الفصل الثالث والعشرون....حكاية الجدة القاتلة

(الأستاذ رامي) هكمل لك الأول حكاية الجدة القاتلة وبعدين أحكي لك حكاية عم سالم والدكتورة بلقيس

(أم أمل) اتفضل

(الأستاذ رامي) المهم الجدة أجرت ناس قتلوا العريس وأبوه

(أم أمل) وكمان أبوه اتقتل

(الأستاذ رامي) هو أبوه بس مش قولت لك الضرب كان عشوائي وفي كل اتجاه مات الأب والعريس وعم العريس وأبو العروسة وأخوها واثنين من الزملاء وأنا رصاصة في كتفي ده غير العشرات اللي اتصابوا

(أم أمل) يالهوي دي مجزرة

(الأستاذ رامي) بتقولي فيها هو فعلا اتحول الفرح لمجزرة

(أم أمل) والجدة الجاحدة دي لازم تتعدم في ميدان عام

(الأستاذ رامي) الدنيا انقلبت وزارة الداخلية كلها اتنقلت سوهاج وتم القبض على كل عيلة اللي أخدوا بالتار وكلهم أنكروا معرفتهم بالموضوع وأثبتوا تواجدهم في الفرح من بدري وأنهم حضروا بدون اي ضغينة وأكلوا عيش وملح مع أهل العريس وأنهم مش غدارين عشان يخونوا العيش والملح

(أم أمل) والجدة خرجت منها بعد المجزرة دي

(الأستاذ رامي) اصبري جاي لك في الكلام الحكومة مش عبيطة عشان تعدي الأمر كده بدأت تحريات المباحث أربعة وعشرين ساعه في اليوم جهد وجري لحد ما وصلوا للقتلة اصلهم مجموعة مع بعض

(أم أمل) يخرب بيتهم بس فيه حاجة أستاذ رامي ليه الحكومة مفرغتش الكاميرات وكانت عرفت بدل ضياع الوقت ده كله

(الأستاذ رامي) زمان ياحاجة قصدي يانزاجة مكنش فيه كاميرات الحكاية دي من خمسه وعشرين سنة

(أم أمل) عشان كده التطور حلو بردة دول جابوا أمل من الكاميرات

(الأستاذ رامي) المهم الناس اعترفوا ان الجدة اديتهم عشر فدادين أرض بشرط يخلصوا على كل عيلة العريس وإذا قدروا يخلصوا على المعازيم يخلصوا عشان كده كان الضرب عشوائي

(أم أمل ) فهمت فهمت

(الأستاذ رامي) المهم وصلوا للجدة ودخلوا البيت للقبض عليها لقوها ميتة

(أم أمل) أيه ده كل القصة ميتين لا حول ولاقوة الابالله العلي العظيم

(الأستاذ رامي) نفسك قصير يا نزاجة ويضحك

صوت خطوات وعم سالم يخبط على الباب ويدخل قائلا: الأكل أستاذ رامي

(الأستاذ رامي) تمام خدها أكلك وسيب اكلنا هنا واتفضل أنت كل

(الأستاذ رامي) تأكلي الأول ولا نكمل القصة الأول

(أم أمل) لا أكل أيه كمل الجدة دي ماتت ازاي أجرت حد طخها هي كمان

(الاستاذ رامي) لا ياحاجة هي كانت عاملة حسابها انها ممكن تتعرف وفي الحالة دي ست عندها سبعين سنة يبقى صعب عليها الحبس

(أم أمل) حبس ايه دي تأخد اعدام فوري

(الأستاذ رامي) لا القانون مش بالسرعة دي ده فيه صولات وجولات ووجع قلب وأسرة غنية زيها يبقى توكيل أورطة من المحامين يعنى الموضوع هيأخد سنين من الحبس حتى تنتهي القضية من طعون واستئناف والست تكون ماتت طبيعي بس بعد عذاب بسبب السن والعز اللي كانت عايشة فيه وأنت عارفة عيشة السجن شكلها ايه

(أم أمل) وأنا أعرف منين يا أخويا هو أنا كنت رد سجون وبعدين أنت بتبشر في وشي ليه بس حرام عليك هو أنا حمل السجن

(الأستاذ رامي) يضحك لا والله أنا مش ببشر عليكي أنا بتكلم مجازا

(أم أمل) طيب كمل عاوزة اعرف وصلتوا لفين

(الأستاذ رامي) تم عمل مجلس عرفي ثاني عشان المجزرة لا تتكر بين العائلتين والمرة دي كان حاضرها نائب وزير الداخلية بنفسه حقنا للدماء

( أم أمل) أنا مالي بالكلام ده أنا عاوزة أعرف الجدة ماتت ازاي

(الأستاذ رامي) آه فضول الستات طيب نأكل والأكل سخن وبعدين نكمل

(أم أمل) مفيش أكل لحد ما أعرف الجدة ماتت ازاي

(الأستاذ رامي) حاضر ياستي أقولك وبعدين نأكل وأروحك بيتك وبكرة نكمل حكاية بلقيس

(أم أمل) لا لا مفيش مرواح نأكل وتكمل حكاية بلقيس هو أنا يجيني نوم وانت معلقني كده بنص حكاية

