Chapter 6

Pagdating nila sa mansion ng mga Venzon ay sinalubong agad sila ng mga kasambahay para i-welcome. Pagpasok naman nila sa pinto ay nakaabang na doon ang Mama ni Tristan na si Doña Leticia. Agad na humalik si Tristan sa Doña.

Nahihiya man ay lumapit pa rin siya sa ginang para b****o.

“Hailey Gaile, Iha. Welcome to our home. Halika, tuloy ka iha,” magiliw nitong hinawakan ang kamay niya at marahang hinila.

“Thank you, Gra–Mama,” aniya. Nasanay kasi talaga siyang tawaging Granie ang ginang dahil halos isang taon din niyang naging fiance si Cedric. Madalas din silang magkita ng ginang noon dahil sa mga business gatherings. Isinasama din kasi siya ng kanyang Papa sa request na din ni Doña Leticia. Pero kung hindi mag-request ang matanda, ang ate Krystal lang naman niya ang isinasama nito.

“Iha, sabihin mo nga sa akin kung ano ang ginagawa ng asawa mo? Nagpa-book ako para sa honeymoon ninyo, travel to Paris pero nalaman ko sa assistant ko na hindi kayo tumuloy. Business pa rin ba ang inaasikaso niya?” tanong ng ginang.

Magkaharap silang naupo sa magarang upuan habang hawak pa rin ng ginang ang kamay niya.

“Ma, alam mo naman ang totoong sitwasyon, hindi ba? We're not a real couple,” giit ni Tristan bago padaskol na naupo sa pang isahang sopa.

“You're already married, for god's sake! At walang Venzon ang nakikipaghiwalay sa mga asawa nila, Tristan, alam mo 'yan!” giit ng ginang.

Mariin ang pagbigkas nito ng bawat salita kaya napaka-elegante pa rin nitong tignan kahit nagagalit. Hindi ito sumisigaw pero may pinalidad ang boses.

“M-Mama, huwag na po kayong magalit. Hindi rin po kasi ako pwedeng umabsent sa klase ng matagal,” ani Gaile para matigil na ang away ng mag-ina.

“Nakapagparegister na ba kayo?” tanong muli ng ginang habang nakatingin kay Tristan.

“Bukas, Mama. Ipaparegister ko na ang kasal,” tugon nito sa malamig na boses.

Napakagat labi siya dahil ramdam niyang napipilitan lang ang lalaki na akuin ang responsibilidad na dapat ay kay Cedric. Sila ang ipinagkasundo pero si Tristan ang sumasalo.

“Mama, pwede naman pong huwag na lang i-register ang kasal,” aniya. Kung ayaw ni Tristan na matali sa kanya ay tutulungan na lang niya itong kausapin ang parents nila.

“No, hindi ako papayag, iha. Alam na ng mga press, alam na rin ng mga business partners ang kasal ninyong dalawa ni Tristan. Ayaw kong magmukha kang kawawa sa mga tao kapag iniwan ka pa ng lintek na ito. Hindi ko alam kung paano haharapin ang mga magulang mo kapag nangyari 'yon,” masuyong wika ng ginang bago hinaplos ang buhok niya. “Gusto kong dumito muna kayong mag-asawa,” dagdag pa nito.

“Ma!” agad namang pagtutol ni Tristan. Tumayo pa ito habang kunot ang noo.

“Tristan, alam kong ikaw na ngayon ang namamahala sa kumpanya. May sarili ka na ring disposisyon sa buhay pero sana pagbigyan mo naman ako, anak. Miss na miss na din kasi kita.” Lumambot pa ang ekspresyon sa mukha ng ginang. Tumayo ito at nilapitan ang anak na para bang naglalambing na bata. Napabuntong hininga naman si Tristan habang kinakamot ang kanang kilay. Napansin niyang mannerism iyon ng lalaki kapag naiinis o kaya naman ay napipilitang gawin ang isang bagay.

“Ok, ok... Matitiis ba naman kita, Mama? Pero please behave,” may pagbabanta sa boses ni Tristan.

