نبض القلب

​بعد ما العريس دخل القاعة والناس كلها قعدت في أماكنها، سيف فضل يدور بعينه عليها في كل ركن، لحد ما أخيراً وصل لها. وقف وراها وهي كانت مشغولة بالكلام مع واحدة صاحبتها، وسمعها وهي بتقول بنبرة بتحاول تبان فيها قوية:

— "مين قال كدا؟ أنا أساساً مش زعلانة إن هشام خطب.. ده أنا مبسوطة جداً وحتى جيت خطوبته أهو عشان أبارك له."

​صاحبتها بصت لها بشك وقالت لها:

— "كدابة يا أميرة.. إنتي جاية بس عشان محدش يتكلم ويقول حاجة، وإنتي من جواكي مقهورة ومكسورة عشان هو مشي ورا كلام أبوه ومحاربش عشانك، رغم إنه بيحبك وعارف إنك بتحبيه.. إنتي كنتي موقفة دنيتك كلها وليل نهار بتدعي إنه يكون من نصيبك، ومكنتيش قابلة أي حد يدخل حياتك عشان مستنية هشام يجهز.. وهو أول ما جهز عمل إيه؟ راح خطب واحدة غيـ..."

​أميرة قاطعتها بوجع وصوت مخنوق:

— "كفاية بقى.. مش عايزة دمعة واحدة تنزل مني في المكان ده.. أنا عايزة أبقى لوحدي.. امشي لو سمحتي، امشي دلوقتي."

​وفي اللحظة دي، البنت لفت وسيف شاف وشها بوضوح، فبرق بصدمة وقال:

— "إنتي!!"

أميرة اتخضت من وجوده وقالت بتهتهة:

— "سـ.. سيف؟"

أما البنت اللي معاها، واللي كان اسمها نبض، بصت له بذهول وقالت:

— "إنت!"

​أميرة بصت ليهم هما الاتنين باستغراب وسألتهم:

— "هو أنتم تعرفوا بعض؟! هااا.. تعرفوا بعض منين؟"

​سيف ماردش عليها، وبكل عصبية مسك أميرة من إيدها جامد وقال لها:

— "تعالي معايا."

أميرة سألته بخوف: "على فين؟!"، فزعق فيها وهو بيشدها: "هنمشي من هنا دلوقتي حالا!"

​نبض شديت إيد أميرة من إيد سيف وقالت بصوت واطي وهي بتحاول تلم الدور:

— "ششش.. اهدى، هتلم علينا الناس وتفضحنا.. هو يقربلك إيه ده يا أميرة؟"

أميرة ردت وهي بتبص لأخوها: "ده أخويا.." وبعدين بصت لسيف وقالت له بقلة حيلة: "خلاص همشي معاك، بس اديني خمس دقايق.. خمس دقايق بس."

سيف رد بحدة: "انجزي!"

​أميرة سابتهم وقالت إنها رايحة الحمام ومش هتتأخر، وسيف لقى نفسه واقف لوحده جنب نبض. كانت لابسة فستان أسود شيك جداً وحاطة روج أحمر مبرز جمالها، ولابسة هيلز (كعب) عالي. ملامحها الجميلة شدت سيف لأبعد حد، وشعرها كان مفرود زي المرة اللي فاتت. كانت واقفة جنبه وقصرها باين، هي لا طويلة ولا قصيرة، وسيف قعد يفكر في نفسه إن البنات القصيرات بيبقوا جميلات جداً، وإن البنت الطويلة لو شافت نفسها موديل هتبقى أكتر واحدة بتحب نفسها في العالم. الهيلز بتاعها كان أحمر، وسيف رغم غضبه ماقدرش ينكر إنها كانت زي القمر.

​قطع حبل أفكاره صوت نبض وهي بتقول بضيق:

— "إنت أسلوبك كله على بعضه غلط."

سيف رد ببرود: "مالكيش فيه."

رفعت عينيها وبصت له بغيظ وقالت: "إنت إنسان همجي."

رد عليها بنفس الطريقة: "وإنتي دبش."

​بصت له بقرف وقالت: "ما هو واضح فعلاً إني أنا اللي دبش، ولولا إنك طلعت أخو صاحبتي كان زماني دلوقتي ماسحة بكرامتك الأرض.. ولولا برضه إننا في فرح أنا مكنتش هعديلك كلامك، وعلى فكرة أنا بعرف أرد كويس جداً والمرة اللي فاتت مسمحتش الفرصة إني أرد عليك."

​وجت تتحرك خطوة لقدام فخبطت في الجرسون، وسيف لمحها وهي بتبص بسرعة ناحية هشام وخطيبته. المفروض في الموقف ده تبص للجرسون أو قدامها، بس ده محصلش. بعدها شاف أميرة وهي بتقرب من العرسان، حضنت خطيبة هشام وباستها وباركت لها ببرود، ووقفت قدام هشام بكل قوة بعد ما جابته بعينيها باستحقار من تحت لفوق وهي راسم الابتسامة على وشها، ومدت إيدها وقالت له: "ألف مبروك."

