Chapter 5: Interviewing My Own Fiancé

Pagbalik nina Inara at Tatiana sa kompanya, agad kumalat ang balita na sila ang nakakuha ng exclusive interview kasama ang presidente ng El Davion Group.

Lahat ay nakatingin sa kanila nang may halong inggit at paghanga. Sino ba naman ang hindi maiinggit kung ang makakapanayam nila ay walang iba kundi si Arlend Kaizan El Davion, ang misteryosong presidente ng El Davion Group. Isa iyong karangalan.

Kung magagawa nila nang maayos ang interview na iyon, tiyak na lalampas sa inaasahan ang performance ng buong team ngayong taon. Ang bigat ng pangalan ni Kaizan ay mas mahalaga pa kaysa sa lahat ng mga taong na-interview nila sa loob ng isang taon na pinagsama-sama.

Sa kabilang banda, bigla na lamang may humila kay Inara palapit sa isang lamesa. Nang tingnan niya ito ay ang kaibigan niya agad ang bumungad sa kaniya. Punong-puno ng kuryusidad at animong nakinang pa ang mga mata ni Liora Salvidar.

“Inara, bilis! Sabihin mo sa ’kin, gwapo ba talaga si Young Master El Davion? Grabe ang mga naririnig kong papuri sa kaniya!”

Napahinto si Inara sa pag-inom ng tubig. Kung tutuusin ay oo, sobrang gwapo ng lalaking iyon. Pero may kakaiba siyang nararamdaman.

Parang may mali.

May pag-aalinlangan sa tinig niya nang harapin niya ang kaibigan. “Liora, alam mo ba ang buong pangalan ng tinatawag nilang Young Master El Davion?”

“Ha? Dito sa Dumaguete ay iisa lang naman ang puwedeng tawaging Young Master El Davion. Si Arlend Kaizan El Davion! Hindi mo ba iyon alam?” kunot ang noo na sagot at tanong sa kaniya ng kaibigan. Bakas sa mga mata nito ang lubos na pagtataka at animong isang kalapastanganan ang hindi malaman ang pangalan na iyon.

Nanlaki ang mga mata ni Inara.

'Arlend Kaizan El Davion? Teka. Ano?! Ang taong dapat kong harapin sa interview ay walang iba kundi ang lalaking nakatakda kong pakasalan?!'

'Lord, ano po bang nagawa ko?'

Nasapo ni Inara ang mukha. Gusto na niyang maiyak.

'Hindi ko na tuloy alam kung swerte ba ako o malas at siya pa talaga ang humiling na ako ang mag-interview sa kaniya. Diyos ko naman!'

Napansin ni Liora ang biglang pagbabago sa asta ng kaibigan at agad siyang nag-alala. “Inara, anong nangyayari sa ’yo? Ayos ka lang ba? Bakit naman parang nakakita ka ng multo? Hindi ba totoo iyong mga sinasabi nila na gwapo si Mr. El Davion? Pangit ba?”

Halos lunurin na ni Liora si Inara sa dami ng tanong nito at talagang sunod-sunod pa. Akala mo ay ilang araw na niya iyong saulo lahat at kailangan na lang mai-recite.

“A-Ah, wala!” mabilis na sagot ni Inara sabay iling.

Pero sa sandaling maalala niya ang lalaking iyon kagabi, parang dumaloy ang lamig sa buong katawan niya. May kirot pa rin siyang nararamdaman.

Galit sa kanya si Kaizan at wala siyang kahit na anong ideya sa kung ano ang maaari nitong gawin kapag nagkita ulit silang dalawa.

'Hindi pwede! Hindi ko kayang gawin ang interview na ito! Hindi naman talaga dapat ako ang gagawa nito! Sumama lang naman ako na walang ibang iniisip kundi gawin ang trabaho ko, tapos ngayon ay babalik ako sa kompanya na may responsibilidad na ma-interview ang lalaking nakatakdang pakasalan ko at may galit sa akin?'

'Trip na trip naman na yata ako ng tadhana, Lord!'

Dahil sa kaba, bigla siyang tumayo at nagmamadaling nagtungo sa opisina ni Tatiana. Naabutan niyang nag-aayos na ito ng mga gamit.

Pagkapasok pa lang ni Inara, iniabot na agad nito ang isang folder.

