الفصل التاسع ...عليا وعلى أعدائي

صوت فون يرن

(الأستاذ رامي) ألو مين معايا؟

(الأم) أزيك يا أستاذ رامي أنا أم أمل فاكرني

(الأستاذ رامي) طبعا ياحاجة ازي حضرتك اسف والله أنا مقصر في حقك معلش سامحيني كنت مسافر ولما رجعت اتصدمت من اللي سمعته عن أمل مش فاهم حصل أيه وازاي أمل تعمل كده

(الأم) وحضرتك صدقت يا أستاذ رامي أن أمل ممكن تقتل أخوها طيب إزاي وكمان تقتل معاذ الإنسان الوحيد اللي حبيته من صغرها تصدق كده أستاذ رامي

(الأستاذ رامي) والله أنا مذهول من المفاجأة ومخي اتشل مش عارف حتى أفكر ولا أربط الأحداث ببعضها فيه حاجات كثير مش فاهمها ومحتاج أقعد مع حضرتك استفسر عنها عشان أعرف أدافع عن أمل

(الأم) تمام يا أستاذ رامي تحت أمرك بس أنا متصلة بحضرتك عشان حاجة ثانية خالص

(الأستاذ رامي) خير يا أم أمل تحت أمرك

(الأم) لا يؤمر عليك ظالم يارب العالمين خير إن شاء الله فيه واحدة من مستشفى المجانين كلمتني قالت اسمها نرجس وقالت ليا إن أمل محتاجة تشوفني ضروري وقالت إن أمل قالتلها تخلي الأستاذ رامي يعمل ليا تصريح زيارة

عشان كده كلمت حضرتك

(الأستاذ رامي) أظن الأمر هيكون صعب يا أم أمل لأن أمل تحت الملاحظة ولسه التقرير بتاعها لم يكتب عموما هحاول وربك يسهل من عنده

(أم أمل) شكرا أستاذ رامي ده العشم بردة مع السلامة

(الأستاذ رامي) مع السلامة بس ياريت لا تنسي تتصلي بيا وتحددي ميعاد نتناقش فيه في موضوع أمل

(أم أمل) حاضر بس أطمن على أمل أنا تحت أمرك

(الأستاذ رامي) انتظري مني مكالمة وبإذن الله خير

(أم أمل) شكرا لحضرتك مع السلامة

(الأستاذ رامي) يكلم نفسه ربنا ييسر الأمر ونعرف نعمل لها تصريح زيارة

في اليوم التالي اتصل الأستاذ رامي بأم أمل وقال لها إنه نجح في الحصول على تصريح لزيارة أمل وطلب منها إعداد بعض الملابس لأمل لأنها أكيد تحتاج لهم وأيضا إعداد وجبة من الطعام التي تحبها أمل ونوع من الحلويات كذلك

وفرحت أم أمل جدا ونادت على سيدة الخادمة لتعد لستها أمل ما طلبه المحامي الأستاذ رامي منها وفي صباح يوم الزيارة أخذت أم أمل الأشياء التي طلبها الأستاذ رامي المحامي وأصطحبها الأستاذ رامي في سيارته الخاصة للذهاب لمستشفى الأمراض العقلية لرؤية ابنتها أمل

(مدير المستشفى) أهلا وسهلا أستاذ رامي حضرة المحامي الهمام بس أظن المرة دي القضية صعبة جدا

(الأستاذ رامي) كله على الله هين

(مدير المستشفى) بس البنت معترفة والحكاية مسألة وقت وتخرج من هنا ويتم تقديمها للمحاكمة وإعدامها

(أم أمل) أعوذ بالله بشروا ولا تنفروا الملافظ سعد يا أستاذ اتقي الله حرام عليك أمل بنتي مظلومة وبريئة وبكرة تشوف

(مدير المستشفى) أسف يامدام نسيت أنك مع الأستاذ رامي بكرر أسفي حقك عليا بس الأدلة واضحة وبنتك معترفة

(أم أمل) ليه هو حضرتك كنت القاضي ولا كنت القاضي

(الأستاذ رامي) خلاص يأم أمل الدكتور لا يقصد هو بس بيهزر معي

(أم أمل) هو الكلام ده فيه هزار يا أستاذ رامي أيه مفيش مراعية لقلب الأم

(مدير المستشفى) حقك عليا يامدام مكنش قصدي أنا بس بناغش الأستاذ رامي أسف مرة ثانية

(أم أمل) أنا عاوزة أشوف بنتي لو سمحت

(مدير المستشفى) يرن جرس وينادي العاملة يأم حسن تعالي خدي الحاجة لبنتها ونبهي على التمريض يراقب المريضة لتضر أمها

