Chapter 6

"Alyanna, lumala na naman ang kalagayan ng malas mong kapatid. Dahil dyan, dapat mo na akong bayaran sa pag-aalaga ko sa kanya para sa'yo. Bilisan mo at magpadala ka ng 50,000 pesos ngayon din dahil kailangan ko na ng pera! Ang dami-dami kong gastusin!" Diretso pa rin si Clara gaya ng dati, hindi kailanman tinatago ang dahilan kung bakit siya lumalapit sa anak niyang si Alyanna.

Ramdam na ramdam ni Alyanna na hindi siya mahal nito. At kahit kailan yata ay hindi na siya nito mamahalin.

"Mama, wala po akong gano'ng kalaking pera ngayon. Kakatanggal lang po sa akin ng amo ko ngayong araw sa trabaho ko,” sagot ni Alyanna habang umiiyak.

Nakaupo siya sa gilid ng kalsada, yakap ang kanyang mga tuhod, tahimik na umiiyak habang nakabaon ang mukha sa kanyang mga tuhod, ayaw ipakita sa mga dumadaan ang kanyang kawalan ng pag-asa na makakaya pa niya ang ganitong klaseng buhay.

"Ano naman ngayon kung natanggal ka sa trabaho? Aba, gumawa ka ng paraan!" sarkastikong putol ni Clara sa pag-iyak ni Alyanna sa kabilang linya, "Basta sinasabi ko sa’yo ngayon pa lang, kung hindi mo ako padadalhan ng pera, agad kong paaalisin sa ospital ang kapatid mo at bahala na siya sa buhay niya! Ubos na ang pasensya ko sa inyo!”

"Mama, huwag mo naman po kaming tratuhin nang ganito. Maawa naman po kayo sa amin," humikbi si Alyanna habang nagmamakaawa, "Ina ka namin. Bakit ganyan ka po kung umasta? Hindi mo po ba kami mahal kahit konti man lang?”

"Ina?" ngumisi si Clara sa kabilang linya, "Alyanna, isa kang malas sa pamilya, alam mo ba 'yon? Kung hindi dahil sa’yo sampung taon na ang nakalipas, hindi sana nabundol ng sasakyan at namatay ang Mama mo! Huwag mo nang sabihing magkamag-anak tayo at baka pati ako madamay sa kamalasan mo!"

Malamig at walang pusong winika ni Clara ang mga salitang iyon bago niya biglaang ibinaba ang tawag.

‘Alyanna, isa kang malas sa pamilya!’

‘Kung hindi dahil sa’yo, hindi sana namatay ang Mama mo!’

Parang kutsilyong bumaon ang mga salitang iyon sa kanyang puso, paulit-ulit iyon sa kanyang isip at sa isang iglap, tila umagos ang dugo.

Mahigpit niyang kinagat ang kanyang labi habang umiiyak sa matinding sakit. Hindi pa siya umiyak nang ganoon katindi kailanman.

Minsan, gusto na lang niyang mamatay at tapusin ang lahat sa kanyang buhay, pero ang huling habilin ng kanyang ina bago ito mamatay ay alagaan niyang mabuti ang kanyang nakababatang kapatid.

Hindi siya maaaring mamatay. Walang silbi ang kanyang ama at malamig din ang pakikitungo sa kanila ng kanilang madrasta. Kung mamamatay siya, walang mag-aalaga sa kanyang kapatid.

Hindi niya namalayang tumayo siya at naglakad sa matao at maingay na lansangan, waring tuliro na. Pabulong siyang nagsasalita, “Hindi ako maaaring mamatay. Kailangan kong bumalik sa probinsya. Kailangan kong bumalik para alagaan ang kapatid ko. Kailangan ako ng kapatid ko…”

Pagbalik ni Alyanna sa probinsya, dumiretso siya agad sa ospital. Pagkatapos niyang malaman ang kalagayan ng kanyang kapatid, bakas sa kanyang mukha ang matinding pagod at kawalan ng pag-asa na maayos pa ang kalagayan ng kanyang kapatid.

