Kabanata 6

"Ano ba! Huwag mo nga akong tawagin sa ganyan.Hindi mo ako pagmamay-ari,” reklamo ni Minna kay Nikolaj habang pilit na kumakawala sa mahigpit na yakap ng lalaki.

Pero imbes na bitawan siya mas lalo lang hinigpitan ng lalaki ang pagkakapulupot ng braso nito sa bewang niya. Isiniksik ng binata ang mukha nito sa leeg niya kung kaya’t ang nakaka-kiliti nitong balbas ay kumikiskis sa makinis niyang balat. 

"Sobrang ganda kaya pakinggan," paos na bulong nito. “Gustong-gusto kong tawagin kang ganun…” 

Ang mainit na hininga nito sa tenga niya ay nagdulot ng kilabot sa buong katawan ng dalaga. Hindi man lang tumigil si Nikolaj sa pagmasahe sa bewang niya. Para ba siyang harinang minamasa nito’t pinanggigilan.  Wala siyang nagawa kung ‘di ang sumandal sa dibdib nito, habol-habol ang kanyang hininga habang hinahayaan ang lalaking lamutakin siya hanggang sa ito na mismo ang mapagod. 

Nasa teen pa lang siya noon nung magkakilala sila ni Nikolaj, nasa peak pa siya ng nagdadalaga kung kaya’t medyo malaman siya. Gustong-gusto ng lalaki ang katawan niya noon. Minsan na-i-insecure siya sa mga kaedaran niyang mga babaeng sexy pero si Nikolaj? Paboritong-paborito ang katawan niya. Akala nga niya mahilig sa chubby girl si Nikolaj ngunit nagustuhan kasi siya nito nung payat pa siya.

Talagang wala lang itong pakialam kung tumaba siya o mas lalong pumayat. Tanggap siya nito kahit ano pa man ang shape niya. Sabi nga nito, noong una siya nakita nito ay gusto na nitong angkinin siya. Gusto na nitong ikulong siya sa mga bisig nito at hindi na papakawalan pa. 

At 'yun nga ang ginawa ni Nikolaj, inagaw siya nito sa pamangkin, sa pinaka marahas na paraan. 

***

Sobrang pinagsisihan ni Minna ang lahat. Sana hindi na lang din niya sinagot noon si Khalil. Kung hindi sana siya pumayag na maging girlfriend nito, hindi niya makikilala ang tiyuhin nitong si Nikolaj. Hindi rin sana nagkanda leche-leche ang buhay niya.

Pero huli na ang lahat, hindi na niya mababago pa ang nakaraan. 

Sobrang inosente pa siya noon, isang simpleng estudyante’t puno ng pangarap at walang kamuwang-muwang sa mundo.Ang pino-problema niya lang nga noon ay kung saan siya magta-trabaho kapag naka-graduate na siya. Yun lang wala ng iba. 

Biglang bumalik sa kanyang alaala nung nasa kolehiyo pa siya.  

"Hay naku, ewan ko ba kung ilan sa atin ang makaka-survive dito sa Pinas pagka-graduate, ang hirap pala ng college!" buntong-hininga ng roommate niyang si Ariana habang nakadungaw sa bintana at pinagmamasdan ang asul na kalangitan. 

Sumagot naman ang isa pa nilang roommate, si Kyla. "Ang nega mo naman, sis. First year pa lang tayo, may three years pa tayo bago gumraduate, chill ka lang. Huwag na muna natin ‘yang problemahin!” 

Napailing si Ariana sa sinabi ni Kyla. "Mabilis lang ang panahon, Kyla. Matatapos na nga ang 2nd sem natin, sa susunod na taon 2nd year na tayo. At pagdating ng 4th year, puro OJT na! Hindi man lang ako makakapag-pasyal bago yun!”

Napangiti si Minna habang nakikinig sa kanyang mga kaibigan. "Eh ‘di bago tayo gumraduate, libutin natin lahat ng mga tanawin dito sa ciudad. Lahat ng masasarap na pagkain ay tikman natin!” 

 Pinitik ni Ariana ang noo niya. "Puro ka na naman pagkain. Sige ka, tataba ka niyan."

Napakibit-balikat na lamang si Minna. "Eh ‘di tumaba. Basta masaya ang tiyan ko at makain lahat ng kini-crave niya, okay lang maging chubby. Sabi nga Chubby is the new sexy!"

