الفصل الثاني

“اقعد… من هسه تبدأ حياتك الجديدة.”

آسر جلس ببطء على الكرسي، وعينه بعده على الباب اللي طلع منه أبوه.

الغرفة رجعت هادئة، لدرجة إنه صار يسمع صوت الساعة القديمة المعلقة على الحايط.

الرجل اللي قدامه فتح درج المكتب، طلع علبة سكائر، وشعل وحدة بدون استعجال.

“اسمك آسر، صح؟”

آسر هز راسه بخفة.

الرجل أخذ نفس طويل من السكارة، وبعدين قال:

“من اليوم، تسمع الكلام وتسوي المطلوب منك، وما تدخل نفسك بشي ما يخصك.”

آسر ظل ساكت.

“إذا التزمت، ترتاح. وإذا لا…”

سكت لحظة وهو يطفي السكارة.

“راح تتعب.”

آسر بلع ريگه بصعوبة، لكنه حاول يثبت شكله.

الباب انفتح فجأة، ودخل شاب يمكن بعمر العشرينات، لابس ملابس سوداء وملامحه حادة.

“خالد، خذه فوق.”

الرجل اللي اسمه خالد هز راسه:

“تمام.”

آسر وقف ببطء، وبعدها مشى ورا خالد خارج الغرفة.

الممرات كانت طويلة وضيقة، وأصوات الرجال بكل مكان. بعضهم يضحك، وبعضهم يتعارك، وآخرين جالسين يدخنون بصمت.

آسر كان يمشي وهو يحاول ما يبين خوفه.

خالد فتح باب غرفة صغيرة بالطابق الثاني.

“هنا تنام.”

دخل آسر ببطء.

الغرفة كانت ضيقة، بيها سرير قديم وخزانة مكسورة وشباك صغير يطل على الشارع.

آسر لف نظره بالمكان بدون كلام.

خالد كان واقف عند الباب:

“ارتاح هسه. باچر تعرف شغلك.”

آسر رفع عينه عليه بسرعة:

“شنو الشغل أصلًا؟”

خالد ابتسم ابتسامة خفيفة، مو واضحة إذا كانت سخرية أو شفقة.

“كلنا دخلنا وسألنا نفس السؤال.”

آسر ظل واقف بمكانه للحظات، ثم رجع نظره للغرفة الصغيرة.

خالد كان على وشك يطلع، لكن آسر ناداه:

"استنى."

التفت خالد عليه.

"راح أبقى هنا وحدي؟"

خالد رفع حاجب باستغراب خفيف.

"تريد أحد ينام وياك؟"

آسر هز راسه بسرعة.

"لا... بس أسأل."

سكت خالد شوي، وبعدين قال:

"راح تتعود."

وأغلق الباب وراه.

بمجرد ما انغلق الباب، حس آسر بثقل غريب نزل على صدره.

لأول مرة من وفاة جدته، ما كان يعرف شنو راح يصير باچر.

جلس على السرير القديم، وانحنى للأمام وهو يحدق بالأرض.

قبل أسبوع واحد بس، كان يلعب كرة بالنهر مع أطفال القرية.

قبل أسبوع واحد، كانت أكبر مشاكله إنه يخسر مباراة أو يرجع للبيت متأخر.

أما هسه..

فهو بمكان ما يعرفه، بين ناس ما يعرفهم، وحياة ما اختارها بنفسه.

رفع رأسه ببطء ونظر للشباك الصغير.

أضواء المدينة كانت مختلفة عن قريته.

أكثر ضجيجاً.

وأقل رحمة.

في صباح اليوم التالي، استيقظ آسر على صوت طرق قوي على الباب.

فتح عينه بتعب.

"قوم."

كان صوت خالد.

فتح الباب ودخل بدون انتظار.

"انزل بسرعة."

آسر وقف من السرير ومسح عينه.

"وين؟"

"أول مهمة."

تجمد بمكانه للحظة.

أول مهمة!!.

الكلمة وحدها كانت كافية تخليه يحس بالتوتر.

نزل ورا خالد للطابق الأرضي.

هناك كان رائد واقف مع عدة رجال.

أحدهم مد يده وسلم خالد ظرفاً سميكاً.

خالد أخذه، ثم أعطاه لآسر.

آسر ناظر الظرف باستغراب.

"وصله لهذا العنوان."

"بس؟ "

" بس."

آسر أخذ الظرف وهو يحاول يخفي ارتباكه.

رائد كان يراقبه بصمت.

أما خالد، فاكتفى بالإشارة نحو الباب.

"يلا... خل نشوف إذا تكدر تنجز أول مهمة."

آسر أخذ الظرف، لكنه ما تحرك.

ناظر العنوان المكتوب عليه، وبعدين رجع نظره لخالد.

"لمن هذا؟"

"مو شغلك."

"وشبيها الرسالة؟"

"مو شغلك."

"ليش ما تودوها بنفسكم؟"

أحد الرجال اللي واقفين ضحك بخفة.

أما خالد فتنهد وقال:

"كثرة الأسئلة ما تفيدك هنا."

لكن آسر ما سكت.

"إذا ضعت بالطريق شسوي؟ وإذا سألني أحد شنو أجاوب؟ وإذا—"

"آسر."

قاطعه خالد.

"خذ الظرف وروح."

لكن فضول آسر كان أقوى.

