Chapter 4

Dalawang palapag ang bridal shop ni Cassandra sa Sampaloc, Manila. Nagsisilbi na rin itong bahay niya, dalawa ang staff, sina Emma at Judith, pero uwian naman ang mga ito. Kaya mag isa lang siya sa gabi.

Tuwang tuwa ang dalawa nang i-abot niya ang mga pasalubong na buko pie at kapeng barako. Matapos lantakan ng mga ito ang buko pie ay nagsipagbalik na sa trabaho.

Sa kanyang design room, abala si Cassandra sa pag sketch ng kanyang mga bagong design, kumatok si Judith sa pinto, nakangiti ito at may hawak na bouquet of roses, "Ma'am Cassie, flower delivery for you, from Sir Janus!"

"Palagay na lang diyan Judith, salamat." inginuso niya ang mesa.

Tumalima naman ang huli.

Saktong paglabas ni Judith, tumawag ang nobyong si Janus, kinukumusta nito ang pagpunta niya sa San Fernando at kung natanggap niya ang padalang bulaklak.

Balak niya sanang magsangguni sa nobyo ng ibang detalye tungkol sa kasal nila sa susunod na buwan, ngunit tila hindi nito gusto ang paksang iyon dahil mabilis na nagpaalam at pinatay na ang tawag.

Napabuntong hininga si Cassandra at napatingin sa mannequin kung saan nakasuot ang elegante at napakagandang wedding gown, na siya mismo ang nagdesign at ito ang nakaplanong susuotin niya sa kasal nila ni Janus.

Ewan ba, pero parang hindi na siya nasasabik na suotin ang damit pangkasal!

Lumabas siya ng design room, dahil nakarinig si Cassandra ng tila naghuhurumentadong kliyente at naroon iyon sa fitting room. "Emma, anong nangyari?" tanong niya sa tauhan.

"Ma'am Cassie, lahat na ng gown nasukat niya pero walang magkasya, malaki na kasi yong..." inginuso ni Emma ang customer na buntis pala, tantiya niya nasa tatlo o apat na buwan na ang tiyan nito.

Pinipilit ng babaeng isuot ang wedding gown kahit masikip na at iniipit ang tiyan. Pinipigilan ito ni Judith, na lalong ikinakagalit nito.

Kalmadong nilapitan ni Cassandra ang customer, "Hello mam, I'm Cassandra designer and the owner of this boutique, kung gusto niyo po ang design na ito pwede kong i-adjust ang beywang at-----"

"No need! maghahanap na lang ako ng ibang boutique!" padaskol na sagot ng babae, hinubad ang gown at kinuha ang handbag. Dinukot ang cellphone at may tatawagan. Dahil padabog ang kilos nito, nalaglag ang cellphone.

Si Cassandra ang yumuko upang kunin iyon, at i-abot sa buntis. Wala naman siyang pakialam sa personal na buhay nito, ngunit napakunot ang noo niya ng makita ang wallpaper ng phone nito. Ang babae ang naroon, at may kayakap itong lalake...

Kamukha iyon ni Janus!

"Akin na nga yan!" inagaw nito ang cellphone sa kamay ni Cassandra, at nag-dial ng number.

"Hello..Janus babe," maarteng sabi ng babae sa kausap.

Nagkatinginan sila ni Judith, nakita rin pala ng staff niya ang kasama ng buntis sa wallpaper ng phone nito.

Coincidence lang ba?

Upang masagot ang mga agam-agam, nagpasya si Cassandra na puntahan ang nobyo sa opisina nito.

Sabi ng sekretarya ni Janus, naroon ito sa private office nito, ngunit may bisitang kamag-anak, kaya naghintay siya sandali.

Maya-maya'y nakarinig siya ng tila nagtatalo sa loob, napilitan siyang pumasok tutal bukas naman ang pinto.

"Janus!?" nasambit ni Cassandra.

Naabutan niya ang nobyo na sukol sukol sa pader ng isang galit na lalake. May dugo ang gilid ng labi ni Janus at nakataas ang dalawang kamay na para bang sumusuko dahil may nakatutok na baril dito!

Nakatalikod sa gawi niya ang gustong pumatay sa nobyo, kaya hindi niya makita ang mukha.

Kung bakit bigla na lang siyang lumapit sa mga ito at pumagitna, iniharang niya ang katawan upang takpan si Janus. "Huwag!" matapang niyang isinigaw, kahit na ang kanyang mga mata ay kusang pumikit, hindi kayang saksihan ang maaaring mangyari.

"Nagtatago ka sa saya ng babae Janus!?" pamilyar ang nakakatakot na tinig ng lalakeng may hawak ng baril.

"Uncle Ismael, sinabi ko ng wala akong kasalanan," wika ni Janus.

Doon napamulat ng mga mata si Cassandra. "Ismael?"

Si Ismael nga!! ang bayolenteng lalakeng may mahabang peklat sa pisngi, ang bestman ni Marvin na nakadaupang palad niya 3 days ago. Uncle? Tiyuhin ito ni Janus!?