Ayon sa doktor, hindi maganda ang kondisyon ng leukemia ng kanyang kapatid at kailangan nitong sumailalim agad sa bone marrow transplant, kung hindi ay bibilis ang paglala ng sakit at maaaring mamatay ito anumang oras.

Halos 300,000 pesos ang halaga ng bone marrow transplant, ngunit ang lahat ng kanyang dalang pera at ipon ay wala pang 30,000 pesos.

Isip na siya nang isip kung saan niya kukunin ang kulang pang pera para sa kanyang kapatid. Halos ikabaliw na niya ito kakaisip.

Sugarol kasi ang kanyang ama at naubos nito ang lahat ng ipon ng kanyang ina mula sa negosyo na tinayo nito.

Ang tanging mahalagang bagay sa kanilang pamilya ay ang bahay, ngunit pinakasalan ng kanyang madrasta na si Clara Perez ang kanyang ama dahil sa bahay na iyon.

Napakakuripot at makasarili ni Clara kaya siguradong hindi siya papayag na isangla sa bangko ang bahay.

Ano ang dapat gawin? Kanino siya hihiram ng 300,000 pesos? Sa dami ng nangyayari sa mundo, meron pa kayang tao ang magpapahiram ng ganoong halaga sa kanya?

Kung meron man, isang mayaman ang taong iyon. Pero, sa sitwasyon ni Alyanna ngayon ay alam niyang wala siyang malalapitan na isang mayaman.

Ilang minuto pa ay biglang pumasok sa kanyang isipan ang mukha ni Clark Denver, at agad na napailing si Alyanna. Hindi niya napigilang kagatin ang kanyang labi at murahin ang sarili sa inis.

‘Alyanna, kailan ka ba titigil sa masamang ugali mong si Clark Denver ang lagi mong tinatakbuhan kapag may problema ka? Hindi ka na talaga natuto kahit kailan eh!’

Patuloy pa ang pakikipag-usap niya sa kanyang sarili.

‘Galit na galit na si Clark sa'yo ngayon, tiyak na hindi ka na nito pauutangin. Baka pagtawanan ka pa nga niya. Tigilan mo na ang kahibangan mo.’

Bumalik si Alyanna sa silid ng kanyang kapatid na masama ang loob. Pagpasok na pagpasok niya, nakita niyang may lalaking nakayuko sa sahig at pinagtuturnilyo ang kanyang maleta.

“Papa, anong ginagawa mo?!” galit na sigaw ni Alyanna. Tuwing umuuwi siya sa kanilang probinsya, lagi na lang kinakalat ng kanyang ama ang kanyang gamit at wallet para kunin ang pera at ipangsugal.

“Alyanna, buti naman at dumating ka na.” Tuwaang- tuwang lumapit si Fidel Suarez sa kanyang anak.

“Bilisan mo, bigyan mo ako ng 30,000 pesos.Ramdam ko. Swerte ako ngayon. Mababawi ko lahat ng nawalang pera ko. Promise iyan.”

“Umalis ka rito! Huwag mong kukunin ang bag ko! Isa pa, wala namang laman iyan! Wala rin akong mapapautang sa iyo!” Hindi na napigilan ni Alyanna ang sumigaw sa pagkadismaya sa kanyang amang lulong sa sugal.

Pinigilan niyang umiyak at itinulak palayo ang ama niyang pilit kinukuha ang kanyang bag. Ang konting perang natitira roon ay para sa gamutan ng kanyang kapatid, at hindi niya maaaring hayaang makuha iyon ng kanyang ama para ipangsugal lang.

“Paano ka mawawalan ng pera? Hindi ba’t isa kang babaeng bayaran sa showbiz? Gano’n kataas na trabaho, siguradong malaki ang kita mo dahil kung sinu-sinong artistang lalaki ang nagkakandarapa sa iyo!” sunod-sunod na paninisi ni Fidel sa kanyang anak.

“Isa akong entertainment reporter! Hindi ako bayarang babae ng mga artista! Ano ba naman kayo, Pa?!” sigaw ni Alyanna sa galit.

Ama niya ito, ngunit bakit palagi siyang tinutulak nitong ibenta ang kanyang sarili?