الفصل الثاني والعشرون....... المجزرة

(أم أمل) وبتقول مش بتعرف تقول شعر أومال ده ايه وتضحك

(الأستاذ رامي) تشربي قهوة

(أم أمل) لا يأخويا خلص حكايتك عشان انا جوعت عاوزة أروح اتغدى

(الأستاذ رامي) وتروحي ليه نتغدا هنا وينادي يا عم سالم

(عم سالم) أيوة يا سعادة البيه

(الأستاذ رامي) عارف طبعا مطعم الكباب تحت العمارة

(عم سالم) أيوة يافندم كنت بجيب منه للست أمل

(أم أمل) المجرمة بتاكل كباب لوحدها وأنا اكل من ايد سيدة وكل ما اقولها نتغدى تقولي شبعانة أكلت فول وفلافل وأنا في المكتب طالعة براويا لأبوها

(الأستاذ رامي) يضحك قلبك أبيض يا نزاجة يوجه كلامه لعم سالم

بص انزل هات ٣ وجبات كباب وكفتة وريش

(عم سالم) حضرتك والهانم اثنين الثالثة لمين حد جاي

ولا هتبعثها للست أمل

(الأستاذ رامي) ليك يارجل يا طيب

أمل مين ادعي لها ربنا يفك كربها

(عم سالم) والله بدعي لها على طول دي كانت ست سخيه جدا وعلى طول بتراضيني

(أم أمل) آه من جيبي مش من جيبها هي كانت حيلتها أيه

(الأستاذ رامي) ثاني ياحاجة ثاني ولا أقولك نزاجة

(عم سالم) مين لا مؤاخدة الست نزاجة دي مش الهانم أم الست أمل

(الأستاذ رامي) يضحك مهي أم أمل اسمها الست نزاجة

(عم سالم) يضحك وام أمل تنظر له بغضب

(عم سالم) لا مؤاخذة ياست هانم حالا الأكل انزل احجزه

صوت خطوات وإغلاق باب

(أم أمل) حضرتك مأخد عم سالم عليك قوي

(الأستاذ رامي) عم سالم من ريحة الغالية

(أم أمل) غالية مين أمك

(الأستاذ رامي) لا بلقيس الدكتورة

(أم أمل) نعم لا دأنت حكايتك حكاية كمل خليني أعرف عملت ايه

(الأستاذ رامي) ولا حاجة قعدت اتلاكع واستموت عشان أطول في المستشفى عشان أعرف كل حاجة عن الدكتورة بلقيس لحد ما الممرضة اللي بتشتغل تحت ايدها قالت ليا كده وش مطولش وخلص أصل الدكتورة جالها نقل وهتمشي عجباك كلمها وخلص وفعلا كلمتها وطلبت أقابل حد من أهلها عشان اخطبها

اتلخبطت وقالت أنا مش هتجوز أنا مقدمة طلب هجرة لكندا ومنتظرة الرد وإذا جه هسافر على طول قلت أخدها على قد عقلها وأقولها وماله نتجوز ونهاجر سوا

(أم أمل) ووافقت

(الأستاذ رامي) اصبري مستعجلة ليه ده حتى الصبر مفتاح الفرج

المهم قالت تمام إذا هتهاجر معي ده عنوان بابا في القاهرة

(أم أمل) هي مش من سوهاج

(الأستاذ رامي) لا هي من القاهرة وتكليفها جه سوهاج

(أم أمل) ياحبيبتي يا بنتي سوهاج مرة واحدة المفروض يراعوا ان دول بنات ويقربوهم للسكن بتاعهم يبعدوا الشباب دول ولاد يعرفوا يتحركوا

(الأستاذ رامي) والله يا أم أمل من خلال خبرتي الطويلة في شغل المحاماة احب أقول لحضرتك مش شرط فيه ساعات بنات بتكون اجدع من ميت رجل بشنبات

المهم أخدت عنوانها وسافرت القاهرة وروحت شبرا أدور على أبوها

(أم أمل) وهو وكيل النيابة سمح لك تروح من غير ما يأخد أقوالك ويقفل المحضر ده حنين قوي أحسن من وكيل النيابة هنا

(الأستاذ رامي) يضحك لا نسيت أقولك بس عشان سيرة بلقيس بتلخبط عقلي

وكيل النيابة جه وسألني وطبعا أنا فعلا معرفش حاجة وده اللي قلته بس عرفت بعد كده أن أبو العريس كان عليه ثأر قديم

(أم أمل) عشان كده هرب للقاهرة واخد عياله معاه طيب طالما كده راجع ليه برجليه ثاني عشان يموت ابنه هناك