“Why? I'm not doing anything. Gusto lang kitang makasama pati na rin ang aking daughter in law. Alam mo namang matagal ko nang gustong mag-asawa ka,” anang ginang na nakalabi pa.

Napangiti naman si Gaile sa nakitang lambingan ng mag-ina. Kahit paano ay nakita niya ang soft side ni Tristan. Malapit pala ito sa kanyang ina.

“And I hope, magkaroon din ako ng mga apo, soon..” dagdag pa ng ginang.

Agad na namula ang mukha ni Gaile at hindi makatingin ng diretso kay Tristan. Yumuko na lang siya at pinaglaruan ang palad.

“Ma...” may pagbabanta naman sa tinig ng binata.

“What?” tugon naman ng ginang habang pilyang nakangiti.

Lumapit muli ito kay Gaile at pinatayo ito. “Wala pa akong wedding gift para sa iyo, iha,” wika nito bago naupo muli sa tabi niya. “Fely!” tawag nito sa assistant na agad namang dumating. May iniabot itong papel kay Doña Leticia at iniabot naman iyon ng ginang sa kanya.

Nanlaki ang mata niya nang mabasa ang nakasulat sa papel.

“Iha, alam mo naman na isinanla sa amin ng Papa mo ang kumpanya ninyo, hindi ba? Hanggang sa malugi ito at tuluyang ibenta sa amin,” tanong ng ginang.

Alam niya ng bagay na 'yon kaya nga tinuloy nila ang kasunduan ng dalawang patriyarko ng pamilya para hindi mawala sa mga Cuevaz ang kumpanya nila. Nakapangalan na sa Venzon ang kumpanya pero mananatiling presidente ng kumpanya ang ama ni Gaile.

“Mama, anong ibig sabihin nito?” tanong niya sa ginang.

“Binabalik ko sa iyo ang ownership ng Cuevaz Jewelry, iha,” nakangiting tugon ng ginang.

“What? Why did you do that!” galit na tanong ni Tristan. Kinuha pa nito ang papel at binasa.

Halos malukot na ang papel sa higpit ng hawak nito. Nagiigtingan din ang panga ng lalaki dahil sa tinitimping galit.

“Ano naman ang masama doon, anak? Asawa mo naman si Gaile kaya kahit nakapangalan sa kanya ang kumpanya nila, e, parang sa iyo na din 'to. Iisang pamilya na lang tayo anak,” paliwanag ng ginang pero marahas lang na napahampas sa mesa si Tristan.

“Ma, alam mong pumayag akong ituloy ang kasal at inako ko ang dapat na responsibilidad ni Cedric dahil hinihingi nilang compensation ang Cuevaz Jewelry! Harap harapan na tayong pinaiikot ng pamilyang 'yan pero pinapayagan lang ninyo!” singhal pa nito.

Nasaktan siya sa sinabi ni Tristan pero may katotohanan naman 'yon.

“Anak, ayaw ko rin namang kay Cedric makakasal si Gaile. Mabuti na ring sa iyo siya naipakasal kasi mas responsable ka. Mabait na bata si Gaile, maganda pa kaya ano bang inaayaw mo?” wika ng ginang.

Talagang sa harap pa niya nag-usap ang mga ito. Gusto na lang niyang lumubog sa inuupuan dahil sa sobrang hiya.

“Ma, don't tell me, may kinalaman ka kaya hindi sumipot si Cedric sa simbahan?” mabalasik na tanong ng lalaki.

“H-ha? W-wala... Bakit ko naman gagawin 'yon?” halatang defensive na wika ng ginang. Napakamot na lang sa kilay ang lalaki dahil sa sobrang inis.

“Gaile, iha. Halika, ihahatid kita sa kwarto ninyong MAG-ASAWA. Magpahinga ka muna at mamaya ipatatawag na lang kita para sa dinner,” halatang umiiwas na niyaya siya ng ginang.

Kagat labing sumunod naman si Gaile habang pigil ang pagtulo ng luha.