Kabanata II: Gusto

Lumawak ang ngiti ni Jolo nang marinig niya ang balita ni Jimboy. Parang nakalimutan niyang nagtatampo siya sa amin dahil hindi namin sinasabi sa kanya ang pinag-uusapan namin kani-kanina lang.

"Oh, talaga ba?" hindi makapaniwalang tanong ni Jolo kay Jimboy.

Umupo sa may ugat ng puno si Jimboy at pilit na pinapaypayan ang sarili gamit ang kanyang kamay. "Oo nga! Kitang-kita ng dalawa kong mata. Sakay pa nga sila ng tricycle ni Mang Domeng, eh."

Sumingit naman si Mary Anne sa usapan ng dalawang lalaki. "Sus, umiiral na naman ang pagka-chickboy niyo."

"Bakit? Nagseselos ka?" pagbibiro ni Jolo. "Wala naman kasing masyadong maganda rito sa probinsya natin, eh."

"Hala, makapagsalita akala mo naman gwapo." Pambabara naman ni Rhea.

Lumapit naman sa akin si Jolo at kaagad akong inakbayan. "Kahit tanungin niyo pa si Iris. 'Di ba Iris, tama ako?"

Sinimangutan ko naman siya. "Aba, ewan ko sa'yo. Dinadamay mo pa ako sa kalokohan mo."

"Ang dami niyong satsat, kung puntahan na lang kaya natin ang bahay nina Aling Carmen." Suhestiyon ni Jimboy.

Pumalakpak naman si Jolo na tuwang-tuwa. "Ayun! Tama ka nga, Jimboy. Puntahan natin."

"Ayoko nga," ani Rhea.

"Ang KJ mo naman." Wika ni Jimboy na sinang-ayunan naman ni Jolo.

Umirap naman si Rhea at tumngin sa akin.

"Sasama ka?" tanong nito.

Pinagtinginan ako nina Jolo at Jimboy.

"S-Sige na nga..."

Nag-apir ang dalawang ugok.

"Majority wins!" sigaw ni Jolo na animo'y nanalo ng pustahan.

"Sasama na nga kami." Napilitang wika ni Rhea kaya nagsimula na kaming maglakad na lima.

xxx

Panay ang usapan nina Jolo at Jimboy sa anak ni Ninang Carmen. Talagang makikita mo talaga sa mukha ni Jimboy na para siyang nakakita ng magandang dalaga kani-kanina lang. Habang ang isang kaibigan naman naming si Rhea ay panay na ang maktol. Hindi raw siya komportable maglakad ngayon. Naiintindihan ko naman siya kung bakit. Napag-usapan na namin 'yon kanina.

"Bakit ba kasi kating-kati iyan si Jolo na makita ang anak ni Aling Carmen?" tanong sa akin ni Mary Anne.

"Si Jimboy kasi ang may kasalanan. Kung ilarawan niya ang anak ni Aling Carmen parang dyosa." Himutok ni Rhea.

Napatikhim na lamang ako. "Siguro, eh, tumigil na lamang kayo sa pagbabangayan. Pagbigyan na lang muna natin ang dalawa. Sabi pa nga ni Jolo, tropa naman tayo, 'di ba?"

Tumango-tango naman si Rhea. Mukhang nakukuha niya ang punto ko.

Hindi nagtagal ay narating din namin ang lumang bahay nina Ninang Carmen. Panay pa ang tago namin sa may malaking punong kahoy upang hindi kami makita. Nasa kanan ko si Jolo habang si Mary Anne ay nasa kaliwa ko. Sina Jimboy at Rhea naman ay nasa katabing puno.

Una muna naming nakita ay si Ninang Carmen. Abala ito sa paghahakot ng mga naglalakihang kahon mula sa labas papasok sa kanilang bahay.

Medyo may edad na rin si Ninang Carmen kagaya ni Nanay. Ngunit, parang hindi pa rin kumukupas ang ganda niya.

"Siguro kaya maganda ang anak ni Aling Carmen dahil mana sa kanya," bulong ni Jolo sa aking tabi.

