Chapter 8

''TINURUAN mo siyang bastusin ako, 'no?''

''Bakit ko naman siya kailangang turuan pa? May sarili naman siyang isip. She is smarter than you.''

''Huh! Magkaibigan nga kayo. Parehong bastos ang bunganga niyo.''

Tumalikod na ako. Ayokong patulan si Liza lalo na't maraming tao sa paligid. Hindi na rin naman ito sumunod nang pumasok ako ng bahay.

Inabutan ko sa sala na nakahilata ang dalawa kong nakababatang kapatid na lalaki. Bagsak ang mga ito sa kalasingan dahil amoy na amoy ang alak sa paligid.

Pinagbubuksan ko muna ang mga bintana upang makapasok ang hangin. Makalat sa loob. Walang pagbabago. Iyon at iyon ang araw-araw kong nadadatnan.

Naiinis kong nilagpasan ang tambak ng mga hugasin sa mesa at lababo. Deretso na akong pumunta sa silid ko.

Pero bigla akong napahinto sa bukana ng pinto nang abutan ko si Neri na nakahiga sa kama ko habang abala ito sa hawak nitong cellphone.

''Anong ginagawa mo rito?''

''Busy ako kaya huwag mo akong istorbohin.''

''Puwes, lumabas ka dahil hindi ka welcome rito.''

''Haist! Nabaril tuloy ako!'' tukoy nito sa nilalarong online games. Bumangon ito. Pero sa halip na mainis ay gumuhit ang nakakalokong ngisi nito matapos makita ang galit sa mukha ni Denise. ''Ops! Huli ka na sa balita. Evicted ka na rito.''

''Ano?''

''Dahil wala ka nang trabaho, lilipat ka na sa dulo. Sa dati naming silid ni Ponce.''

Saka ko lamang napansin na wala na roon ang mga gamit ko. ''Kuwarto ko ito! Ako ang nagpaayos nito!''

''Pero si Papa ang masusunod dito sa bahay. Kung gusto mong mabawi ito, puntahan mo siya dahil gusto ka rin namang niyang makausap.''

Napakunot ako ng noo.

''Binigyan ni Mr. Cheng ng magandang trabaho si Ponce. Kaya sa tingin ko ay palalayain ka na ni Papa. Mabuti naman dahil araw-araw umiinit ang ulo ko sa'yo.''

Napangisi ako at napailing. ''Umiinit ang ulo mo sa taong araw-araw nagpapakain sa 'yo? Wow! Saan ka nagparetoke? Ang kapal kasi ng mukha mo!''

''Magtalak ka lang nang magtalak diyan dahil iyan na rin naman ang huli.''

''Huwag kang pakasisiguro. Baka baliktarin ko ang mundo mo.''

Natawa si Neri. ''Whoa! Palaban ka na? Sa pagkakaalala ko kasi ay para kang tuta na sunod nang sunod lang kay Mama at Papa. Haissst! Mukhang tama sila. Tulad ka rin ng Mama mo na nasa loob ang kulo.''

''Anong sinabi mo?''

''Alam kong narinig mo 'yon. Huwag kang bingi-bingihan.''

Mabilis akong sumugod at marahas kong hinatak ang mahabang buhok ni Neri na napadaing naman sa sakit. ''Ulitin mo ang sinabi mo!''

''Bitiwan mo ako! Aray! Aray!''

''Huwag na huwag mong babastusin ang Mama ko lalo na nang tulad mong pinulot lang ng kapatid ko sa isang bar! Akala mo ba hindi ko alam na syota ka ng bayan?''

''Hindi totoo 'yan!''

''Hindi totoo o nahihiya ka lang malaman ng mga anak mo na ang ina nila ay cheap na babae?''

Ibinuhos ko ang galit sa dibdib ko sa paghigpit ko ng hawak sa buhok ni Neri.

Malakas ang loob ko nang mga oras na iyon dahil alam kong bagsak ang dalawa kong kapatid sa kalasingan.

''Aray! Tumigil ka na! Tulong!''

''Nasaan na ngayon ang tapang mo? Ilabas mo na para makalbo kita!''

''Aray, aray! Bitiwan mo ako!''

Mas matangkad ako kay Neri. Advantage ang mahahaba kong braso kaya hirap ito na abutin ako.

''Patay ka mamaya sa asawa ko!''

''Tama! Baka patay ka na nga niyang datnan!''

''Makukulong ka!''

''Wala akong pakialam! At least, libre lahat doon! Wala akong pakikisamahan na mga taong ang kakapal ng mukha at apog!''

Tumatakbong pumasok ng kuwarto ang dalawang hipag ko. At parang iyon ang nakuhang pagkakataon ng mga ito para makaganti sa akin dahil sumugod agad ang mga ito sa akin.

Hindi ako sanay sa mg away kahit ilang beses na akong napapaharap kapag si Emie ang kasama ko. At wala rin akong kaalam-alam sa self-defense.

Pero nang mga oras na iyon na alam kong nanganganib sa kamay ng tatlo kong mga ungrateful na hipag ang buhay ko ay bigla na lang lumabas ang pagiging amasona ko. Marahil isa iyon sa mga hidden talent ko.

Hindi ko binibitiwan ang pagkakahawak ko sa buhok ni Neri. At nang makahanap ako ng tiyempo na makawala sa dalawa na gusto nang hawakan ang mga braso ko, marahas kong sinipa ang mga ito saka pinalipad ko ang isa ko pang kamay na sumapol kay Liza at nagpatumba rito.

Pero dahil tatlo sila, dehado ako. Alam ko na anumang oras ay babagsak ako. Pero bigla na lang dumating ang super duper heroine ng buhay ko. And she saved my fvcking day!

''Aahhhhhh!'' sigaw ni Emie nang sumugod na agad pinalipad ang trademark niyang flying kick.

Tama ang naisip ko. Hindi basta aalis ang kaibigan ko nang hindi ako safe. Safeness for her is with my windows close.

Alam ni Emie na kapag nasa loob na ako ng silid ko ay una kong isinasara ang mga bintana. Minsan na kasi akong nasungkitan ng mga gamit at sinilipan ng mga tambay na manyakis.