Chapter Three

SA loob ng dalawang araw, parang nasa impiyerno si Gray. Miserableng-miserable ang kanyang pakiramdam dahil hindi niya alam kung saan naroroon si Hannah. Tinatawagan niya ito pero hindi nito sinasagot ang kanyang cellphone na para bang gusto nitong sabihin sa kanya na 'bahala ka sa buhay mo'.

Nag-message na rin siya sa kaibigan nitong si Chesca pero hindi ito sumagot.Kahit nakaramdam siya ng inis, parang gusto niyang umasa na dito tumakbo si Hannah. Kung hindi kasi'y siguradong nag-chat na ito sa kanya. Ngunit ngayong nakita niyang may kasamang lalaki si Hannah, parang nagduda siya kung si Chesca nga ba ang tinakbuhan nito.

"Damn it, shit!" sigaw niya. Parang gusto niyang kumuha ng bato at ibato sa lalaking iyon kahit nasa loob pa ito ng kotse. Mula sa kanyang kinatatayuan, kitang-kita niya ang paghalik nito kay Hannah. Pakiramdam tuloy niya'y may malaking kamay na lumamutak sa kanyang puso dahil damang-dama niyang nagdurugo ngayon iyon. 

Bestfriend niya si Hannah at ngayon lang niya ito nakitang may kasamang lalaki. Hindi tuloy niya mapigilan ang makaramdam ng sobrang pagkataranta. Paano kung bigla na lang itong maging boyfriend ni Hannah. 

Umiling siya. Naisip niyang sinabi nga pala ni Hannah na hinding-hindi ito mag-aasawa dahil natatakot itong hindi magtagumpay ang marriage nito. Sa kaisipang iyon ay gusto niyang makahinga ng maluwag kaya lang pumasok na naman sa isip niyang gusto nga pala ni Hannah na magkaanak. 

Nang bumaba ang lalaki ay nakangisi pa nang tapunan siya nito ng tingin. Gusto man niyang sumugod at manuntok pero hindi niya magawa. Wala siyang karapatan. Bestfriend lang siya ni Hannah. Mas okay ng mamatay siya sa pagpipigil na magwala kaysa naman magalit na naman sa kanya si Hannah. 

Sa dalawang araw na hindi niya alam kung nasaan ito ay parang gusto na niyang mamatay sa sobrang pag-aalala. 

Lalapitan na sana niya si Hannag para kumprontahin ng, "Honeybunch!"

Marahas na paghinga ang pinawalan niya dahil kilalang-kilala niya ang boses na 'yon. Malakas at matinis. Kaya naman hindi na siya nagulat nang makita niya si Nicole. Tulad ng dati, naka-sleeveless ito at maikling-maikling shorts. Kung dati'y natatakam siya kapag nakikita ang legs nito ngayon ay parang wala na iyong dating sa kanya. 

"I miss you so much na."

"Nicole...." naiiritang bulalas niya nang bigla na lang siya nitong yakapin. Tinangka rin siya nitong halikan pero nakaiwas siya. Ewan niya kung bakit parang tumututol ang kalooban niya na makita ni Hannah na mayroong humahalik sa kanya. 

Minsan na silang nagkaroon ng sekswal na ugnayan ni Nicole at hindi na niya iyon hahayaan pang maulit. Para sa kanya, once is enough. 

"Bespren, pasok na kayo sa bahay mo. Baka diyan pa kayo magkalat," wika ni Hannah na parang nang-aasar pa. Ngunit kahit na nakangiti ito ay hindi naman nito magawang ipagkaila ang talim ng tingin nito kay Nicole. Kung hindi lang niya alam na badtrip talaga si Hannah dito'y gusto niyang isipin na nagseselos ito. 

Well, ganu'n naman talaga ang bestfriend niyang si Hannah. Masyado itong prangka at sinasabi agad kung ano ang nasa isip. Ngunit, alam niyang may paninindigan ito kaya hindi niya maiwasan ang magtaka. Nu'ng isang araw lang ay gusto nitong 'magpaanak' sa kanya pero ngayon...

