Chapter Four

Umaga na nang makauwi si Georgina dahil tumuloy siya sa kalapit na hotel upang iwasan ang mga taong humahabol sa kanya. Ang buong akala niya ay payapa na siya pag-uwi pero hindi pala dahil ang kanyang madrasta ang sumalubong sa kanya pagkapasok na pagkapasok pa lang niya sa gate ng mansyon nila.

“Napaka-ingrata! Pinahiya mo na naman ako sa kaibigan ko at hindi ka nakipag-date sa kanya?” Malakas na sampal ang kasunod niyon na nagpabiling sa mukha ni Georgina.

“Ingrata? Date? Bakit kaya hindi ikaw ang makipag-date sa matandang ulupong na ‘yon?” Nakaangat ang isang kilay na sagot niya. Mapang-asar ang tono ng boses niya pero ang mata niya ay matalim na nakatingin dito. Hinaplos niya ang pisngi na nasampal nito upang tanggalin ang sakit habang pinipigilan ang sarili na huwag itong patulan. Baka hindi niya mapigilan at mabugbog niya ito nang husto na matagal na niyang gustong gawin.

“Pasalamat ka at may lalaki pang gustong makipagkita sa ‘yo. Ano pa bang gusto mo at lahat na lang ng nirereto ko ay inaayawan mo?”

Inirolyo ni Georgina ang mata. Hindi niya ito sinagot at umiwas saka ito tinalikuran pero agad siya nitong nahawakan sa braso upang pigilan. Dahil mabilis ang reflexes niya ay awtomatikong ipiniksi niya ang kamay nitong nakahawak sa braso niya at nawalan ito ng balanse bago napaupo sa driveway.

“Georgina!” malakas na sigaw ng kanyang ama na ngayon niya napansin na nasa harapan na pala niya. “Humingi ka ng tawad sa iyong ina, ngayon din!”

“Ina?” she scoffs. “Hindi ko siya ina. At hindi ako hihingi ng tawad.” Nilampasan niya ang ama na nagpupuyos sa galit dahil sa sinabi niya.

“Georgina, bumalik ka rito. Pasalamat ka at tinutulungan ka ng iyong ina na makakahanap ng makakatuwang sa buhay pero itong ugali mo pa ang ipapakita mo?”

Huminto sa paglalakad si Georgina at hindi makapaniwalang nilingon ang ama. “Pa, baka hindi mo alam kung anong klaseng lalaki ang nirereto niyang asawa mo?” Lumapit siya pabalik sa ama at pinakita rito ang larawa ng mga lalaking nireto sa kanya ng kanyang madrasta. “Kung mga ganitong klaseng lalaki ang mapapangasawa ko, pa. Papayag ka ba? I have no descrimination against them, pero karamihan sa kanila ay matatandang manyakis at halos kasing-edad niyo na.”

Hindi na hinintay ni Georgina a makasagot ang ama at pumasok na sa loob. Sa kanyang matalas na pandinig ay narinig niya kung paano pinagsabihan ng kanyang ama ang kanyang madrasta, pero wala na siyang pakialam at dire-diretso siya sa kanyang kuwarto.

Gusto niyang matulog pero nang dumungaw siya sa bintana ay nakuha ang atensyon niya ng komosyon na nanggagaling sa baba. Lumabas siya ng kuwarto at tumayo sa balkonahe saka tiningnan ang nangyayari sa baba. May ilang kalalakihan ang pumasok na may dala-dalang malalaking boxes na hindi niya alam kung ano ang laman at sa labas ng gate nila ay ilang kotse ang nakaparada. Dahil nasa tapat ng driveway ang balkonahe ay rinig na rinig niya kung ano ang pinag-uusapan ng mga bagong dating.

“Mr. and Mrs. Lucindo, nandito po kami upang hingiin ang kamay ng inyong anak na si Ms. Lucindo. Nandito ba siya?”

Kaagad na ngumisi si Georgina. Mukhang maimpluwensyang tao talaga ang nakasalamuha niya dahil mabilis siya nitong nahanap. Pero ang hindi niya akalain ay nang marinig ang sagot ng kanyang madrasta.

“Si Pia? Magpapakasal? Kanino? Bakit hindi ko alam ‘to?”

“Sumang-ayon na po ang anak niyo kaya kailangan lang ng boss namin ang approval niyo kapag pumunta sila sa munisipyo para magparehistro.”

