الفصل السابع... ده فيلم قتل وكيل نيابة

(الوكيل) من فضلك الرد على قد السؤال

(الأم) حاضر ايوة عندها

(أمل) وايه لازمة السؤال عن فستاني ايه حضرتك عندك حد عاوز يعرف أنا شرياه منين ادلك علي اسم المحل ولا عاوز هدية للمدام

(الوكيل) مش بقولك عاجبني اوي ثباتك الانفعالي وبرودك اللامتناهي بس يارب تكملي للأخر قوليلي يأمل هو مين قتل أخوك محمد أنت ولا معاذ

(الأم) بتقول ايه حضرتك تقتل أخوها يامصيبتي

(الوكيل) ثاني ياحاجة اخرجك برة

(أمل) حضرتك بتقول أي كلام وخلاص أنا اقتل أخويا طيب ليه؟

(الوكيل) عشان مكنش يعرف أنك اتجوزتي معاذ وشافك معاه في موقف مخل مثلا

(أمل) ياسلام مش حضرتك بتقول أنى اتجوزت معاذ يعني أخويا هيشوفني مع جوزي في وضع مخل ازاي

(الوكيل) مهو مكنش يعرف أنكم اتجوزتوا وكمان في اخر سنة كان بيماطل في جوازكم بسبب مشي معاذ الغلط مع سائحة روسية

(أمل) لا طبعا

(الوكيل) لا طبعا ايه مكنش يعرف ولا مشفكش في وضع مخل مع معاذ

(أمل) لا ده ولا ده أنا أصلا متجوزتش معاذ ومروحتش شارم أنا كنت بروح اسكندرية اتفسح

(الوكيل) هاتي أسماء اصحابك نتأكد منهم

(أمل) كنت بروح لوحدي

(الوكيل) قلتي من شوية بتروحي اسكندرية مع أصحابك تتفسحي بلاش أسماء اصحابك هاتي اسم الفندق

(أمل) عادي نسيت ومكنتش بنزل في فندق

(الوكيل) ليه كنتي بتقعدي في الشارع يومين

(أمل) ايوة كنت بقعد في الشارع عند حضرتك مانع

(الوكيل) أبدا همانع ليه قوليلي يأمل ليه قتلتي أخوك وإذا حد ثاني قتله نقول معاذ مثلا ليه بتداري عليه

(أمل) قلت لحضرتك أنا لا قتلت ولا بداري على حد

(الوكيل) برافو مل جامدة وقوية نشوف هتستمري كده لامتى

الفون يرن

(الوكيل) تمام تمام لقيتو معاذ كان مستخبي فين؟

(أمل) مش ممكن لاقوه ازاي معاذ مات

(الوكيل) مات اش عرفك أنه مات وبعدين هو اللي مات محمد ولا معاذ يأمل

(أمل) معرفش معرفش أنا عاوزة محامي

(الوكيل) حقك

(أمل )أنا مش هتكلم الا في وجود محامي

(الوكيل) شوفوا لها محامي

(الأم) يخرب بيتك تتجوزي وتقتلي أخوك كمان

(الوكيل) من فضلك وقعي على أقوالك وروحي احنا مش محتاجين لك الوقت

(الأم) يعني ايه وبنتي هتعملوا معها ايه

(الوكيل) مدام أمل مطولة معانا شوية

(أمل) ليه بقي هو فيه ايه ضدي

(الوكيل) فيه كثير يامدام أنت متهمة بقتل أخوك محمد وتشويه جثته وأعترافك حالا بقتل معاذ كمان

