Chapter 5 - hired

Umuuga pa rin ang mga tuhod ko sa nerbiyos, tapos dinagdagan pa ng sinabi ni Engineer. Huminto muna ako sa paglalakad at kinapa ang thumbler sa loob ng aking bag. Uminom ako ng tubig. Hindi ko dapat iniisip iyong sinabi niya. Opinyon lang niya iyon. Masungit lang talaga siya.

Maraming bisita si Mayor sa opisina pagpasok ko ng executive building. May mga kausap siya at may mga naghihintay pa sa waiting area. Punuan ang apat na mahahabang couch at mga single chairs. Baka hindi niya ako ma-estima. Dapat talaga maaga kung pupunta rito. Babalik na lang siguro ako bukas. Pero magtatanong muna ako sa staff kung ano'ng requirements para sa summer job at nang hindi na ako magpapabalik-balik pa. Sayang din ang pamasahe.

Lumapit ako sa help desk. "Excuse me po, pwede ba akong makahingi ng requirements para sa summer job?" polite kong sabi sa babaeng staff na nasa loob ng cubicle.

"Hintay ka lang saglit, upo ka muna diyan. May client pa kasi ang in-charge."

Naupo ako sa easy chair at pinukol ng tanaw ang separate office ni Mayor na may mga dingding na salamin. Nakikita ko siya sa loob at ang mga kausap niyang sa palagay ko ay mga kapitan ng barangay.

"Ms. Graciela?" Lumapit sa akin ang isang staff na lumabas mula sa opisina ni Mayor.

"Yes po?"

"Doon tayo sa conference room." Iminuwestra niya sa akin ang malaking pintong kulay dark chocolate na nasa gilid.

Tumayo ako at sumama sa kaniya. Bumati sa akin ang lamig ng aircon at air freshener sa loob. Hugis oval at chocolate brown ang mahabang table na tinamaan ng aking paningin. May built-in microphones at napapaligiran ng high-backed swivel chairs na genuine leather ang upholstery.

"Maupo ka," alok ng staff. Maganda siya. Maputi at blonde ang rebonded na buhok. Palagay ko ay kasing-edad lang niya si Mayor.

Naupo ako. Mahigpit na hawak ang aking bag sa aking kandungan. Magtatanong na sana ako nang bumukas ang isa pang pintuan sa right corner at mula roon ay pumasok si Mayor. Sumenyas siya sa staff na lumabas muna.

"I can't accommodate you in there, I have a meeting with the coastal barangay captains." Habang nagsasalita ay nai-imagine ko siyang nasa cover ng magazine sa suot niyang dark blue polo shirt at white pants.

"Okay lang naman po, babalik na lang ako bukas." Pinilipit ko ang mga kamay. Gusto kong suminghap pero wala akong mahugot na hangin mula sa aking baga. Dahil ba sa aircon?

"Hindi, nandito ka na. You might as well work on your purpose. I had a talk with the head of PESO office this morning. You can start reporting here in my office anytime. Requirements of course are to be followed, you can process on those while on duty." Lumapit siya sa akin at bahagyang umuklo. "I don't usually like morena girls but you made me change my mind."

"M-Mayor-"

"That is a compliment." Kumindat siya at bumaling sa may pintuan. Kinatok iyon.

Pumasok ang staff niya. "Yes, Mayor?"

"Ace here will be working with us. Teach her how to operate the xerox machine."

"Yes, Mayor." Tumingin sa akin ang staff at ngumiti.

Tinugon ko siya nang tipid na ngiti at sinulyapan ko ang ID niya. Private secretary pala siya at Fretchie ang pangalan.

"Hm, what else...ah, the coffee machine too. She will be making my coffee starting tomorrow, right, Ace?"

Tameme akong tumango na lang. Sumama ako kay Fretchie palabas. Dinala niya ako sa kinaroroonan ng xerox machine at itinuro niya sa akin paano mag-photocopy ng mga dokumento.

"Bukas ko na ituturo sa iyo ang paggawa ng kape ni Mayor. Pumasok ka nang maaga bukas ha?" instruct ni Fretchie sa akin.

"Opo, Ma'am."

Iniwan niya ako roon habang sumusubok akong mag-photocopy ng mga memorandum na kailangang i-route sa iba' ibang offices. Nagawa ko naman. Siguradong matutuwa si Mama mamaya pag-uwi ko.

Sumulyap ako sa kambal na pintuang salamin. Saktong binuksan iyon ng back-up ni Mayor at pumasok si Engineer Irlan. Nagtagpo ang mga mata namin at kumunot agad ang mga kilay niya. Pero imbis na tumuloy siya sa opisina ni Mayor ay tumalikod siya at muling lumabas. Bigla ko tuloy naalala ang sinabi niya kanina na minamalas siya tuwing nakikita niya ako.

"Tingnan mo iyon, parang nakakita ng ex niyang naghahabol." Pabirong nagsalita si Mayor mula sa likod ko.

Saglit akong nanigas. Pakiramdam ko na-magnet palabas ang puso ko at bumara sa aking lalamunan.