"هالمكان شنو أصلًا؟ وليش كلكم تشتغلون هنا؟ وليش—"

قبل ما يكمل، ضربه أحد الرجال من خلفه على مؤخرة رأسه ضربة خفيفة لكنها موجعة.

تراجع آسر خطوة وهو ماسك رأسه بصدمة.

"اسكت شوية."

ساد الصمت للحظات.

آسر نظر للرجل بغضب، لكنه ما تكلم.

رائد كان يراقب المشهد بصمت من البداية.

وبعدها قال بهدوء:

"خلوه يروح وحده."

التفت خالد بسرعة.

"وحده؟"

"إي."

أحد الرجال ابتسم بسخرية.

"يمكن يتعلم ويقلل حجي."

أخذوا منه مفتاح السيارة اللي كان خالد ناوي يعطيه إياه.

ثم أعطوه ورقة العنوان فقط.

آسر عقد حواجبه.

"شلون أوصل؟"

ما أحد جاوبه.

"المكان بعيد؟

ما أحد جاوبه.

"زين إذا—"

"اطلع."

خرج آسر من المبنى وهو بعده مو فاهم شنو قاعد يصير.

وقف بالشارع للحظات وهو ينظر للعنوان المكتوب بيده.

ما يعرف المنطقة.

ما يعرف الشخص.

وما يعرف ليش حاسين كأنهم متعمدين يرموه وحده.

مع مرور الساعات، بدأ يفهم.

المكان أبعد مما توقع.

مشى بين شوارع ما يعرفها، وسأل عشرات الناس عن الطريق.

مرات يضيع.

ومرات يرجع من نفس المكان اللي مر بيه قبل ساعة.

الشمس ارتفعت فوق راسه، وبعدها بدأت تميل للغروب.

وقدماه بدأتا تؤلمانه.

لكن ما كان عنده خيار غير يكمل.

كل خطوة كان يمشيها، كان يفهم أكثر.

هذوله الرجال ما كانوا يعاقبونه لأنه أخطأ.

كانوا يعاقبونه لأنه سأل.

وفي ذلك اليوم، بدأ آسر يتعلم أول درس حقيقي في حياته الجديدة:

بعض الأماكن... كثرة الأسئلة فيها أخطر من الجهل نفسه.

مع غروب الشمس، كان آسر بعده يمشي.

الغبار عالق بملابسه، وقدماه تؤلمانه من كثرة الطريق، أما الظرف فكان ما زال ممسوكاً بيده كأنه الشي الوحيد اللي يربطه بالمكان اللي طلع منه.

وقف للحظة عند طرف الشارع، وأخذ نفساً عميقاً.

كان جائع.

متعب.

ومو فاهم ليش يعاملونه بهالطريقة.

لكن للمرة الأولى، ما سأل أحد.

نزل نظره للعنوان مرة أخيرة، ثم كمل طريقه بصمت.

خلفه كانت طفولته تبتعد خطوة بعد خطوة.

وأمامه... عالم ما يعرف عنه أي شيء.

عالم ما يرحم الضعيف، ولا يجاوب على الأسئلة.

للحظة، فكر آسر أن يرمي الظرف ويهرب.

ما كان يعرف هذوله الناس.

ولا كان يدين لهم بشيء.

فلماذا يكمل؟

لكن قبل أن يغادر المبنى، كان أحد الرجال قد أمسكه من كتفه بقوة وقال:

"اسمعني زين... إذا ما وصلت الرسالة ورجعت بدونها، راح تتمنى لو أنك ضعت بالطريق."

ثم تركه ودفعه نحو الباب بقوه.

آسر لم ينسَ النظرة المرعبه التي كانت بعيني الرجل.

ولا الطريقة التي سكت بها الجميع بعد كلامه.

كان صغيراً، لكنه لم يكن غبياً.

فهم الرسالة.

هذه ليست مهمة يستطيع رفضها.

وليس لديه مكان آخر يذهب إليه.

لهذا شد الظرف بيده، وأكمل طريقه.

ليس لأنه أراد ذلك...

بل لأنه أدرك أن الهروب قد يكون أسوأ من البقاء.

الحقيقة أن الرسالة لم تكن مهمة بقدر ما كان آسر نفسه هو الاختبار.

رائد لم يكن مهتماً بالظرف، ولا بالشخص الذي سينتظره في الطرف الآخر.

كان مهتماً بشيء واحد فقط...

هل سيعود آسر؟

في هذا المكان، لم يكن أحد يحصل على الثقة مجاناً.

كل شخص مرّ من هنا اضطر أن يثبت نفسه أولاً.

لهذا تركوه يمشي وحده.

ليضيع.

ليجوع.

ليتعب.

وليروا ماذا سيفعل عندما لا يجد أحداً يساعده.

هل سيرمي الرسالة ويهرب؟

هل سيستسلم ويعود؟

أم سيكمل الطريق مهما كان صعباً؟

لم يكن آسر يعلم ذلك وهو يمشي في الشوارع حاملاً الظرف بيده.

لكنه كان يخضع لأول اختبار حقيقي في حياته الجديدة.

واختبار كهذا...

كان أهم عند رائد من أي رسالة في العالم.

شد الظرف بيده وكمل طريقه بصمت.

كان يظن أن أصعب ما مرّ عليه هو فقدان جدته.

لكنه لم يكن يعلم أن هذا مجرد بداية.

وأن الخطوة التي أخذها في ذلك اليوم...

كانت أول خطوة نحو حياة لن يعود منها كما كان أبداً.