(أم أمل) ثاني يا أستاذ من فضلك متكلمش على أمل بنتي كده

(الأستاذ رامي) خلاص يا أم أمل يلا تعالى نروح لأمل

(مدير المستشفى) لا يارامي بيه التصريح لأم أمل فقط حضرتك هتقعد معي هنا أهو يارجل نستعيد أيام زمان وذكريات أيام زمان

(الأستاذ رامي ) طيب ياسيدي تمام روحي يأم أمل وأنا هنتظرك هنا بس عشان خاطري أمسكي أعصابك قدام البنت

(أم أمل) حاضر هحاول بإذن الله عن إذن حضرتك أستاذ رامي

صوت خطوات وباب يفتح

(الممرضة نرجس) اتفضلي أدخلي مدام أمل منتظرة حضرتك جوة

(أم أمل) عندما رأت أبنتها أمل بنتي حبيبتي

(أمل) تجري على أمها لتحضنها لكن الممرضة المكلفة بمراقبتها تمنعها

(أم أمل) حرام عليكي سيبي بنتي أخدها في حضني

(الممرضة) ممنوع دي تعليمات وكويس والله أنهم سمحوا لك بالزيارة قبل كتابة التقرير دي أكيد عندك واسطة كبيرة عشان تعملي التصريح ده

( الممرضة نرجس) تخاطب الممرضة زميلتها يأختي وفيها أيه سبيهم يحضنوا بعض شوية حتى المريضة تحس بحضن أمها وتهدى شوية

(الممرضة الأخرى) من فضلك يانرجس ده شغلي لا تتدخلي

(الممرضة نرجس) ياشيخة فين الرحمة والإنسانية

(الممرضة الآخرى) وهي لما قتلت أخوها وجوزها فين الرحمة؟

(أمل) أنا مقتلتش حد أنا مقتلتش حد

(أم أمل) اهدي ياقلبي اهدي أنا مصدقاك أهدي

(الممرضة نرجس) متسبيهم شوية يتكلموا مع بعض وتعالي نأكل لقمة

(الممرضة الآخرى) ولما الدكتور يحيى يشوفنا أقوله أيه

(الممرضة نرجس) لا متخافيش مهوش هنا ده خرج من شوية جاله تليفون من البيت وخرج ومش جاي الوقتي تعالي بقى وسبيهم مع بعض شوية واحنا نأكل لنا لقمة

(أم أمل) خدي ياحاجة نرجس الفلوس دي هاتي لكم حاجة حلوة

(الممرضة الآخرى) لا مينفعش دي رشوة لا تأخديها يانرجس

(الممرضة نرجس) هاتي ياحاجة سيبك منها يلا تعالي نروح بعيد عنهم شوية جايز البت عاوزة تقول لأمها كلمتين

(الممرضة الأخرى) بسرعة يانرجس بسرعة الله يخليكي

(أم أمل) ليه كده يا أمل ليه عملتي فينا كده

(أمل) بجد ياماما أنت مصدقة الحدوتة دي وأني قتلت أخويا ومعاذ حبيب عمري

(أم أمل) مش أنت اللي اعترفتي لوكيل النيابة بكده

(أمل) بعدين ياماما بعدين نتكلم في الموضوع ده المهم أنا عاوزة مليون جنيه

(أم أمل) يالهوي كام مليون جنيه ليه أنت اتجننتي بجد ولا قعدتك هنا جننتك

(أمل) أنا عاقلة يا ماما عاقلة جدا بس إذا مدفعتش المليون جنيه هفضل عمري كله في مستشفى المجانين

(أم أمل) وأنا أجيب لك مليون جنيه منين يا أمل

(أمل) من جوزك أبو محمد أخويا!

(أم أمل) بذهول واستعباط أبوك هو أبوك عنده المبلغ ده وحتى لو عنده هيديه لك ليه هي الحداية بتحدف كتاكيت

(أمل) ماما بقول أبو محمد أخويا مقلتش أبويا سمعاني

(أم أمل) أنت بتخرفي ولا أيه ولا قعدتك هنا في مستشفى المجانين جننتك فعلا

(أمل) ماما المليون جنيه يكونوا عندي في ظرف أسبوع عشان أخرج من هنا وإلا عليا وعلى أعدائي سمعتي

(أم أمل) لا لا أنت فعلا اتجننتي أنا هقوم وأروح للأستاذ رامي هو اللي هينقذني منك ومن هبلك ده

(أمل) ماما الفلوس هتيجي ليا أمتى ماما أنا لو اتكلمت هتشرفي أنت وجوزك أبو أخويا محمد في السجن وده أخر كلام عندي مع السلامة

(أم أمل) تقوم وتمشي البت اتجننت فعلا ورسمي لا خلاص خليها قاعدة هنا وأنا أريح دماغي منها وأعتبرها ماتت زي محمد وخلاص