي نفسك سمعيني يأختي بتقولي ايه؟

(سامية) ولا حاجة ربنا يتمم لهم على خير يلا أنا مروحة

(الأم) مع السلامة يأختي نجاملك في الأفراح يارب العالمين

صوت نزول سلم خبط على الباب باب صوت خطوات وباب يفتح

(الأم) باستغراب تشهق! محمد ايه ياوله أنت لحقت تنزل عندي خير فيه ايه عروستك كويسة؟

(محمد) كويسة يأمه كويسة بس ايه عندك يتاكل أنا جعان جدا

(الأم) جعان ليه هي حماتك مجبتش لك العشا ياوله

(محمد) لا ياما ملقتش حاجة نأكلها دورت في الثلاجة ملقتش اي حاجة غير الجبن والحلاوة اللي أنت حطاهم بايدك والديب فريزر مليان الأكل الني اللي أنت حطاه

(الأم) ياختي من أولها مفيش عشا للعرسان امال هيعملوا ايه في الصباحية!

(محمد) ياما أكيد سها عليهم

(الأم) سها عليهم دول ناس جعانة ادخل أحضر لك تأكل

(محمد) ادخل أكل ايه ياما طيب والغلبانة اللي فوق دى تأكل ايه؟

(الأم) يالهوي هي جعانة ابعثها لأمها تأكلها وتضحك بصوت عالى

(محمد) يهو يأما يلا هاتي الأكل عشان اطلع نأكل

(الأم) طيب يامعدول خد صنية الأكل أهي روح كل مع العروسة المعدولة

(محمد) تصبحي على خير يأما

(الام) بتكلم نفسها ياه الاوضة منورة كده ليه هو احنا الساعة كام ياولاد؟

بيني نمت للضهر لما أقوم بقى أشوف العرسان وأشوف الصباحية بتاعة أم المعدولة

الباب يخبط وجرس الباب يرن

(الأم) يوه مين جاي دلوقت احنا لسه على الصبح

يوه نسيت جايز أم العروسة جايبة الصباحية اما اروح أفتح

صوت خطوات وباب يفتح

(محمد) صباح الخير يأمه

(الأم) محمد فيه أيه ياوله أيه منزلك بدري كده

(محمد) معلش يأمه هتقل عليكي يظهر إنك لما حطيتي الأكل في الثلاجة نسيتي تحطي عيش عاوز كام رغيف كده عشان افطر أنا وعروستي

(الأم) ليه هي حماتك مجبتش الصباحية

(محمد) لا يأمه يظهر مكسوفين يجوا الوقتي وأكيد هيجوا بالليل

(الأم) طيب أدخل أجيب لك العيش عشان تفطروا بس لو حماتك مش هتجيب الغدا قولي عشان أعمل حسابكم معانا

(محمد) لا أكيد هتعمل وتلاقيها مشغولة الوقت في الطبيخ، وأكيد هتبعث أخوها ولا اي حد بالأكل

(الأم) طيب جايز تتكسف على دمها وتدبح لك جوز حمام من السطح

(محمد) لا يأمه ده حمام زينة مش للأكل

(الأم) زينة يعني ايه؟

(محمد) حمام هزاز مش للطبيخ ده غالي قوي وكمان ده بتاع أخو سهير مش بتاع أبوها

(الأم) آه طيب ابقي خلي المعدولة قصدي العروسة تسأل أمها في التليفون هتجيب غدا ولا أعمل حسابكم معانا

(محمد) لا يأما أكيد هتجيب اطبخي على قدك أنت وأختي وأبويا بس

(الأم) طيب يلا اطلع للعروسة

باب يغلق وصوت خطوات

(الأم) تكلم نفسها مرة ثانية الا ماسمعت حد جه هي الساعة كام دلوقت أما أقوم أشوف

يالهوي دى الساعة ستة المغرب هو الوله محمد ياترى اتغدي ولا عمل ايه

جرس باب يرن

(الأم) أما أروح أشوف مين؟

باب يفتح

(الأم) محمد

(محمد) أيوة يأما معلش بتقل عليكي ممكن بعد إذنك اي حاجة نتغدا بيها أنا وسهير

(الأم) يالهوي ليه هي أمها مجبتش غدا؟

(محمد) لا والله يظهر تعبانين من إمبارح وراحت عليهم نومة

(الأم) ليه هي المعدولة مراتك مكلمتش أمها

(محمد) كلمتها بس أمها مردتش

(الام) ومكلمتش أختها ليه؟

(محمد) كلمتها بس برده مردتش يظهر كلهم نايمين

(الام) نامت عليهم حيطة

استني أما أطلب أبوك يجيب لك أكل من المطعم

(محمد) مطعم ليه هو أنت مطبختيش النهاردة ولا ايه؟

(الأم) مش أنت قلت نطبخ على قدنا أكلنا الأكل

(محمد) يعني مفيش فايض

(الأم) فايض ياعريس يظهر كلام سامية أختي صح وكلام أبويا الله يرحمه دول عالم .......يجوعوا

(محمد) والنبي يأما مأنا ناقص تقطيم هاتي اي حاجة نأكلها وخلاص أنا جعان

(الأم) اي حاجة ياعريس أشق هدومي ويقولوا الولية اتجننت

اصبر يأخويا أطلب أبوك يجيب لك أكل من المطعم

صوت زغاريط وخطوات على السلم

(محمد) خلاص يأما حماتي وأخت عروستي جت متطلبيش حاجة خلاص أكيد جايبين أكل معهم

(الأم) طيب لما نشوف

(أخت العروسة) ازيك ياطنط

(الأم) أهلا وسهلا ازيك يأختي امال أمك فين مجتش ليه؟

(أخت العروسة) أصل ماما تعبانة من إمبارح مش قادرة تقف على رجليها

(الأم) والله ألف سلامة يعني شايفة ايديك فاضية امال فين الصباحية يابنتي ولا أبوك راح يشتريها

(أخت العروسة) صباحية ايه ياطنط هو لسه فيه حد بيعمل الكلام الفارغ ده خلاص ياطنط دي موضة وخلصت

(الأم) والله موضة وخلصت امال اختك هتتغدي ايه هتمص صوابعها

(أخت العروسة) لا العريس يشتري لها، أو حضرتك تطبخي لهم احنا مالنا هم خلاص اتجوزوا هنصرف على العريس في بيته