الفصل العاشر عاوزة مليون جنيه

صوت خطوات وجري في طرقة المستشفى

(أم أمل) يلا يا أستاذ رامي عاوزة اروح حضرتك هتوصلني ولا اطلب تاكسي

(الأستاذ رامي) مالك يا أم أمل وشك مخطوف ليه كده هي أمل قالت لك أيه

(أم أمل) ولا حاجة ولا حاجة أنا تعبانة عاوزة أروح لو سمحت

(الأستاذ رامي) الموضوع فيه سر أيه الحكاية أرجوك بلغيني عشان أعرف أدافع عن أمل

(أم أمل) تصرخ مفيش مفيش من فضلك أنا تعبانة عاوزة أروح بيتي

(الأستاذ رامي) وصلنا يا أم أمل اتفضلي بس معلش نفسي أعرف أمل قالت لك أيه غير حالك كده حضرتك شخص مختلف عن إللي دخل لأمل من فضلك كل كلمة أمل قالتها لك جايز تكون مش مهمة عند حضرتك بس هي مهمة ليا كمحامي ممكن أبني منها دفاعي عن أمل فلو سمحتي لا تبخلي عليا بأي شيء

(أم أمل) حاضر أستاذ رامي بس من فضلك راعي أني أم بتشوف بنتها اللي وقفت حياتها على تربيتها وفي الآخر هي فين في مستشفى المجانين ومتهمة بقتل أخوها يعني حياتي ضاعت هدر

(الأستاذ رامي) مقدر والله وربنا يكون في العون بس أنا بحاول أساعد مش أكثر عشان كده لازم كل حرف أعرفه

(أم أمل) حاضر لو سمحت نزلني هنا

( الأستاذ رامي) هنا لسه بدري على شارعكم

(أم أمل) لا هروح أشتري شويات حاجات لازمة البيت شكرا لحضرتك

(المحامي رامي) لا شكر على واجب وممكن أبقي ابعث لك العامل اللي في المكتب مرة كل أسبوع يقضي لك مشاويرك بدل نزولك مخصوص لكده

(أم أمل) لا سيدة موجودة بس أنا قلت بما أني نزلت أجيب حاجتي بالمرة

(الأستاذ رامي) تمام لما تروحي رني على الفون بس أطمن عليكي

(أم أمل) حاضر مع السلامة وشكرا مرة ثانية لحضرتك تعبتك معي

(الأستاذ رامي) لا تعب ولا حاجة حضرتك عارفة أنا بعتبر أمل بنتي مش مجرد متدربة عندي في المكتب

مع السلامة

صوت كلاكس عربيات ومواء قطط

(أم أمل) الحمد لله أروح أشوف هعمل أيه مينفعش أفكر لوحدي لازم يعرف وكمان لازم أشوف أمل معلوماتها وصلت لفين ومن أمتى وهي عارفة أن محمد مش أخوها من نفس الأب وياترى عرفت أن معاذ يبقى أخو محمد من الأب ولا معرفتش لازم كل شيء يبقى واضح قدامنا وربنا يستر

صوت فرملة عربية بقوة وزعيق

(السائق) ايه ياحاجة مش تأخدي بالك وأنت معدية هو فيه أيه ومالك سرحانة كده هتودينا في داهية

(الأستاذ رامي) فيه سر بين أمل وأمها السر ده لو أنكشف تتحل القضية

(عم سالم) عامل المكتب

حضرتك يا أستاذ رامي أول مرة أشوفك بتكلم نفسك خير يابني أنت تعبان سلامتك

(الأستاذ رامي) لا تقلق ياعم سالم أنا بخير الحمد لله أنا بس بفكر بصوت عالي

(عم سالم) طيب يابني كده اطمنت عليك أعملك فنجان القهوة المظبوط بتاع عمك سالم بقى

(الأستاذ رامي) ياريت ياعم سالم تلحقني بيه رأسى هيتفرتق من التفكير

(عم سالم) ياخبر الف سلامة عليك ياحبيب والديك حالا يكون عندك فنجان القهوة السادة المعتبر حالا

(الأستاذ رامي) ياترى أم أمل مخبية عني أيه؟

في الشارع أم أمل اعتذرت للسائق وهي تبكي معلش يابني سامحني

(السائق) شاف دموع أم أمل قلبه رق لها وطلب إنه يوصلها لأي مكان هي عوزاه والأم شكرته وقالت له خلاص وصلت للمكان اللي أنا عوزاه واعتذرت مرة أخرى ودخلت باب الشركة

(موظف الأمن) عاوزة مين ياحاجة هي وكالة من غير بواب داخلة هجم كده من غير أحم ولا دستور

(أم أمل) معلش يابني أسفة مأخدتش بالي

(موظف الأمن) جاية لمين هنا؟

(أم أمل) وأنت مالك رايحة لمين؟

(موظف الأمن) يبقى مش هتدخلي الشركة ياحاجة الشركة لها نظام تقولي جاية لمين وكمان تسيبي بطاقتك هنا في الأمن كده تدخلي ترفضي يبقى تروحي فهمتي ياحاجة ولا نعيد ثاني!