“Heto,” sabi nito. “Mga impormasyon iyan tungkol sa Young Master. Basahin mong mabuti ngayon pa lang para wala kang pagkakamali na magawa bukas sa interview. Malaking pangalan at makapangyarihang tao ang makakaharap mo bukas, Inara. Kapag may ginawa kang pagkakamali bukas ay hindi lamang ikaw ang mapapahiya kundi pati ang kompanya.”

Sa kabila ng mga paalalang iyon ni Tatiana ay hindi kinuha ni Inara ang folder. Mariin niyang kinagat ang labi.

“Ma'am Yana, pasensya na, pero hindi maganda ang pakiramdam ko. Puwede bang iba na lang ang pumalit sa akin bukas para gawin ang interview? Mas mabuti pa nga sana kung ikaw na lamang po ang mag-interview kay Y-Young Master El Davion...”

Hindi pa siya handa, at higit sa lahat, takot pa rin siya kay Kaizan. Hindi na yata darating ang araw na mawawala ang takot niya rito lalo pa sa ginawa nito nang nagdaang gabi sa kaniya.

Tinitigan siya ni Tatiana na parang hindi makapaniwala. Ang pagkakataong makapanayam si Kaizan El Davion ay napakabihira, at ibinigay iyon kay Inara pero ngayon ay gusto lang nitong ipamigay sa iba. Bukod pa doon, si Kaizan mismo ang humiling na si Inara ang mag-interview sa kanya.

“Zandrielle Inara Clemente,” malamig na tanong ni Tatiana habang matiim na nakatingin sa kaniya, “kilala mo ba si Young Master El Davion?”

Parang tumigil ang tibok ng puso ni Inara.

'Paano niya nalaman?!'

“A-Ah, h-hindi…” pautal niyang sagot at saka kinagat-kagat ang labi. “Hindi ko po kilala ang Young Master...”

Galit si Kaizan sa kanya, kaya sigurado siyang ayaw nitong malaman ng iba ang tungkol sa kanilang ugnayan.

Hindi naman nagduda si Tatiana.

'Right. Ano ba 'tong iniisip ko? Paano makikilala ng isang hamak na intern ang isang katulad ni Young Master? Tsk. Pull yourself together, Yana.'

Para sa kapakanan ng kompanya ay medyo lumambot ang tono ni Tatiana. “Dahil si Young Master El Davion mismo ang humiling na ikaw ang mag-interview, kailangan mong sumama. Pupunta tayo bukas.”

“H-Ha? Hindi pwede!” Napahawak sa dibdib si Inara. Nanginginig siya sa kaba habang naaalala ang nangyari nang nagdaang gabi. “Ayaw ko pong pumunta!”

'Haharap para mag-interview kay Kaizan?! Diyos ko!'

'Katapusan ko na yata!'

'No! Ayaw ko pa!'

'Hindi ko talaga kaya!'

Alam niyang fiancé niya ito, at alam din ni Kaizan na siya ang kakaharapin niya. Kaya napapaisip pa rin si Inara kung bakit siya ang napili at pinapapunta ni Kaizan.

'Ano ba talagang nangyayari? Hindi ba’t ayaw niya sa akin?'

'Oh, God. Paniguradong may masama siyang balak!'

Nanlamig ang boses ni Tatiana, matigas at walang puwang para makatanggi. “Inara, hindi ako humihingi ng opinyon mo. This is an order. Sasama ka sa akin bukas para mag-interview kay Young Master El Davion. Kung ayaw mo, magsimula ka nang mag-impake ng mga gamit mo at umalis ka na lang sa kompanya.”

Napatigil si Inara. Gusto na sana niyang sigawan ang babae at sumang-ayon sa sinabi nitong pag-alis niya pero hindi naman niya iyon magagawa.

Kapag bumagsak siya sa internship, hindi siya makakatanggap ng diploma, at lalo nang hindi siya makakahanap ng trabaho. Kailangan niyang lunukin ang takot niya.

“P-Pasensya na, Ma'am Yana. N-Nauunawaan ko po…” mahina niyang sagot na halos hindi na marinig.

Habang palabas ng opisina, ramdam niya ang bigat sa dibdib.

'Ano ba talaga ang binabalak ng lalaking iyon? Ano ba talaga ang gusto ni Kaizan na mangyari sa akin?!'

Napasabunot si Inara sa sariling buhok.

'Mas mauuna pa yata ako kay lola na maglaho sa mundong ito dahil sa stress na dinudulot sa akin ng lalaking iyon!'