(الأستاذ رامي) لا ياستي قبل رجوعه كان راح لمدير أمن سوهاج وطلب مقابلته وقاله أنه عاوز مجلس عرفي مع أهل القتيل يدفع لهم الدية ويخلص لأنه عاوز يرجع سوهاج ويموت ويندفن فيها

(أم أمل) أهو اللي مات العريس مش هو

(الأستاذ رامي) على طول مستعجلة كده يا نزاجة

المهم مدير الأمن اتصل بالمجلس العرفي في البلد لأن دلوقت في كل مكان بالصعيد مجالس عرفية بإشراف الحكومة لحل مشاكل الثأر

وفعلا تواصلوا مع أهل القتيل وقبلوا الدية وأبو العريس شال كفنه علي ايده وراح لحد عندهم وخلصت الحكاية والرجل فرح ورجع القاهرة لم عياله وزوجته ورجع سوهاج ميعرفش أن فيه حد من أهل القتيل مبيت النية على الثأر

(أم أمل) وفين مديرية الأمن

(الأستاذ رامي) هم يعرفوا منين دورهم عملوه مجلس عرفي وتصالح موثق وخلاص

(أم أمل) بس دول الحكومة المفروض يعرفوا كل حاجة

(الأستاذ رامي) يعاود الضحك لا يا أم أمل هم كانوا بيقروا الطالع ولا الفنجان لا طبعا هو في العادة هو اتفاق رجالة وأنت عارفة أهل الصعيد رجالة وكلمتهم واحدة

(أم أمل) أما هو كده ايه اللي حصل خلى الاتفاق يتلغي

(الأستاذ رامي) لا الاتفاق قائم لكن اللي عملت كل ده جدة القتيل استأجرت ناس واعطتهم فلوس لقتل العريس وأبوه وكل عيلته

(أم أمل) يالهوي دي قلبها جامد قوي

(الأستاذ رامي) ساعات فيه ستات قلبها أقسى من الحجارة زي بلقيس كده

وينفجر في البكاء

(عم سالم) أستاذ رامي يابني جرالك أيه أول مرة أشوفك بتعيط كده دأنت معملتهاش يوم بلقيس وأبنك

(الأستاذ رامي) اعذرني عم سالم أعذريني أم أمل استئذن من حضرتك شوية وغادر الحجرة

(عم سالم) هو أنت ياست هانم كنتي بتقولي أيه للبيه خلاه عيط بالشكل ده دي اول مرة أشوف دموعه ده حتى في أحلك ظروفه لم يبك ولا نزلت منه دمعة واحدة

(أم أمل) وأنا مالي والله ما عملت حاجة هو كان بيحكي ليا عن بلقيس وفجأة عيط

(عم سالم) يظهر ان حضرتك قريبة قوي من البيه لأنه أول مرة يتكلم عن بلقيس مع حد

(أم أمل) هو انت ياعم سالم تعرف الدكتورة بلقيس

(عم سالم) عز المعرفة

(أم أمل) بجد يبقى أنت هنا مع الأستاذ رامي من زمان بقى

(عم سالم) لا أنا هنا من يوم ما بلقيس غدرت بالأستاذ وبيا ومعدش ليا مكان أروحه فالاستاذ ربنا يبارك فيه جابني هنا أهو مكان أعيش فيه ومنه كمان استرزق وأصرف على نفسي

(أم أمل) طيب الدكتورة بلقيس تغدر بالأستاذ لكن بيك مش فاهمة

(عم سالم) بلقيس يا حاجة تبقى بنتي

(أم أمل) تصرخ بجد

(عم سالم) هو أنت ياحاجة مفيش عندك وسط تفرحي تصرخي تعيطي تصرخي مفيش وسطية خالص

صوت خطوات ودخول (الأستاذ رامي) اتفضل أنت عم سالم وياريت تشوف اوردر الأكل اصل نزاجة فاتها جاعت جدا

(عم سالم) يضحك ربنا يحظك يابني وكل لحظاتك تبقى سعادة حاضر هنزل اشوف أوردر الأكل حالا

(الأستاذ رامي) وصلنا لفين عشان نكمل

(أم أمل) لا بلاش طالما الذكريات دي ثقيلة قوي كده

(الأستاذ رامي) بالعكس دي أول مرة أتكلم فيها مع حد وأهو هم ينزاح من على قلبي

(أم أمل) عم سالم قال كده بردة

(الأستاذ رامي) أيه هو الرجل العجوز ده بيتصنت علينا

(أم أمل) لا بلاش تظلمه هو سألني ليه خليتك توصل لدرجة الانهيار فقلت له كنا بنتكلم عن الدكتورة بلقيس

(الأستاذ رامي) وقالك أنه أبو بلقيس

(أم أمل) قالي ومستغربة جدا الموضوع ده!