Tumawa si Kyla at tinukso pa siya. "Kahit naman tumaba ka, maganda ka pa rin, Minna. Siguradong patay na patay pa rin sa'yo 'yung school heartthrob nating si Khali!"

Napatingin si Minna sa labas, kita niya ang lumang gusali sa siyudad. “Wala akong pakialam kung gusto niya man ako o hindi…”

Napatingin sa kanya si Ariana at seryosong nagsalita, “Minna, alam mo mahirap mabuhay rito sa Manila nang walang kapit. Kita mo kami? Wala kaming choice kung ‘di ang magbanat ng buto pero ikaw? Ang ganda-ganda mo, ‘yan ang asset mo para makaalis sa kahirapan!”

"Paano naman aber?" tanong ni Minna.

Nginitian siya ni Ariana nang makahulugan. "Alam mo na yun sis!"

"Hindi ko alam."

Napairap si Ariana sa kanya. "Second day of school pa lang, nililigawan ka na ni Khalil. Halos matapos na ang school year, nakabuntot pa rin sa'yo ang lalaking yun. Bulag-bulagan lang te? Manhid yarn?"

Sa katunayan, alam na alam yun ni Minna, kaya nga hindi niya sinasagot si Khalil dahil alam niya kung sino ito at ang estado nito sa buhay. 

Si Khalil Carreon na kilala sa buong university nila, ang apo ng mga Carreon, isang rich kid at mala-prinsipe ng ciudad. 

Bukod sa mayaman, gwapo at matalino pa ito. Pila-pila nga ang mga babaeng nagkakagusto sa lalaki na aabot ata ng Edsa!

Samantalang siya? Isang simpleng probinsyana na nakipagsapalaran sa Kamaynilaan. Ang tingin niya sa sarili niya’y mababa. Ang university nila na puno ng mga magagandang babae’t mala-beauty queens pa. Para nga siyang extra sa pelikula kapag nakahilera sa mga babaeng ito. Isang julalay kumbaga. 

Subalit iba ang naiisip ng ibang tao sa kanya, sobrang inosente at ma-appeal. Hindi nakakasawang tingnan, yung tipong isang tingin lang gusto na ng mga itong protektahan ang dalaga habang-buhay. Ganun ang nararamdaman ng ibang kalalakihan kay Minna hindi lang aware ang dalaga.

Pagkatapos nilang mamasyal dahil nagkayayaan kanina ay agad silang bumalik sa dorm. Pagod na pagod si Minna kung kaya’t gusto na lang niyang humilata at matulog. 

Papahiga na sana siya nang biglang may kumatok na babae sa pinto ng dorm nila.

"Nandito ba si Minna Nejera?" mataray na tanong ng babae sa kanila.

Agad na napabangon si Minna. "Ako. Bakit?"

"May naghahanap sa'yo sa labas," irap na sabi ng babae sa kanya.

"Sino kamo?"

"Lumabas ka na lang kaya? Ang dati mo pang tanong!" Padabog na umalis ang babae, halatang badtrip na badtrip ito. 

May kutob na si Minna kung sino ang naghahanap sa kanya kung kaya’t paglabas ng dorm building nila, hindi na siya nagulat pa. Tama nga siya, si Khalil nga ang naghihintay sa kanya. Nakatayo ito habang nakasandal sa sports car nitong kulay pula. Napa-smirk ang lalaki nang makita siya, gusto sana niyang tumalikod na’t bumalik sa kwarto subalit napigilan na siya ng lalaki. 

"Khalil? Anong kailangan mo?"

Sobrang tangkad ni Khalil kung kaya’t nakatingala siya sa lalaki. Sobrang gwapo rin at maangas tingnan. Medyo may pagka-seryoso pero kapag ngumiti ay talagang mapapatili ka sa kilig. 

Kahit saang university ilagay ang lalaking ito, siguradong siya ang magiging center of attraction. Kahit nga mahirap lang ito, mukha pa lang uubra na talaga sa iba. 

Subalit siya? Ayaw na ayaw talaga niya ng spotlight, ayaw niya ng gulo. Ang gusto lang niya ay maka-graduate ng matiwasay. Study first kumbaga. Kahit nga sa klase ay hindi siya nagpapa-participate eh at tahimik lang siya sa gilid. Kaya nang makuha niya ang atensyon ng lalaking ito, hindi siya natuwa. Kung ‘di isa itong babala sa paparating na delubyo sa buhay niya.