(أمل) لا أنا مقتلتش حد والله ماقتلت حد

(الوكيل) يبقي اشتركتي في القتل

(أمل) ولا دي كمان وتنهار في البكاء

(الوكيل) امال كان دورك ايه يامدام

(أمل) والله كنت بحوش بينهم

(الوكيل) بين مين يامدام

(أمل) بين معاذ ومحمد

(الوكيل) تمام احكي لنا ايه اللي حصل

باب يخبط (العسكري) تقرير الطب الشرعي يافندم

(الوكيل) يفتح الظرف كنت متأكد انه توقيعها صح يامدام أمل توقيعك

(أمل) أيوة توقيعي

(الوكيل) طيب احكي بقي ايه الحكاية

(أمل) هقول كل حاجة عشان أنا تعبت وعاوزة اريح ضميري

(الوكيل) باستهزاء ضميرك وانت بقى عندك ضمير

(أمل) من فضلك كفاية أنا مليش ذنب في اللي حصل ده كله

(الوكيل) احكي ونشوف لك ذنب ولا ملكيش

(أمل) من سنة معاذ طلبني وقالي عاوز يقابلني وقابلته وقالي انه طلبني من محمد ومحمد رفض

(الوكيل) مقلش رفض ليه وهو صديق عمره وعارف انكم بتحبوا بعض

(أمل) معاذ قالي إنه كان بيمشي مع سواح أجانب من باب التسلية وكده وعشان كده محمد رفضه وقاله استحالة اجوز اختي لواحد فلاتي

(الوكيل) يعني أخوك يخاف عليك وأنت تروحي تجوزيه وتقتلي أخوك عشانه

(أمل) لا والله مقتلتش لا حرام عليك

(الوكيل) امال ايه اللي حصل؟

(أمل) انا ومعاذ متربين مع بعض من صغرنا وكنا ميالين لبعض ومن صغرنا بيتقال أمل لمعاذ ومعاذ لأمل

(الوكيل) وبعدين

(أمل) معاذ قالي تعالي نتجوز من ورا أخوك أنا بحبك وأنت بتحبيني خفت وقلت له ازاي قالي قولي لماما أنك عندك تدريب تبع الكلية يومين في الأسبوع ومحمد أصلا بينزل يومين اجازة لما ينزل وتطمني انه قعد في البيت مع امك خلاص تعالي

(الوكيل) هيه وبعدين

(أمل) اتجوزنا

(الوكيل) واجازة أخوك ظبطت مع اليومين التدريب

(أمل) لا أنا كنت بغير الأيام حسب إجازة محمد وقلت لماما ان الكلية هي اللي غيرت

وكنت بستني محمد ينزل الاجازة واقعد معه شوية واطمن أنه موجود مع ماما وأسافر اخر مرة معاذ طلبني وانتظرت محمد يوصل مجاش طلبت معاذ قلت له قالي خلاص بلاش تستنيه أنا موصله بنفسي للمحطة اركبي وتعالي ومعاذ استناني في المحطة وروحنا الشقة وكنت مرهقة جدا من السفر ودخلنا ننام

(الوكيل) وبعدين ايه حصل

(أمل) مش فاكرة غير اني صحيت على صوت زعيق بين محمد ومعاذ خرجت جرى أشوف فيه ايه لقيت محمد بيتهم معاذ بالخيانة وانه مصنش العيش والملح ولما لمحني جرى عليا وضربني بالقلم معاذ جرى يحوش عني كان فيه سكينة في طبق الفاكهة على الترابيزة محمد جرى ومسك السكينة وجاي عاوز يقتلني معاذ مسك ايده وحاول يأخدها منه

(الوكيل) معاذ قتل محمد

(أمل) لا أنا اللي قتلت محمد وتعيط بصوت بس والله غصب عني

(الوكيل) ازاي

(أمل) مسكت ايده اللي فيها السكينة عشان ميعورش معاذ فحاول يفلت مني ومن معاذ فوقع علي السكينة ودخلت صدره ومات فورا

(الوكيل) ومين شوه محمد ومين صاحب الفكرة إنه يحط بطاقة معاذ في جيب محمد ويلبسه لبس معاذ

(أمل) برده أنا حضرتك نسيت إني حقوق ومر عليا اثناء التدريب قضايا كثير وكمان أنا غاوية قراءة قصص بوليسية ومشاهدة أفلام اكشن

(الوكيل) واضح واضح كملي كملي

(أمل) قعدت على الأرض اهدي معاذ لأنه كان منهار جدا وكان قاعد يصرخ ويعيط بصوت عالي وهيفضحنا