​هشام اتعامل معاها بتوتر واستغراب ويدوب مد إيده وقال "الله يبارك فيكي"، وبعد ثواني أميرة ابتسمت وأدت له ضهرها بكل شموخ ومشيت. كانت لابسة دريس أحمر ملفت جداً وكانت حلوة أوي، وسيف استغرب منها جداً وحس إن دي مش أخته اللي يعرفها، أميرة عمرها ما كانت بالقوة دي. حسها وكأنها بتقول لهشام: (وإن ثملت عشقاً.. وإن مت غيرةً.. وإن تمزقت اشتياقاً.. فإن يداي لا تُلوى.. وقلبي لا يُهان).

​سيف نادى عليها: "أميرة.. يلا.." وبص لنبض وقال لها: "تعالي معانا يا نبض نوصلك."

نبض ردت بقرف وهي بتبص له: "لا متشكرة، بابا هييجي ياخدني." وراحت موطية على ودن أميرة وقالت لها بصوت واطي: "إنتي بنت بميت راجل."

​في الطريق، أميرة بدأت تعيط وقالت لسيف:

— "أنا آسفة بجد إني مقولتلكش ولا عرفتك.. بس أنا وهشام كنا بنكلم عادي زي ما أنت عارف، وأنا حبيته واستنيته لحد ما جه في يوم واعترف لي بحبه.. كان كل ما يتقدم لي عريس يقولي أنا لسه مش جاهز يا أميرة، وأنا كنت مستنياه.."

غمضت عينيها اللي مليانة دموع وبقهرة كملت: "لحد ما خطب.. أنا محكتلكش لما عمل كدا عشان متخسرش صاحبك وصديق عمرك."

​سيف زعق بغضب: "إزاي هشام يعمل معاكي كدا؟!"

أميرة رجته: "أرجوك يا سيف مكلموش ولا تقوله حاجة عشان متقللش مني."

سيف حلف: "مش هيدخل بيتنا تاني، وأنا مش هعرفه تاني."

أميرة قالت له: "اتعامل عادي عشان خاطري وكأنك معرفتش حاجة."

مسحت دموعها وحاولت تغير الموضوع وسألته: "إيه بقى.. تعرف نبض منين؟!"

سيف رد باختصار: "قبضت عليها قبل كدا."

أميرة شهقت بذهول: "يخرابي يا سيف! أنت بتتكلم بجد؟ أنت الظابط اللي مرمطها اليوم ده؟!"

سيف هز راسه: "آه أنا."

أميرة قالت بخوف: "نبض مش هتعرفني تاني خلاص وهتقطع علاقتها بيا."

سيف سألها: "هي جاية تبع هشام ولا العروسة؟"

أميرة ردت: "لا تبع العروسة.. العروسة تبقى بنت عمت باباها.. أنا عارفة البنت دي كويس، اسمها أمنية."

​في بيت نبض..

أبوها دخل عليها وقال لها بلهجة أمر:

— "أنا هسافر يا نبض برا البلد لمدة شهر."

نبض سألت: "وبعدين؟"

أبوها كمل: "لازم تروحي تقعدي الشهر ده في الفيلا بتاعتنا.. أنا مش هأمن عليكي في المنطقة العشوائية دي."

نبض انفعلت: "أنا مش هتحرك من هنا!"

أبوها زعق فيها: "إنتي نسيتي آخر مرة ساعة ما اتقبض عليكي؟ عايزاني أأمن عليكي إزاي؟ منطقة زي دي مقدرش أسيبك فيها وأسافر."

نبض بدأت تعيط وقالت: "أنا مقدرش أعيش من غير ريحة ماما اللي مالية البيت ده.." وقربت من الصور ودموعها مغرقة وشها: "أنا مقدرش أبعد عن الذكريات دي.. أنا ماما بتجيلي في منامي هنا كل يوم."

أبوها رد بجمود: "دادة فاطمة هتكون معاكي هناك والخدامين."

نبض بانهيار: "دادة إيه وخدامين إيه! أنا بقول إيه وأنت بتقول إيه!"

أبوها حسم الأمر: "الكلام اللي أنا قلته هيتنفذ وبالحرف الواحد.. وخليكي عارفة إنك لما أرجع هتاخدي كورس علاج نفسي."

وسابها ومشي كالعادة وهي ميتة من العياط.

​في الكلية..

أميرة كلمت نبض في التليفون: "ألو يا نبض إنتي فين؟"

نبض ردت بصوت باين عليه التعب: "أنا وصلت أهو."

أميرة لاحظت: "مال صوتك؟"

نبض قالت: "مفيش."

​أميرة ونبض اتعرفوا على بعض في الكلية، هما الاتنين في كلية إعلام خاص، وعندهم 20 سنة. أكتر حاجة بتميزهم جمال عيونهم، رغم إن عيون أميرة ملونة ونبض لا. نبض دخلت المحاضرة وقعدت جنب أميرة، فقالت لها: "إنتي اللي شكلك تعبانة خالص يا أميرة."

أميرة ردت: "لا خالص.. أنا كويسة."

نبض قالت لها: "متقاوحيش معايا.." بس الدكتور قاطعهم: "الصوت يا شباب."