(الأستاذ رامي) هقولك الاول الجدة ماتت ازاي الست كانت من خبرتها في الحياة عارفة أن الموضوع هينكشف بعثت الخادمة اشترت لها حبة الغلة سمعتي عنها

(أم أمل) أيوة زي سم الفئران كده

(الأستاذ رامي) أيوة اللي الناس المدلعة بتوع اليومين دول شغالين انتحار بيها

(ام أمل ) الله أعلم بظروف الناس أستاذ رامي

(الأستاذ رامي) المهم الجدة كانت عاملة حسابها ولما وصلها ان الناس اعترفوا عليها بلعت كام حبة غلة وماتت فورا

(ام أمل ) أحسن تموت مهي اتسببت في قتل ناس كثير منها لله

(الأستاذ رامي) لا تحكمي على الناس ربك عالم بقلوب الناس وهو الحكم العدل يلا افتحي الأكل أنا هموت من الجوع

(أم أمل) بعد الشر عنك ان شاء الله عدوينك بس هناكل وتكمل حكاية الدكتورة بلقيس

(الأستاذ رامي) لا حكاية بلقيس بكرة عندي شغل وأول موعد بعد نص ساعة ودي حكاية طويلة جدا بكرة إن شاء الله نكملها

(أم أمل) وأنا هصبر لبكرة خلاص خلص المكتب وتعالى اشرب الشاي عندي ونكمل الحكاية

صوت خطوات عم سالم الأستاذ مراد وصل يافندم تحب أقوله أيه

( الأستاذ رامي) قوله عشر دقايق بس وهكون معه عجبك كده موجها كلامه لأم أمل هموت من الجوع لازم أقابل الناس

(أم أمل) يستنى شوية هي الدنيا طارت نأكل الأول

(الاستاذ رامي) معدش ينفع خدي بقى الأكل كليه مع سيدة وهطلب لك تاكسي وتروحي و تعالي بكرة ان شاء الله هستناك نكمل القصة يلا مع السلامة

(أم أمل) طيب وأنت مش هتأكل

(الأستاذ رامي) بعد نزول العميل أطلب اكل واكل

(أم أمل) طيب خد ساندوتش كده على السريع

(الأستاذ رامي) مينفعش ياحاجة ده مكتب محترم والاحترام يبدأ باحترام موعد العميل وكمان ميصحش يدخل وريحة المكتب أكل يلا طلبت لك التاكسي تحت عم سالم عارفه هيوصلك له بالأكل ياعم سالم مناديا تعالى وصل الست أم أمل للتاكسي وشيل لها الأكل ده بس قبل ماتنزل دخل مراد بيه

(عم سالم) تمام يافندم

اتفضلي ياست هانم

صوت خطوات ونزول سلم

(أم أمل) ماشي يا عم سالم شكرا ليك بكرة إن شاء الله أشوفك

(عم سالم) هو حضرتك جاية لسه بكرة كمان

(أم أمل) بإذن الله مع السلامة

(عم سالم) يكلم نفسه هي أيه الحكاية هو الأستاذ وقع ولا أيه وبعد فلقة القمر بلقيس تكون الست نزاجة هي البديل يالا ربنا له في شأنه حكم

صوت صعود السلم وعم سالم يدخل المكتب وينتظر خروج الأستاذ مراد من عند الأستاذ رامي عشان يدخل له الأكل

باب يفتح والأستاذ مراد السلام عليكم ورحمة الله وبركاته يا رجل ياعجوز امسك خد ولا تنسى تفكر الأستاذ دايما بقضيتي

(عم سالم) شكرا لحضرتك من فضلك خد فلوسك

(الأستاذ مراد) ده حاجة بسيطة تجيب حاجة حلوة للعيال

(عم سالم) شكرا لحضرتك موضوع الفلوس ده ممنوع هنا

(الأستاذ مراد) يا رجل دي حاجة بسيطة وبعدين الأستاذ هيعرف منين خايف ليه ولا هو مركب كاميرات مراقبة

(عم سالم) من غير كاميرات يا أستاذ مراد دي مسألة ضمير وطالما الأستاذ رامي مش مقصر معنا نمد ايدنا لأي حد ليه شكرا لحضرتك خد فلوسك والأستاذ رامي مش بينسى حد من موكلينه

(الأستاذ مراد) تمام يارجل يا طيب مع السلامة ويخرج من المكتب

(عم سالم) يخبط على باب الأستاذ رامي حاملا معه الأكل يلا يابني كل لقمة عما الأستاذة اللي عليها الدور تشرف

(الأستاذ رامي) سيبك من الأكل قولي بلقيس لحد النهاردة محولتش تتصل بيك

(عم سالم) يبكي بشدة والله يا أستاذ أنا لو كنت ربيت كلب كان تمر فيه عنها ويستمر في البكاء