الفصل الثالث والعشرون.....بنتك طالق

(سامية) تضحك حقك عليا يادكتور عيلة ومش فاهمة يا أخويا طمني على آيات

(الدكتور عبد القادر) آيات مين؟

(سامية) لحقت تنسى العيلة دي

(الدكتور عبد القادر) آه العيلة اللي كنتوا هتموتوها وكنت ناوي أبلغ عنكم الحكومة

(سامية) قلبك أبيض يادكتور حقك علينا طمني على البت الأول

(الدكتور عبد القادر) هتاخد المحلول والعلاج وهتبقى كويسة بس خليك قاعدة شوية هنا لحد ماتبقى بخير استني اغطسها في حوض

الميه

(سامية) يالهوي يادكتور في حوض البهايم

(الدكتور عبد القادر) وجيتي ليا ليه طالما أنا دكتور بهايم مروحتيش تحجزي ليه عند دكتور الأطفال وتقعدي تستني أسبوع حجز لحد البت ماتموت

(سامية) يادكتور هو فيه حد يقدر يعالج زيك داحنا متربين على اديك

(الدكتور عبد القادر) تبقي تسكتي وتسمعي الكلام أقعدي احكيلي يا بت مين مات في الشارع

(سامية) كل دي بت دانا عندي ستين سنة يادكتور ومن الحق بقى عندك كام سنة يادكتور دلوقت

(الدكتور عبد القادر) يابت الشباب شباب القلب مش بتاريخ معفن مثبت في البطاقة

(سامية) بجد يادكتور بقوا كام سنة

(الدكتور عبد القادر) الله أكبر في وش العدو تسعين

(سامية) بتخمس في وشي يادكتور ليه هحسدك بس والله كلك شباب ماشاء الله اللي يشوفك يقول عليك شاب في الخمسة وعشرين

(الدكتور عبد القادر) يخمس ثاني في وشها يا منافقة خمسة وعشرين طيب قولي خمسين ولا ستين تبقى مبلوعة شوية

(سامية) والله يادكتور شكلك أصغر مني وصحتك حلوة عني

(الدكتور عبد القادر) الله وأكبر خدي بنتكم اهي كملي علاجها في البيت أنت إذا قعدتي عندي أكثر من كده هتقصفي عمري يلا أمشي

(سامية) تضحك طيب هات عاوز كام كشف

(الدكتور عبد القادر) هاتي اللي تقدري عليه وخلاص

سامية تناوله مئة جنيه يبص فيها ويحمد الله ويبوسها كمان

(سامية) بتبوسها يادكتور

(الدكتور عبد القادر) طبعا نعمة ورضا عارفة يابت دي أول مئة جنيه توصلني من زمن

(سامية) ليه يادكتور هو الكشف مجاني ولا أيه

(الدكتور عبد القادر) لا ياعبيطة بس أنا بيجيني الغلابة عاوزين يكشفوا يعني حتى لو دفعوا جنيه واحد مش برفض وأكشف وإذا مفيش معاهم يجيبوا علاج بجيب أنا لهم العلاج

(سامية) طول عمرك أمير وحنين على الكل يادكتور والناس في الشارع بيقولوا عليك دكتور الغلابة بس بتعيش منين المعيشة غالية جدا

(الدكتور عبد القادر) ربك بيرزق الدود في الحجر مش هيرزق عبده الفقير

(سامية) جبت الخلاصة يادكتور ربنا يعوضك خير ويسترك دنيا وآخره

(الدكتور عبد القادر) خدي يابت المئة جنيه بتاعتك

(سامية) ليه بس!

(الدكتور عبد القادر د) كفاية دعوتك الحلوة دي يلا خدي فلوسك وخدي البت وخلي أمها ترضعها روحي صالحيها ورجعيها البيت وخليها ترضع البت

(سامية) حاضر يادكتور شكرا مع السلامة

صوت خطوات وجرس الباب

(محمد) افتحي يا فاطمة

فاطمة تفتح أخيرا يا خالتي جيتي

( سامية) محمد البت لازم ترضع من أمها

(محمد) صارخا أمها ماتت

(أم محمد) تحاول الكلام ولكن لا تستطيع النطق فتبكي لحد النحيب

(سامية) مالك يا أختي فيه أيه ألف سلامة عليكي شدة وتزول طولي بالك

(فاطمة) محمد مينفعش كده البنت لازم ترضع من أمها روح هات سهير وصالحها

(محمد) استحالة تدخل بيتي ثاني ويعيط

(سامية) يا أخويا عشان خاطر بنتك دي مصارين البطن بتتعارك روح هاتها وتعالى على نفسك شوية

(محمد) خلاص ياخالتي معدش ينفع بعد اللي حصل

(سامية) معلش مهما حصل دي مراتك يلا أمري لله هاجي معاك أجيبها مع أني حلفانة مدخلش لهم بيت بس يلا أنا مكان أمك لحد ما ربنا يأخد بايدها وتخف وتقوم بالسلامة

(محمد) معدش ينفع والله ما عاد ينفع تعتب عتبة البيت ده خلاص

أم محمد تنظر مستغربة لمحمد وعيونها تتسأل ليه؟ ومحمد ينظر لها لو عرفتي الحقيقة يا أما مش هتوافقي تدخليها هنا ثاني