"Parang Miss Universe ang tindig ni Aling Carmen at saka mestiza rin," wika naman ni Mary Anne.

Hindi nagtagal ay may lumabas pang isang babae. Naka-pulang t-shirt at naka-itim na shorts. Kamukhang-kamukha rin ni Ninang Carmen ngunit mas batang bersyon.

Narinig namin ang pagsitsit ni Jimboy kaya napatingin kami sa pinagtataguan niya. Sumenyas naman siya sa amin na siya ang anak ni Ninang Carmen kaya kaagad kong ibinalik ang tingin sa dalagang nakita.

Totoo nga ang sinabi ni Jimboy kanina. Ang ganda niya. Ang ganda niya talaga.

Parang natulala ako ng ilang saglit habang nakatanaw pa rin sa kagandahang iyon. Parang nahihipnotismo ako sa kanyang ganda.

Kinapa ko ang dibdib ko. Papalakas nang papalakas ang tibok ng puso ko.

"Gusto ko na yata siya," wala sa sariling wika ko.

Bigla akong hinampas ni Mary Anne sa balikat. "Gusto raw," wika nito.

Inabot naman ni Jolo ang balikat ni Mary Anne saka nito niyugyog. "Hindi mo ba nakikita ang gandang 'yon? Pati nga si Iris natulala na."

Nagtaray naman si Mary Anne. "Aba ewan ko sa inyo. Umalis na nga tayo!"

xxx

Pagkabalik namin ng tambayan ay kanya-kanya na kami ng kwento. Malamang hindi papatalo do'n si Jolo. Panay ang kwento niya sa amin kung gaano kaganda ang anak ni Ninang Carmen. Interesado naman kami pareho ni Jimboy ngunit sina Rhea at Mary Anne ay hindi.

Hindi ko naman kasi maipagkakaila 'yon. Sobra akong nagandahan sa anak ni Ninang Carmen. Gugustuhin mo talaga siyang makita araw-araw.

"Bakit ba interesado kayo sa babaeng 'yon? Eh, halatang hindi natin 'yon kasing edad. Siguro, mga twenty na 'yon. Ilang taon din ang agwat sa atin." Wika ni Rhea.

"Kahit na, maganda pa rin." Depensa ni Jolo.

"Hindi lang 'yon, mestiza at sexy pa!" Dagdag pa ni Jimboy.

Tinabihan naman ako ni Mary Anne. "Ano Iris, hindi mo ba kami kakampihan? Babae ka naman, 'di ba?"

Hindi ako umimik.

"Ano ka, pati 'yang si Iris gandang-ganda sa anak ni Aling Carmen." Pang-aasar pa ni Jolo.

"Eh, nagagandahan lang naman kayo 'don dahil malaki ang hinaharap niya. Mga mukha kayong dibdib!" inis na sambit ni Mary Anne.

Tumawa naman si Jolo. "Naku, Mary Anne. Kung gusto mong lumaki 'yang dibdib mo manalangin ka na sana ay reglahin ka na."

"Kakaasar ka, Jolo! Ang bastos ng bunganga mo." Himutok ni Mary Anne.

"Sus, crush ka lang niyang si Jolo, Mary Anne." Pang-aalaska pa ni Rhea.

Tuluyan nang sumimangot si Mary Anne dahil sa pang-aalaska ng tropa.

"Ano ba, Mary Anne. Katuwaan lang. Hindi ka naman mabiro." Si Jimboy na.

"Asar-talo kasi," dagdag pa ni Jolo.

"Nakakainis ka kamo." Bulong ni Mary Anne.

Pumagitna na ako sa kanila. "Oh, tama na. Nagkakapikunan na kayo."

Humalukipkip si Jolo saka pumwesto sa swing na gawa sa gulong. "Basta nagagandahan talaga ako sa kanya."

"Ako rin," wika ni Jimboy. Napabuntong hininga si Rhea at inamin na pati rin siya ay nagagandahan. Ngunit itong si Mary Anne ay walang imik pa rin.

Pero kung ako ang tatanungin, nagagandahan talaga ako. Para akong nakatingin sa mga bituin.