الفصل الثاني عشر... تاريخ أسود

(الأستاذ رامي) دي معلومة جديدة هو أبو أمل ابن عمتك

(أم أمل) أيوة ابن عمتي المهم واتفق معه على جوازنا وأنه مش هيكلفه حاجة وحكي له كل شيء بصدق وطلب منه ستر عرضي قدام الناس وبعد كده ممكن نطلق عادي

(الأستاذ رامي) وأنا اللي كنت ظالم أبو أمل

(أم أمل) كلنا ظلمناه بس هو قبل الظلم لأنه كان فقير جدا ومعندوش اي امكانيات للجواز وإذا أبويا مكنش عرض عليه الجواز مني مكنش عمره هيتجوز

(الأستاذ رامي) أنت بتبالغي قوي أي إنسان في بدايته بيكون مش تمام بس مع الوقت حاله بيتغير وأنا شايف أبو أمل دلوقت عنده شركة وبيت وزوجة يعني كون نفسه وكبر

(أم أمل) بفلوس أبويا ايوة بفلوس أبويا الله يرحمه أعطاه مبلغ مائة ألف جنيه وده من ٣٠ سنة كان مبلغ كبير جدا ولم يكلفه مليم في جوازنا وانتظر أبويا شهور العدة وجوزني من ابن عمتي

(الأستاذ رامي) طيب بتقولي إن محمد مش ابنه ازاي؟

(أم أمل) هقول لحضرتك أثناء شهور العدة حسيت بالحمل وبابا رفض أني أقول لابن عمتي أي شيء خاف يرفض يكمل الجواز وبابا كان كل همه الخوف من الفضيحة

(الأستاذ رامي) عشان يعرف بنات اليومين دول بيحطوا أهلهم في مواقف تغضب ربنا

(أم أمل) المهم بابا قالي مقلش لابن عمتي عن الحمل وقالي بعد الجواز بشهر قولي وهو الناس هتعتبر الحمل منه

(الأستاذ رامي) وابن عمتك صدق

(أم أمل) هقول لحضرتك بعد الجواز وشهور العدة قبله كان فات كده أربع شهور ولما قلت أني حامل ابن عمتي فرح لكن بعد خمس شهور جاني الطلق وولدت فتغير تماما وواجه بابا وقاله أنت ضحكت عليا وكان عاوز يطلقتي

(الأستاذ رامي) ياخبر وحصل أيه

(أم أمل) ولا حاجة بابا قالي ده معروف ديته وأعطى له مائة ألف جنيه ثانية اللي كون شركته منها

(الأستاذ رامي) أيه ده هو فيه حد كده معندوش كرامة كده خالص

(أم أمل) يأستاذ رامي ده لو كان عاش عمره كله مكنش كون شركته ولا عمل مصلحة لولا فلوس أبويا اللي عمل منها الشركة

(الأستاذ رامي) بس بما أنكم خلفتوا أمل يبقى أكيد عيشتوا كويسين مع بعض ولا أمل هيطلع لها أب ثاني ويبقى كده الحكاية اتحولت لفيلم هندي لاميتاب بتشان

(أم أمل) بغضب وده وقت تريقة أستاذ رامي

(الأستاذ رامي ) لا والله بحاول اخفف عنك الوضع شوية مش أكثر

المهم كملي باقي الحكاية ويارب يكون فيها حاجة تنفع أمل

(أم أمل) لا أمل بنته لكن محمد ابن رياض

(الأستاذ رامي) هو أنت كتبتي محمد باسم مين ابن عمتك ولا رياض

(أم أمل) لا الاثنين أمل ومحمد باسم ابن عمتي

(الأستاذ رامي) فهمت دلوقتي البرود اللي كان فيه الرجل يوم استلام جثمان محمد لأنه مش ابنه بس تربيته يعني كان ممكن يكون شوية أحاسيس ناحيته ولا حاجة

(أم أمل) لا هو اصلا معندوش إحساس لا ناحيتي ولا ناحية محمد وحتى أمل

(الأستاذ رامي) ماشي ناحيتك معروف ليه وناحية محمد ماشي لكن أمل بنته من دمه ولحمه

(أم أمل) لا هو من ساعة ميلاد محمد بعد خمس شهور من جوازنا وهو شكاك ورافض تماما الولد وبيعامله وحش وكان محمد دايما يزعل ويقولي بابا ليه بيعاملني وحش ويعامل أمل كويس

(الأستاذ رامي) وحضرتك كنتي بتقولي أيه لمحمد

(أم أمل) كنت بقوله ياعبيط عشان عاوز يطلعك رجل ملو هدومك لكن أمل بنوتة لازم تدلع

(الأستاذ رامي) وكان بيصدقك

(أم أمل) كان عيل وكنت بطبط عليه وأحتويه وخلاص

المهم لما محمد كبر وبقى في مرحلة الشباب أبو أمل كان بيعامله وحش جدا وكل طلباته مرفوضة فنزلت أنا دورت على شغل في مدرسة

