Chapter 16

SIMULA noong Linggo, nasanay na si Lance na isinasama ako sa kanyang mga lakad.

Tuwing naglilibot sa hacienda nasa tabi niya ako palagi.

Wala naman akong ibang ginagawa bukod sa pananatili sa kanyang likod kung kinakausap ang mga trabahador.

May mga pagkakataon ding nasa loob lang ako ng sasakyan habang nakatingin sa kanya sa labas. Hindi pwedeng buksan ang salaming bintana na parang itinatago niya ako dito sa loob.

Kapag bumibisita dito sa rancho mas nagiging istrikto pa siya lalo't lahat ng trabahador ay mga lalaki.

Nakita ko rin ng malapitan ang kanyang kabayo. Ito ang kabayong sinakyan niya noong una kaming nagkita sa palaisdaan. Maitim at makintab ang balahibo nito at nanggaling pa sa ibang bansa tulad ng iba pang inaalagaan nila.