“Sino’ng boss niyo? Sino ang papakasalan ng anak ko?” ang tanong naman ng kanyang ama.

Gustong humalakhak ni Georgina sa narinig. Bakit inisip kaagad ng kanyang madrasta na ang anak nito ang magpapakasal? Dahil ba maganda ito at isa itong modelo? Nakaisip siya ng ideya kung paano takasan ang pagpapakasal sa Rhett na ‘yon kaya hinayaan niya ang kanyang madrasta na isipin na ang anak nitong si Pia ang magpapakasal. Abot hanggang tainga ang ngiti niya habang nakikinig. Bumalik siya sa loob at hindi na nakinig.

Patuloy na nakipag-usap ang bagong dating sa kanyang ama at madrasta.

“Si Mr. Rhett Nillulf Castaneda. Nag-usap na sila kagabi sa engagement party.”

“Si Rhett Nillulf Castañeda na may-ari ng Nillulf Scents?” Hindi makapaniwalang tanong ni Mr. Lucindo.

“Sandali at tatawagan ko. Nasa trabaho pa siya.”

“Hindi na po kailangan. Gusto lang iparating ng Boss ko na babalik siya sa mismong araw ng kasal, limang araw mula ngayon, upang kunin si Ms. Lucindo at sabay silang pupunta sa munisipyo.

Nang makaalis ang mga kalalakihan ay hindi pa rin makapaniwala si Mrs. Mitz Lucindo, ang asawa ni Mr. Castaneda na madrasta ni Georgina.

Kinagabihan, nang makauwi si Pia ay kaagad na kinastigo ni Mitz ang anak. “Bakit hindi mo sinabi na magpapakasal ka na, at sa isa pang Rhett Nillulf Castaneda?”

“Anong magpapakasal, ma? Abala ako sa trabaho at marami akong photoshoot. Saan ako makakuha ng oras para makipag-date?” Pero bigla itong natigilan nang ma-realize ang pangalan ng lalaking binanggit ng kanyang ina. “Rhett Castañeda?”

“Oo, siya nga. Ang isa sa pinakamayaman at pinakaguwapong lalaki sa Pilipinas!”

Malawak na ngumiti si Pia. Isang beses pa lang niyang nakita ang lalaki nang pumirma siya ng kontrata sa kompanya nito bilang isang modelo ng perfume nito pero hindi niya nakadaupang palad. Mula noon ay nangarap na siya na makita itong muli dahil nagustuhan niya ito sa unang tingin. Hindi niya akalain na isang biyaya ang darating sa kanya at pakakasalan pa siya nito.

“Hindi ako makapaniwala, ma. Matutupad na ang isa sa pinapangarap ko. Ang magiging asawa si Rhett!” Hindi niya mapigilang tumili saka niyakap ang ina, na tulad niya ay tuwang-tuwa rin sa swerteng natanggap niya.

Ito ang tagpong naabutan ni Georgina nang bumaba siya ng hagdan. Buong araw siyang nagkulong sa kuwarto at lumabas lamang nang makaramdam ng gutom.

“Hoy, babae. Hindi mo man lang ba iko-congratulate ang kapatid mo?”

Hindi sana niya papansinin ang dalawa pero bigla siyang tinanong Pia. Nakataas ang kilay na tiningnan ito ni Georgina mula ulo hanggang paa. “Bakit? Nakahanap ka na naman ng bagong lalaking isisiping mo para magkaroon ng proyekto?”

Namula ang mukha ni Pia sa galit pero kaagad din iyong nawala.

“Yes. Dahil simula ngayon, magiging isa na akong Castañeda kapag naging asawa ko na si Rhett. Hindi mo siya kilala pero isa iyon sa mayaman at maimpluwensyang tao sa Pilipinas!”

Mahinang napatawa si Georgina nang marinig ang sinabi nito. “Congratulations, then. Sana lang ay hindi madiskubre ng mapapangasawa mo ang sandamakmak mong eskandalo.”

Hindi naapektuhan si Pia sa sinabi niya. “Huwag kang mag-alala dahil mahal na mahal ako ni Rhett kaya pakakasalan niya ako.”

Hindi sumagot si Georgina at nilampasan ang mag-ina. Tingnan natin ang mangyayari sa araw ng pagpunta ng Rhett na ‘yon dito.