(أم أمل) عاوزة رياض بيه

(موظف الأمن) رياض بيه مرة واحدة ايه هو الواحد أول مايشطح ينطح لا لا

(أم أمل) بتقول أيه يارجل أنت بلغ رياض بيه أن الحاجة أم أمل عوزاه الوقتي حالا

(موظف الأمن) أيه ياحاجة أنت بتديني أوامر خلاص لو عاوزة مساعدة أوصلك بالست هيام مساعدة الباشا يادوب ده مقامك لكن رياض بيه مرة واحدة كده كثير ياحاجة

(أم أمل) بلغ البيه بتاعكم أن أم أمل ومحمد هنا وعاوزة تشوفه

(موظف الأمن) قلت لك ياحاجة مينفعش فيه نظام مدام هيام المساعدة بتاعة الباشا الأول وبعدين الست هيام تقرر تدخلي للباشا ولا تروحي

(أم أمل) أيه الغتاتة دي خلصني بلغ الست بتاعتك دي أني عاوزة أقابل الباشا بتاعكم ده

(موظف الأمن) حاضر ياحاجة

قرص الفون يدور وصوت جرس وموظف الأمن يتكلم بصوت خفيض مع الست هيام

(موظف الأمن) ياست هيام فيه واحدة شكلها غلبان عاوزة تقابل الباشا رياض

(الست هيام) تشخط فيه خلاص أديها اللي فيه النصيب ومشيها

(موظف الأمن) حاضر حاضر خدي يا حاجة

(أم أمل) أيه ده أنت أكيد اتجننت يابتاع أنت

(موظف الأمن) طيب يلا برة مش ناقصين وجع دماغ شحاتة وكمان لسانك طويل

(أم أمل) أخرس شحاتة ياقليل الأدب كلم رياض قوله إني هنا

هرج ومرج في المدخل الباشا وصل الباشا وصل

(موظف الأمن) حاسبي ياست أنتي رياض باشا وصل

(أم أمل) تنادي رياض

(موظف الأمن) أيه ياست أنت اتهبلتي رياض كده حاف

(أم أمل) بتريقة وماله نناديه بغموس ازيك يأبو محمد

(رياض باشا) أنت مين ياست أنت أنا أعرفك منين؟

(أم أمل) تعرفني وكويس قوي يا أبو محمد

(رياض باشا) موجها كلامه لموظف الأمن مين دي ودخلت هنا ازاي

(موظف الأمن) موجها كلامه لأم أمل يخرب بيتك هتودينا في داهية خلاص يارياض باشا هطردها حالا

(أم أمل) أيه يارياض نسيت أم أمل ولا تحب افكرك قدام الناس دي كلها

رياض باشا اضطرب ووشه أصفر ورد ياخبر أم أمل معلش ياحاجة والله شكلك اتغير خالص عن زمان معلش أعذريني

(أم أمل) كلنا الزمن غيرنا يارياض أيه هنفضل نتكلم هنا في مدخل الشركة ولا لك مكتب نتكلم فيه

(رياض باشا) ازاي اتفضلي ياست الكل مكتبي فوق تعالى تشرفيني

(أم أمل) طول عمري بشرف يارياض كبيرة صغيرة بشرف الكل ولا نسيت

(رياض باشا) أكيد اتفضلي مكتبي فوق

صوت خطوات وباب الاسانسير يفتح ثم خطوات ودخول مكتب الست هيام مديرة مكتب رياض باشا

(رياض باشا) موجها كلامه لهيام محدش يدخل مكتبي إلا لما أخلص مع الحاجة مفهوم

(الست هيام) أيوة ياباشا بس حضرتك نسيت فيه اجتماع بعد ربع ساعة،

ومسئولي الشركات موجودين بالفعل في القاعة منتظرين حضرتك تحب أبلغهم ايه؟

(رياض باشا) بغضب أنا قلت محدش يزعجني وأنا في اجتماع مع الحاجة مفهوم ويدخل مكتبه اتفضلي ياحاجة ده مكتبك

(الست هيام) هو فيه ايه أول مرة أشوف الباشا منزعج كده ومين الست دي ياترى عموما الخبر دلوقت بفلوس بكرة يبقى ببلاش

يلا أنا مالي أنتظر

(رياض باشا) أهلا وسهلا يا أم أمل خطوة عزيزة

(أم أمل) ماشاء الله أيه الأملة دي كلها يارياض وباشا كمان

(رياض باشا) ربك لما يريد يا أم أمل

(أم أمل) تضحك بهستريا وتردد كلامه ربك لما يريد

أنت أهبل ولا حاجة يارياض أيه نسيت أصلك ولا أيه؟

(رياض باشا) فيه أيه ياحاجة مالك بس أقعدي ونتكلم

(أم أمل) نتكلم لا أنا جاية في حاجة محددة وبس

(رياض باشا) تحت أمرك خير

(أم أمل) عاوزة عشرة مليون جنيه

(رياض باشا) كام ليه وعشان أيه اديك عشرة مليون جنيه منين تعبي وشقايا

(أم أمل) تضحك منين يأخويا تعبك وشقاك ولا تعب أبويا اللي أنت سرقته

(رياض باشا) يظهر أنك كبرتي وخرفتي يأم أمل أبوك مين هو أبوك كان حيلته حاجة عشان أسرقه

(أم أمل) والله والأرض اللي خليته كتبها باسمي وأخدتني لمكتب المحامي النصاب شريك النصب بتاعك وبيعتني الأرض وأخدت فلوسها واختفيت

(رياض باشا) أنت لسه فاكرة ويضحك

(أم أمل) وعمري مانسيت

والنهارده أنا عاوزة فلوس الأرض والعشرة مليون دول ثمنها زمان دلوقت بقى بعد سبع وعشرين سنة شوف بقى بقوا كام بس أنا النهاردة مش عاوزة غيرهم وبعدين نتحاسب

(رياض باشا) أكيد أنت كبرتي وخرفتي يلا أخرجي من هنا أنا عندي شغل وأظن سمعتي هيام مديرة مكتبي وهي بتقول عندي اجتماع