(فاطمة) هي ألغاز ما تكلم على طول هو أحنا ناقصين وجع قلب

(محمد) اللي قتل أبويا يبقى ويسكت ويعيط جامد

(سامية) اوعى تقول إبراهيم ابني والله العظيم أتبرى منه ليوم الدين

(محمد) لا يا خالتي اطمني إبراهيم برئ

(أم محمد) تحاول الكلام ولا تستطيع فترفع يديها للسماء تشكر الله على براءة ابن أختها وتبكي سامية فرحا وتقول والله لولا المحنة اللي احنا فيها كنت زغرط

(محمد) أما تعرفي مين القاتل هتصوتي يا خالتي

(سامية) مين أخت مراتك البت مرات إبراهيم بس ازاي دي كانت معاكم في القسم يالهوي لتكون سهير عشان كده مش عاوزها ترجع وبتقول ماتت

(محمد) لا ياخالتي أخو سهير

(سامية) تصرخ يخرب بيته يخرب بيته

(محمد) كان قاصد يقتل أمي بس أبويا الله يرحمه فادى أمي لما زقها بعيد والموتوسكل داسه هو

(فاطمة) وسبته يا محمد

(محمد) ورحمة أبويا لا يمكن أسيبه

(سامية) يابني حرام عليك بقى أبوك راح خلاص ربنا يخليك أنت لأمك وأختك وبنتك الصغيرة دي محتاجة أب يربيها

(فاطمة) يعني أيه يسيب تار أبويا ودمه يروح هدر

(أم محمد) تجز على أسنانها محاولة الكلام لكن لا تقدر فتبكي

(سامية) بص يا محمد أمك عاوزة تكلمك لكن مش قادرة خليك فيها الوقت واعمل لأبوك عزاء وعالج أمك

(محمد) أنا قلت مفيش عزاء لأبويا الا لما أخد بحقه من القاتل بس أمي رقبتي لها هوديها لأحسن دكتور من بكرة لا من النهاردة يلا يا فاطمة لبسي أمك عشان ننزل نروح لآشطر دكتور في البلد

(سامية) أمك عندها صدمة عصبية محتاجة دكتور مخ وأعصاب وده بالحجز ولا فاكر أنك هتوديها للدكتور عبد القادر

محمد يضحك رغما عنه وكذلك فاطمة وأمه تبتسم ويفرح محمد ويقول أيوة كده يا أمه أضحكي وأرجعي لنا وأوعدك أن الضحك لا يفارق بيتنا بعد ما أخلص من النسب الزبالة ده

(أم محمد) تشاور والكل مش فاهم هي عاوزة أيه فتقوم من مكانها وتذهب لحد آيات وتأخدها في حضنها وتستسلم الطفلة لحضن الجدة وتنام

(سامية) طول عمرك حنينة يا أختي

جرس باب الشارع يرن

(سامية) خليكم أنا هدخل البلكونة أشوف مين يالهوي ولكم عين تيجوا

(فاطمة) مين يا خالتي

(سامية) الناس البجحة اللي ما يتسموش أبو سهير وأمها

(محمد) عن إذنك يا خالتي أنا نازل للرمم دول

(أم محمد) تمسك محمد من ملابسه وتنظر له

(محمد) محمد يفهم نظرة أمه يا أما مش لازم يدخلوا هنا ثاني

(أم محمد) تظل باصة له نفس البصة

(محمد) حاضر يا أما مش هكسر لك كلمة

جرس الباب يرن أكثر

(سامية) هنزل أفتح لهم خليك أنت يا محمد جنب أمك

(محمد) لا ياخالتي ميصحش خليك هفتح أنا بردة رجل البيت بعد أبويا

وتنهر أم محمد في العياط

(سامية) اهدي ياأختي ربنا يعوضك في محمد وفاطمة

(فاطمة) أنا هدخل جوة مش طايقة أشوف الناس دول يا خالتي

(سامية) عندك حق حبيبتي ادخلي وأنا هقوم بالواجب نيابة عنك لا تقلقي

(فاطمة) واجب أيه دول يتقدم لهم سم

(أم محمد) تشاور لفاطمة بيدها بمعنى لا

محمد ينزل السلم يفتح الباب لأم سهير وأبوها ثم يدخل ويتركهم بمفردهم بدون أي كلام ويصعد السلم ويصعدوا خلفه بدون أي حوار معه

(أم سهير) السلام عليكم ورحمة الله وبركاته

(سامية) تنظر لهم بقرف وترد وعليكم خير جايين ليه ولا أنتم تقتلوا القتيل وتمشوا في جنازته

(أبو سهير) عيب يا حاجة احنا أهل وجايين نعزي الحاجة ونقوم بالواجب

(سامية) تزعق لهم واجب أيه هو أنتم تعرفوا الأصول ولا الواجب

(أم سهير) ترد عموما احنا جايين للحاجة أم محمد نعزيها مش جايين لك

(محمد) مش دي الحاجة اللي كنتوا عاوزين تقتلوها وتخلصوا منها

(أبو سهير) بتجمع ليه يا محمد هو أحنا عملنا حاجة ولو كنا عرفنا كنا هنمنعه أكيد

(محمد) قصره مش جيتم وفتحنا لكم وعزيتم مع السلامة

(أم محمد) تحاول الكلام وتشاور لمحمد يسكت وتمسك في أم سهير تقعد

(أم سهير) عمرك بنت أصول يا حاجة وتبص لسامية بغل وحقد

وتكمل كلامها فين آيات عشان أخدها لأمها ترضعها

(محمد) مفيش لكم عندي حاجة غير الصالون العرة اللي في القايمة وبنتك طالق