(الوكيل) وجالك فكرة تشويه وشه وأنه يلبس لبس معاذ منين

(أمل) من مسلسل كنت شوفته هديت معاذ وطلبت منه يجيب بنطلون وقميص من بتوعه هم أصلا طول واحد وكانوا بيلبسوا من بعض ولبستهم لمحمد وطلبت من معاذ يشوه وش محمد لكنه رفض فشوهته أنا

(الوكيل) وجالك قلب تعملي كده في أخوك

(أمل) مهو ياروح مابعدك روح اما هو او أنا وبعدين هو مات خلاص يبقي ليه أموت جنبه

(الوكيل) كملي كملي

(أمل) واخدت بطاقة معاذ حطيتها في جيب محمد واخدت كارنيه محمد رميته جنب الباب وجبت قماشة ومسحت بصماتي وبصمات معاذ

واخدت شنطتي واي حاجة تخصني بالشقة وحطيت السكينة في شنطتي وخليت معاذ يخرج الأول وهو لابس لبس محمد وبعد شوية خرجت أنا وكنا متفقين نتقابل في شارع البحر

(الوكيل) واتقابلتوا وفين السكينة

(أمل) هقول لحضرتك اتقابلنا ورميت السكينة في البحر ومعاذ كان لسه منهار وقعد يعيط زي العيل الصغير وكان هيفضحنا والناس تتلم علينا وكمان كان عاوز نروح القسم نسلم نفسنا ونقول إن الموت غصب عننا حاولت اقنع فيه مينفعش كان مصر

(الوكيل) عشان كده قتلتيه

(أمل) كان لازم يموت كان لازم يموت

(الوكيل) أنت جبروت قتلتيه ازاي

(أمل) قعدت اهدي فيه انه يرجع عن اللي في دماغه ابدا مصر على تسليم نفسه

انتظرت لما الدنيا ليلت قلت له تعالي نتمشي فوق الكوبري نشوف القمر مع بعض قبل مانسلم نفسنا نعيش لحظات رومانسية شوية مع بعض قبل الموت

(الوكيل) وبعدين قتلتيه

(أمل) لا أنا مش قتالة قتلة وقلت لحضرتك موت محمد كان غصب عني

(الوكيل) المهم مات ازاي

(أمل) زقيته من على الكوبري في البحر بس

(الوكيل) مش بقولك عاجبني قوي ثباتك الانفعالي بس

(أمل) والمكان اللي كنا فيه عند الهويس يعني نزل مظهرش ثاني

(الوكيل) وعملتي ايه بعدها ليه رجعتي الشقة

(أمل) عرفت منين اني رجعت الشقة

(الوكيل) عيب عليك دانت بتتفرجي على أفلام بوليسية

(أمل) آه الكاميرات

(الوكيل) والمرة دى ظهر جزء من وشك كل مرة كنتي بتغطي وشك بإيشارب المرة دى لا طيب رجعتي ثاني ليه لموقع الجريمة

(أمل) كنت بودع محمد أخويا

(الوكيل) لا حنينة قوي علي اخوك

(أمل) والله ما كان قصدي اقتله والله

(الوكيل) ومكنش قصدك تقتلي معاذ كمان

(أمل) كان هيفضحنا ومصر نسلم نفسنا مشفوناش واحنا بنسرق هيشفونا واحنا بنقسم الغنيمة

(الوكيل) وعليكي أمثال وبعدين

(أمل) ولا حاجة قلت لحضرتك مكنش قصدي

(الوكيل) وقعي على أقوالك

(أمل) أقوال مين أنت صدقت أنت أهبل ولا حاجة وتضحك بهيستريا

(الوكيل) آه بتدعي الجنون عشان تفلتي من العقاب والمشهد ده شوفتيه في أي فيلم بايخ ولا قرأتيه في قصة بوليسة

(أمل) شوفته في فيلم جريمة قتل وكيل نيابة وتهجم على وكيل النيابة وتصرخ وتضحك في نفس الوقت

(العسكري) بينها اتجننت يافندم

(الوكيل) لا دي عاقلة جدا بس ممثلة قديرة يتم عرض المتهمة على مستشفى الامراض العقلية وافادتنا بتقرير عن ذلك واقفل المحضر على ذلك

تمت الحمد لله