​بعد المحاضرة، قعدوا في الكافيتريا، وأميرة قالت لنبض:

— "اسمعي كلام باباكي يا نبض.. أنا شايفه إنه معاه حق.. استحملي الشهر ده بس.. هي فين الفيلا دي؟"

نبض قالت لها العنوان، فأميرة صرخت بفرحة: "بتهزري! إحنا برضه ساكنين هناك.. إحنا كدا جيران بجد! لا لا مش مصدقة."

نبض ابتسمت بتعب وقالت: "صدقي.. الدنيا دي مش أوضة وكلنا فيها لا.. دي كنبة وكلنا قاعدين عليها."

أميرة كانت باينة مش طبيعية، فنبض سألتها: "مشربتيش ولا أكلتي حاجة؟"

أميرة ردت: "ماليش نفس.. المهم لازم تيجي من النهاردة وأنا هقعد معاكي طول اليوم."

​تاني يوم..

أميرة كانت واقفة في البلكونة وكلمت نبض: "ألو يا نبض وصلتي؟"

نبض ردت: "آه.. إنتي فين؟"

أميرة بصت حواليها وقالت: "آه شوفتك خلاص.. إيه ده؟ ليه مش الفيلا اللي في وشي؟ إنتي الفيلا اللي جنبي.. دا إنتي طماعة يا بنتي!"

نزلت أميرة وقعدت مع نبض طول اليوم عشان متسيبهاش لوحدها.

​الساعة جات 10 بالليل، فأميرة قالت: "أنا لازم أروح يا نبض عشان بابا بيرن عليا."

نبض ودعتها: "تمام يا حبيبتي مع السلامة."

نبض طلعت أوضتها وحاولت تنام بس معرفتش، كانت خايفة جداً والبيت غريب عليها. فضلت لحد الساعة واحدة تحاول تنام ومش عارفة، فرنت على أميرة.

أميرة ردت بقلق: "في إيه يا نبض؟"

نبض قالت بصوت مرعوش: "أنا مش عارفة أنام.. قلبي مقبوض وخايفة."

أميرة قالت لها: "انزلي افتحي لي الباب وتعالي باتي معايا النهاردة، وبكرة يا ستي هاجي أبات معاكي."

نبض وافقت: "طيب جاية."

​لبست وخرجت تتسحب عشان دادة فاطمة ماتحسش بيها، لأنها كانت نامت والخدم روحوا. دخلت نبض بيت أميرة ونامت عندها في أوضتها.

الساعة 3 بالليل، سيف خرج من أوضته يشرب، لمح نبض وهي داخلة أوضة أميرة. فرك في عينيه بذهول وقال لنفسه: "أنا بحلم وأنا صاحي بالبنت دي ولا إيه؟" وأول ما صحي تاني يوم فضل يفتكر الموقف ويستغرب، هو في حد بيحلم وهو صاحي؟!

​تاني يوم في المحاضرة..

نبض سألت أميرة بقلق: "مالك يا أميرة؟"

أميرة ردت وهي بتنهج: "مش عارفة آخد نفسي.."

نبض قامت بسرعة: "طيب تعالي نطلع برا في الهوا.. لو سمحت يا دكتور، هنخرج عشان هي تعبت."

الدكتور وافق، وطلعوا قعدوا في الكافية. نبض طلبت "مية وعصير لو سمحت". الكافية ده كان في وش كلية هندسة ومكشوف.

​نبض لاحظت إن أميرة بصة ناحية برا بشرود، فبصت هي كمان وشافت أمنية خطيبة هشام واقفة قدام الكلية، ووقفت عربية قدامها ونزل منها هشام، وقف جنبها كلمها وبعدين فتح لها باب العربية بكل اهتمام.

نبض بصت لأميرة بخوف ومسكت "المنيو" بسرعة عشان تداري الموقف وقالت بتوتر: "نبض.. أطلبلك إيه تاكليه؟"

كانت بتحاول تغير الموضوع بكل قوتها عشان أميرة متفكرش، بس أميرة كانت لسه بصة عليهم بوجع. نبض مدت إيدها تلمسها وهي بتقول: "أاااميرة.."

فجأة أميرة وقعت من على الكرسي وفقدت الوعي. نبض صرخت بخوف: "أميرة!!"

​في اللحظة دي، تليفون أميرة رن، وكان الاسم المكتوب على الشاشة "my pro" (سيف). نبض ردت بسرعة وهي بتترعش:

— "ألو.. سيف.. أميرة تعبت وأغمى عليها!"

سيف رد بفزع: "أنتم فين؟!"

نبض قالت له: "في الكافية اللي قدام هندسة."

وبدأت تنده على الجرسون وهي بترفع راسها وتعيط: "هاتلي مية لو سمحت.."

وفجأة لقته واقف قدامها.. وكأن الروح لما بتقف قدام الوجع بكامل إرادتها بتكون أقوى مما نتخيل، أما لو وقفت قدامه وهي مجبرة والقدر بيضغط على جرحها، بتتشتت من شدة الألم وتفقد الصواب.