خاصة وكمان اشتغلت في سنتر دروس خصوصية وده ريح أبو أمل مني تماما وترك مسئولية مصاريف محمد عليا وزادت الهوة بينا وكنت بقول شغله كبر واهو احنا عايشين وخلاص لحد ما اكتشفت خيانته وجوازه من السكرتيرة فطلبت الطلاق وهو ما صدق وطلقني وطلق ابنه وبنته معايا

(الأستاذ رامي) ابنه مين ياحاجة؟ قولي بنته وخلاص

(أم أمل) عندك حق واستمريت في الشغل ليل نهار عشان محرمش ولادي من أي حاجة والحمد لله أهم زي ما حضرتك كنت شايف محمد خريج سياحة وفنادق وأمل كانت في رابعة حقوق

(الأستاذ رامي) الله يرحم محمد ويفك أزمة أمل

المهم أبو محمد أنت متعرفيش عنه حاجة للوقت

(أم أمل) لا عارفة ومتابعة شركته

(الأستاذ رامي) عارفة منين ومتابعة كمان وبقى عنده شركة

(أم أمل) أيوة هو أختفى فترة وبعد كده ظهر كنت قاعدة قدام التليفزيون بتفرج على الإعلانات أصلي بحب الإعلانات قوي المهم شوفت واحد في إعلان قاعد على مكتب أُبهة كده وماشاء الله تبارك الله مالي مكانه أكنه يملك الدنيا وما فيها ولما الصورة قربت قعدت اشبه عليه وأفكر الرجل ده شوفته فين قبل كده لحد ما قالوا اسمه طلع رياض أبو محمد

(الأستاذ رامي) آه بقى صاحب شركة

(أم أمل) آه يأخويا صاحب شركة بفلوس الأرض

(الأستاذ رامي) وروحتي له لما شوفتي الإعلان

(أم أمل) لا قلت خلاص بقى كل حاجة راحت لحالها بس

(الأستاذ رامي) بس ايه؟

(أم أمل) مش فاهمة أمل عرفت منين أنه أبو محمد

(الأستاذ رامي) هي قالت لك أنها عرفت أن والدها مش أبو محمد وأنهم أخوات من الأم بس أمتى

(أم أمل) لا هي مقلتش حاجة من دي هي قالت اجيب لها المليون جنيه من أبو محمد ولما قلت لها أبوك مش هيوافق يعطيك مليم قالت من أبو محمد مش أبوها

(الأستاذ رامي) صحيح عرفت منين؟

(أم أمل) مهو ده اللي مجنني عرفت منين؟

(الأستاذ رامي) كده لازم زيارة ثانية لأمل وأكون حاضر معكم لازم نعرف عرفت منين وليه مقلتش لك من أول ماعرفت؟

( أم أمل) لا أنا مش رايحة لها ثاني روح حضرتك دي بقت صعبة خالص وبتكلم بطريقة غريبة

(الأستاذ رامي) ازاي يعني بطريقة غريبة فهميني

(أم أمل) بقت بتكلم زيهم

(الأستاذ رامي) زي مين؟

(أم أمل) المجانين اللي هي عايشة معهم

(الأستاذ رامي) ياحاجة ازاي تقولي الكلام ده عن بنتك دي أمل ست البنات وعاقلة جدا بس هي أظن كانت بتمثل الجنون هربا من حاجة الله أعلم بيها

(أم أمل) والعاقلة دي تقتل جوزها وأخوها

(الأستاذ رامي) الله أعلم الحقيقة مصيرها تبان بإذن الله

الصبر مفتاح الفرج وربك كريم أنا هطلب إذن ثاني لزيارة أمل ويارب النيابة توافق ونشوف هنعمل أيه وربك المستعان

ولحد ده ما يحصل هتعملي أيه في حكاية الأستاذ رياض

(أم أمل) هروح له ثاني وهفضحه في الشركة مهو لازم أخد منه فلوسي وفلوس أبويا

(الأستاذ رامي) نصيحة لوجه الله بلاش تعملي كده وسيبي الأمر ده ليا أنا هتصرف بس لازم أقعد مع أمل وأعرف ازاي عرفت عن أبو محمد بس قوليلي ياحاجة أنت متأكدة أنك مقلتيش لأمل حاجة عن الموضوع ده ولا حتى لمحمد

(أم أمل) لا طبعا

(الأستاذ رامي) ولا حتى اتكلمتي مع حد والأولاد سمعوا الكلام

(أم أمل) ولا حتى مع نفسي اتكلمت ده تاريخ أسود اتكلم فيه ازاي