Unknown Caller

CLAIRE

Nakahiga kami pareho ngayon ni Sir Max sa kwarto niya. Gamit ang mahabang kumot, hinati namin ang kama sa dalawa. Siya sa kanan, ako sa kaliwa. Pinipilit kong sarhan ang mga mata kasi hindi ako nakakatulog kapag bukas ang ilaw. Si Sir naman, ayaw niya ng naka patay.

“Should we try it?”

Tumingin ako sa kanya. Binawi ko din naman ito dahil nakalimutan kong naghuhubad siya kapag natutulog. Dahil nandito ako, pang itaas lang ang hinubad niya.

“Date me for real.”

May epekto ata sa boses niya ang pag-inom ng maraming kape. Ang gaspang nito at ang baba.

“Ayoko,” sagot ko kaagad.

Lumundag ang kama. Nakaharap ang buong katawan niya sa akin. Ang kanyang ulo ay sinandal niya sa kanyang kamay. Parang modelo.

“Hindi ka na lugi sa akin, Claire. I'm handsome, rich, gentleman, perfect. I can give you a perfect life.”

Nilipat ko ang tingin mula sa kisame patungo sa mga shelf sa magkabilang dulo ng flatscreen TV. Umaapaw ito sa mga medalya at mga tropeo. Kung may similaridad man kami ni Sir Max, yun ay ang pagiging achiever sa murang edad.

Yun nga lang, hindi niya ako maiintindihan kailanman. Kasi ako, kailangan maglaba para may pangkain. Siya, magde-demand lang.

“Hindi ko kailangan ng perfect life, Sir Max. Ang kailangan ko ay buhay na mapayapa. At gusto ko ang lalaking papakasalan ko ay magbibigay sa'kin ng kalma.”

Hindi stress.

“Look. Saan ako kulang? Am I not enough for you?”

Tinignan ko ang kanyang malalim na mata saka umiling.

“No sir, you're… too much.”

Tumalikod ako papunta sa dulo ng kama at pinikit ang aking mata. Lumundag ang kama at narinig ko siyang huminga ng malalim.

Kinabukasan, maaga kami nagpaalam sa pamilya niya matapos mag agahan. Tinanong pa ako ng grandparents niya kung saan ko gustong magpakasal. Ang sabi ko na lang na sa simbahan. Totoo din naman yun.

Sa utos ni Sir Max, bumalik kami sa Metro Manila by land kasi wala naman kaming pasok ngayon. Nakaupo ako sa harap ng SUV kasama ang driver habang sa likod naman si Sir. Tahimik siyang nagbabasa sa kanyang ipad as usual.

Sa kasamaang palad, mahigit limag oras akong nagtiis sa tugtugin niyang masakit sa tenga dahil naabutan kami ng rush hour.

Alas dose singkwenta na ako nakarating sa apartment. Hindi na ako nagtanghalian. Diretso ako sa pag update ng schedule ni Sir para sa susunod na linggo. May mga emails pa na dapat kong asikasuhin.

Bumalik sa akin ang sinabi ng kaibigan kong si Max na concierge sa isang hotel. Biglang nag cancel ang chairman ng WhiteBerry ng private dinner at nag order ng maraming pagkain papunta sa isang suite, noong mismong gabi na inupload namin ang report. Hindi ako pinanganak ngayong araw para hindi ito pagtuunan ng pansin.

Tumunog ang tiyan ko. Lumubog na ang araw noong natapos akong mag book ng mga flights at reservations. Tumayo ako sa office chair at nag unat ng katawan nang may dumating na email galing kay Sir Max.

Subject: Re: ANG BOSS KOMG PSYCHOPATH GRRRR!!!

Recipient: Maria Isabella Lopez

I'm afraid I won't let you go, Sec. Lopez. My family is looking forward to our next family gathering and our wedding.

May attachment itong larawan. Iyon ay ang resignation letter ko at screenshot ng drunk email na ngayon ko lang nalaman, naiwan ko yata ‘to sa kotse niya noong isang araw.

Ang hirap kapag dito sa email nakikipag-usap. Yung gusto mo siyang murahin pero professional dapat ang dating.

At saka, gusto ko kung magpapakasal ako, may kilig. May proposal kahit hindi magarbo, at dapat siyempre mahal din ako ng lalaking pakakasalan ko. Yung email niya nga sa akin walang ka sweet-sweet. Corporate na corporate ang dating. Na para bang marriage of convenience ganon. Ayaw ko nung ganong buhay.

Nireplyan ko siya. Yung klaseng reply na tumigil na siya sa pangungulit.

Subject: Re: ANG BOSS KOMG PSYCHOPATH GRRRR!!!

Recipient: Maxwell Rockefeller III

You'll have to grant me access to the report before I will let that happen, Sir.

Kala mo ha!

Wala iyang tiwala sa akin kaya di na niya ako rereplyan.

Lumabas muna ako ng bahay para bumili ng chicken inasal. Pagbalik ko, dumiretso ako sa lababo at nilipat ang pagkain sa plato. Naghugas rin ako ng kamay. Dinala ko ang plato sa desk na nasa kabilang bahagi ng kwarto, sa paanan ng kama ko.

Malapit kong nabitawan ang plato matapos kong makita ang reply ni Sir.

Subject: Re: ANG BOSS KOMG PSYCHOPATH GRRRR!!!

Recipient: Maria Isabella Lopez

Present your analysis on monday's meeting. The executives will be present. If your conclusions are not correct, then we will be discussing your future with the company.

I kept my end of the bargain. I hope you do the same, Secretary.

Naka attach dito ang financial report ng Oracle Analytics na wala dapat akong access.

Nawalan ako ng ganang kumain. Hindi ko alam kung saan ako dapat kabahan. Sa kasal? Sa presentation sa susunod na bukas? Sa resulta ng presentation? O sa pag open ng confidential na report?

Dalawang taon pala akong walang kamalay-malay kung ano ang pakiramdam na nasa recieving end ng mindgames niya. Ngayon lang pumasok sa isip ko kung bakit siya binansagang ‘The Mindplayer’ sa business world.

Walanghiya.

Ang talino mo talaga, Maxwell Rockefeller!

Pagbukas ko ng spreadsheet, tama nga ang hinala ko. Tinaasan nga ng WhiteBerry ang bid nila. Magiging resulta ito sa pwersahang paglagpas ng threshold namin. Hindi iyon maganda.

Nag vibrate ang cellphone ko katabi ang laptop. Galing ito sa number na hindi naka save sa device o sa sim ko. Pero dahil sanay na akong makatanggap ng tawag galing sa mga hindi ko kakilala dahil sa trabaho, iniswipe ko ito upang sagutin.

Nilagay ko ang cellphone sa aking tenga. Sumikip ang lalamunan ko nang marinig ang isang pamilyar na boses.

“If I were you, hindi ako maghuhukay pa, Secretary Lopez.”

Naputol ang tawag. Uminit ang buong katawan ko dahilan ng pagpapawis ng aking noo.

Devon de León. Ang dating Chief Financial Officer ng Prime Capital Holdings. Ang taong nawala sa radar matapos bumagsak ang Prime Capital Holdings. At ang taong naging dahilan ng pagkawala ko ng trabaho at pagka blacklist ko sa mga kompanya.

Isa lang ang alam kong dahilan kung bakit nagpaparamdam siya galing sa pagkakatago sa anino. At iyon ay ang Rockefeller Industries.