"Papasok kayo sa bahay mo?" kunot noong tanong niya. Sa wakas ay nagkaroon siya ng lakas na humakbang.

Wala siyang paki kung impit mang tinawag ni Nicole ang kanyang pangalan. Ang mga mata niya'y nakatutok lang kay Hannah na abot tenga ang ngiti. Naningkit tuloy ang kanyang mga mata. Naisip niyang kaya ganoon ang klase ng ngiti nito ay dahil nakatikim ito ng halik sa lalaking kasama nito ngayon na parang christmas light na umiilaw ang mga mata.

"Yes, bisita ko siya. By the way, this is Oliver Pascua, and he is my bestfriend, Gray," wika ni Hannah. Bahagya lang siya nitong sinulyapan tapos itinuon na nito ang pansin sa Oliver na 'yun.

Malalim na buntunghininga ang kanyang pinawalan para hindi sumiklab ang nadarama niyang pagrerebelde. Dalawang gabi siyang hindi nakatulog sa kakaisip kung nasaan na ito. Kahit na may hinala siyang nasa poder ito ni Chesca ay hindi pa rin siya mapakali dahil hindi siya nakatanggap ng kumpirmasyon buhat sa kaibigan nito. Hindi rin tuloy siya makakain dahil sanay siyang kasamang mag-breakfast si Hannah. Bigla rin niyang na-miss ang mga kuwentuhan at asaran nila.

"Wala ka ba talagang planong mag-girlfriend ng matino? Palagi na lang kitang nakikitang may kasamang babae. Buti sana kung iisa pero paiba-iba."

Hindi niya napigilan ang matawa sa reaksyon ni Hannah. Para bang diring-diri habang naiisip ang kanyang pambababae. Iyon nga lang kahit na lukot ang mukha nito'y hindi rin maipagkakailang napakaganda ng kanyang bestfriend. Kung mag-aayos lang ito'y talbog ang mga babaeng parang doberman kung makabuntot sa kanya.

"Bakit ikaw, wala ka pang boyfriend?" tanong niya sa halip sagutin ang tanong nito. Napakahirap naman kasing sagutin iyon dahil kahit sa sarili niya'y hindi niya iyon magawang sagutin.

"Wala naman akong balak na mag-asawa. Ayokong sumakit ang ulo at ma-brokenhearted kapag iniwan ako. Ang gusto ko lang, magkaanak."

Natawa siya sa sinabi nito. "Hindi ka magkakaanak kung wala kang karelasyon na makakasama mo sa paggawa ng baby."

"Pwede kaya."

Ewan niya kung bakit ng sabihin ni Hannah ang mga salitang iyon, bigla siyang nag-panic. "Huwag mong sabihin na makikipag-one night stand ka?" aniyang pigil na pigil pa ang paghinga. 

"Tange, may IVF procedure. Kailangan lang may sperm," wika nito sabay iling tapos inis siyang tinitigan. "Ang dami-daming gustong magkaanak samantalang ikaw, tinatapon mo lang ang sperm mo."

Gusto niyang humagalpak nang tawa ng mga sandaling iyon pero hindi niya magawa dahil napatitig siya kay Hannah. Magkaharap silang kumakain noon habang nagbi-breakfast. Hindi rin niya naiwasang itanong sa sarili, bakit ba parang paganda nang paganda si Hannah sa kanyang paningin?

"Iniwan ka na ng bestfriend mo, tulala ka pa rin dyan," sabi ni Nicole sabay yakap sa kanyang beywang. Napigil tuloy ang kagustuhan niyang sundan si Hannah ang lalaking iyon.

Damn! Inis niyang sabi sa sarili. Hindi lang niya matukoy kung saan para saan ang pagmumura niya. Sa pagyakap sa kanya ni Nicole o sa pambabalewala ni Hannah sa kanya.